نواز ایٹمی دھماکا نہ کردے تے قوم اوہناں دا دھماکا کر دیندی: فردوس……٭رویل خبر٭

لاہور (نیوز ڈیسک) معاون خصوصی وزیر اعلا پنجاب ڈاکٹر فردوس عاشق اعوان نے کہیا اے کہ 28 مئی دے دن پاکستان مسلم ملکاں وِچوں پہلی ایٹمی قوت بنیا۔ شاہی خاندان دے حواری تے درباری ایٹمی دھماکیاں دے حوال توں بغلاں وجا رہے نیں۔ اوہ کسے ہور دا کریڈٹ چوری کرن دی کوشش نہ کرن کیوں جے ایس قو م نے اپنا ڈِھڈ کٹیا تے ریاستی اداریاں نے اپنا کردار ادا کیتا تے ایہ سبھ ممکن ہویا۔ ایٹمی دھماکیاں دے پچھے کئی ورھیاں دی انتھک مشقت تے کئی شخصیات دی محنت شامل سی جہنوں اسیں خراج تحسین پیش کردے آں۔ نواز شریف جے ایٹمی دھماکا نہ کردا تے قوم اوہناں دا دھماکا کر دیندی۔ ایہناں خیالاں دا اظہار فردوس عاش اعوان نے ڈی جی پی آر وچ میڈیا نال گلبات کردیاں ہویاں کیتا۔