kraamaat@gmail.com
+ +92 333-430-6384


پی ڈی ایم اپنے موقف اُتے قایم اے‘ اوہناں دے موقف وچ کوئی تبدیلی نہیں آئی:مریم نواز……٭رویل خبر٭


نمائندا رویل May 26, 2021


اسلام آباد (بیورو رپورٹ) پاکستان مسلم لیگ ن دی نائب صدر مریم نواز نے کہیا اے کہ پی ڈی ایم دے موقف وچ کوئی تبدیلی نہیں آئی‘ شاہد خاقان عباسی دا اوہی موقف اے جہڑا ن لیگ‘ پی ڈی ایم د ا تے میرا اے‘ پی ڈی ایم وچ کوئی نواں ایکا نہیں بن رہیا‘ شہباز شریف نے بطور اپوزیشن لیڈر عشائیا دِتا ایہدا پی ڈی ایم نال کوئی لینا دینا نہیں‘ عدم اعتماد تحریک لئی مطلوبا نمبر توں ودھ نمبرز موجود نیں۔ جج شوکت عزیز صدیقی تے ارشد ملک دی گواہی بعد میرے تے نواز شریف دے کیسز ختم ہونے چاہید ے نیں۔ منگل نُوں اسلام اباد ہائیکورٹ وچ پیشی دے موقع اُتے میڈیا نال گلبات کردیاں ہویاں مریم نواز نے کہیا کہ جتھوں تک میریاں معلومات نیں پی ڈی ایم وچ کوئی نواں ایکا نہیں اے نہ کوئی ہور ہیا اے‘ پی ڈی ایم اپنے موقف اُتے قایم اے‘ اوہناں دے موقف وچ کوئی تبدیلی نہیں آئی‘ شاہد خاقان عباسی دا اوہی موقف اے جہڑا ن لیگ‘ پی ڈی ایم تے میرا اے‘ شاہد خاقان عباسی نے بلکل صحیح گل کیتی اے۔ اوہناں نے کہیا کہ پیپلز پارٹی ولوں شوکاز نوٹس دا حالے تک جواب نہیں آیا‘ اوہ اپنا جواب جمع کروا دیوے فیر پی ڈی ایم جایزا لوے گی‘ عدم اعتماد دی تحریک لئی سانوں نمبر دی کوئی لوڑ نہیں اے‘ ساڈے کول مطلوبا نمبر توں ودھ نمبر موجود نیں‘ ایہ منصوبے چار سال توں ہوندے رہے نیں‘ بدنیتی نال کیتا ہویا سارا کجھ تہاڈے اُتے آ رہیا اے۔ مریم نواز دا کہنا سی کہ شہباز شریف دا عشائیا بطور اپوزیشن لیڈر تے پارلیمنٹرین لئی سی ایہدا پی ڈی ایم نال کوئی لینا دینا نہیں‘ عشائیے وچ میری عدم موجودگی نُوں ایشو نہ بنایا جاوے‘ شہباز شریف موجود نیں تے ہر تھاں میری موجودگی دی لوڑ نہیں اے۔ اِک سوال اُتے مریم نواز دا کہنا سی کہ چودھری نثار دا مسلم لیگ ن نال کیہ تعلق اے‘ اوہ تے اِک ازاد رکن نیں ایہو جہے انسان دے بارے وچ میرے توں سوال کرو جہدی کوئی قانونی حیثیت ہووے۔ جج شوکت عزیز صدیقی دی گواہی دے بعد میرے تے ارشد ملک دی گوائی دے بعد نواز شریف دے کیسز ختم ہونے چاہیدے نیں‘ ایہ سارے کیسز جھوٹھے تے انتقامی کارروائی نیں‘ ریورس انجینئرنگ ہووے گی تے نظر آ جاوے گی‘ حالے تک تے نظر نہیں آ ئی۔ چیئرمین نیب سیاسی انتقامی کارروائیاں وچ استعمال ہوئے نیں‘ چیئرمین نیب دا ایشو نہیں اِک چیئرمین نُوں ہٹاواں گے تے کوئی اُنجدا ای دوجا چیئرمین نیب لے آن گے‘ جہڑے چیئرمین نیب توں ایس طرحاں دے کم لیندے نیں اوہناں دا ایشو اے‘ چیئرمین نیب نُوں استعمال کرن والے سبھ توں ودھ گنہگار نیں۔ اوہناں نے کہیا کہ اپوزیشن دی ذمے داری اے کہ اوہ سانجھے طور اُتے مہنگائی دا معاملا چُکے‘ میرے نال کسے غریب دے گھر چلو پتا لگا جاوے گا کہ حالات کیہ نیں‘ کجھ خالی سٹالز اُتے جا کے حالات دا پتا نہیں لگدا‘ جھوٹھ بول کے غلط آنکڑے دَسے جا رہے نیں۔