رب دا جی۔۔۔۔۔٭رویل شاعری٭

میرا بھار وی ماں میری نے

ریجھ ریجھ نال

چُکیا ہونا

میرے آون دے سفنے

اُہدی تانگھ ودھاؤ ہونے

دل تے گھر سجاۓ ہونے

نکیاں نکیاں

وڈیاں وڈیاں

سدھراں لاڈ

پیار محبت

چاہ چاہواں رچائے ہونے

میرے ہون توں

کجھ چر بس کجھ چر پہلے

ساہ اُڈیک ہنڈاۓ ہونے

مینوں جھولی پاوندیاں ہویا

دسیا ہونا

"رب دا جی " اے

اک بھوچال تے آیا ہونا

مینوں جھٹ لُکایا ہونا

ڈر دے ہتھی

بے وسی جند توں

بابل چُنڈ چھڈائی ہونی

جند جند کُرلائی ہونی

کھیڈ کھڈونے منگ توں پہلاں

اک اک کر دفناۓ ہونے

ریجھ کریجھ بنائی ہونی

سر صدقہ اپنا کر کے

چیلاں اگے مینوں دھر کے

چُنجھ چُنجھ چُگائی ہونی

میں آں کون؟

اک رب دا جی

رب دے بندے تیرا کیہ؟

توں وی تے رب دا جی

تیرا تیرے وچ کیہ؟

٭٭٭٭٭