امتحان دِتے بغیر کسے نُوں کوئی گریڈ نہیں مِلے گا‘ امتحان ہر صورت ہون گے:وفاقی وزیر تعلیم شفقت محمود……٭رویل خبر٭

اسلام آباد (نیوز ڈیسک) حکومت نے 10 ویں تے 12 ویں دے امتحان 10 جولائی دے بعد لین دا فیصلا کیتا اے۔ وسیلیاں دے مطابق وفاقی وزیر تعلیم شفقت محمود دی صدارت ہیٹھ بین الاصوبائی وزرائے تعلیم کانفرنس دا اجلاس ہویا‘ جہدے وچ چاراں صوبیاں دے وزرائے تعلیم نے ویڈیو لنک راہیں رلت کیتی۔ میٹرک تے انٹرمیڈیٹ دے امتحان ایجنڈے دا حصا سن‘ جد کہ ہور کلاساں دے امتحانات دے حوالے توں وی تجویزاں غور ہیٹھ آئیاں۔ بین الصوبائی وزرائے تعلیم کانفرنس دے بعد پریس کانفرنس کردیاں ہویاں وزیر تعلیم شفقت محمود دا کہنا سی کہ اج دے اجلاس وچ چاراں صوبیاں دے وزرائے تعلیم دے آپسی مشورے نال فیصلے کیتے گء‘ پچھلے سال اسیں کجھ بچے امتحانات دے بغیر پاس کیتے سن‘ پر ایس وار فیصلا ہویا اے کہ امتحان دِتے بغیر کسے نُوں کوئی گریڈ نہیں مِلے گا‘ امتحان ہر صورت ہون گے۔ وزیر تعلیم شفقت محمود دا کہنا سی کہ تعلیمی اداریاں نُوں کھولن یاں بند کر دے فیصلے سوکھے نہیں ہوندے‘ سانوں وی ایہناں مشکل حالات وچ مشکل فیصلے کرنے پئے‘ کرونا وباء تے لاک ڈاؤن دے دوران سکول بند ہون تے کھُلن دا سلسلا جاری رہیا‘ جہدی وجھا توں بچیاں نے یکسوئی دے نال تعلیم اُتے توجا نہیں دِتی‘ تے ایہناں دی تعلیم متاثر ہوئی‘ پر اجلاس وچ فیصلا ہویا اے کہ ایس گل اُتے قایم آں کہ امتحان ہر صورت وچ ہون گے‘ سارے فیصلیاں وچ کوئی تبدیلی نہیں ہووے گی تے نہ کوئی دباء برداشت کراں گے۔ وزیر تعلیم نے کہیا کہ سارے صوبیاں دی مشاورت دے بعد فیصلا کیتا اے کہ سارے تعلیمی ادارے 7 جون توں کھول دِتے جان گے‘ پہلے اسیں فیصلا کیتا سی کہ 24 جون دے بعد امتحان لئے جان پر ہُن فیصلا ہویا اے کہ بچیاں نُوں امتحانات دی تیاری لئی ویلا دِتا جانا چاہیدا اے تے ہُن 10 جولائی دے بعد 10 ویں تے 12 ویں دے پرچے ہون گے تے ایہناں پرچیاں دے بعد ای ہور امتحانات ہون گے‘ جد کہ ہر پیپر وچ مناسب وقفا رکھیا جاوے گا تاں جے بچے تیاری کر لین۔ شفقت محمود دا کہنا سی کہ پڑھیاراں دی کو رس ورک پورا نہ ہون دی شکایت درست اے‘ ایس لئی فیصلا کیتا اے نوویں تے 10 ویں دے پڑھیاراں دی اسانی لئی اوہ صرف اختیاری مضامین تے ریاضی دے پیپر دین گے‘ تے پریکٹیکل تے باقی مضموناں دے امتحانات نہیں ہون گے‘ جدکہ گیارھویں تے بارھویں دے ویی امتحانات صرف اختیاری مضامین وچ لئے جان گے‘ جد کہ ستمبر دے تیجے ہفتے تک سارے امتحاناں دے نتیجے آ جان گے۔