kraamaat@gmail.com
+ +92 333-430-6384


ملک وچ ہر دن مہنگائی ودھدی جا رہی‘ غربت تے بیروزگاری تواریخی سطح اُتے اپڑ چکی اے: بلاول بھٹو زرداری ……٭رویل خبر٭


نمائندا رویل June 05, 2021


اسلام آباد (نیوز ڈیسک) پاکستان پیپلز پارٹی دے چیئرمین بلاول بھٹو زرداری نے کہیا اے کہ اسیں کد ھرے درخاست کرن نہیں جا رہے کہ حکومت نُوں ڈِگایا جاوے‘ اپوزیشن جماعتاں وچ تہانوں ڈِگان دی ہمت نہیں تے عام چوناں دا انتظار کراں گے‘ مشکل ویلا وزیراعظم دیاں اے ٹی ایمز لئی ختم ہویا ہووے گا کیوں جے عام بندے دا دن ہر لنگھے دن توں بُرا ہوندا اے‘رائیونڈدے وزیراعظم نُوں سزا دے باوجود باہر گھل دِتا گیا‘ ایہ احتساب نہیں‘ پولیٹیکل انجینئرنگ تے سیاسی انتقام اے‘ وزیراعظم دی بھین اُتے الزام لگے تے کجھ نہ ہووے پر پچھلے صدر دی بھین اُتے الزام لگے تے اوہناں نُوں ہسپتال توں گھسیٹ کے جیل لے جایا جاندا اے‘ وزیراعظم دے سنگیاں اُتے الزام لگے تے اوہ جیل نہیں جاندے‘ قائد حزب اختلاف پنجاب دا پووے تے ضمانت مل جاندی اے‘ سندھ دا ہووے تے جیل گھل دِتا جاندا اے ایہ کہڑی قسم دا پاکستان اے؟ اسلام آباد وچ پریس کانفرنس کردیاں ہویاں بلاول نے کہیا کہ وزیراعظم‘ وزراء تے ترجماناں ولوں ملکی معیشت دے حوالے توں جہڑے بیانات ساہمنے آ رہے نیں اوہناں توں لگدا اے کہ ایہناں نُوں معیشتے تے عام بندے دے حالات دا علم ای نہیں اے‘ حکومت تے سلیکٹڈ وزیراعظم نُوں پتا ای نہیں اے کہ عام بندا‘ کسان‘ مزدور‘ پڑھیار کس دُکھ تے پریشانی دے حالات توں لنگھ رہے نیں‘ وزیراعظم تے اوہناں دی ٹیم نُوں عام بندے دے حالات دا علم نہیں اے‘ معیشت بارے ہون والی بیان بازی توں واضح اے کہ وزیراعظم دا تعلق لوکائی نال نہیں اے‘ وزیراعظم کہندے نیں کہ مشکل ویلا لنگھ گیا‘ مشکل ویلا اوہناں دے اے ٹی ایمز لئی ختم ہویا ہووے گا کیوں جے عام بندے دا دن ہر لنگھے دن توں بُرا ہوندا اے‘ ملک وچ ہر دن مہنگائی ودھدی جا رہی اے‘ غربت تے بیروزگاری تواریخی سطح اُتے پہنچ چکی اے جد کہ وزیراعظم کہندے نیں کہ پاکستان دی معیشت ترقی کر رہی اے۔ اوہناں نے کہیا کہ وزیراعظم خشحالی دا ڈھول پِٹ رہے نیں‘ اوہ وزیراعظم جہنے ملکی تواریخ وچ سبھ توں ودھ بیروزگاری دے دور دی قیادت کیتی‘ مہنگائی دے ریکارڈ توڑے اوہ کَہ رہے نیں کہ معیشت ترقی کر رہی اے‘ تواریخی مہنگائی لوکائی بھگتے‘ ایہناں دیاں جیباں اُتے ڈاکا ماریا جا رہیا ہوے تے گھٹ توں گھٹ لوکائی نُوں اینا اطمینا ہووے کہ اوہناں دے وزیراعظم نُوں ایہدا پتا اے‘ ر ایہناں دی تے ایہناں دی ٹیم دی بازی توں لگدا اے کہ ایہناں نُوں عام بندے دے حالات دا علم ای نہیں اے۔ جدوں وزیراعظم تے اوہناں دی ٹیم نُوں عام بندے دے حالات دا علم ای نہ ہووے تے اوہ کویں امید رکھدے تُسیں ایہناں دے مسئلیاں دا حل کڈھو گے‘ اسیں وزیراعظم دے بجٹ دا انتظار کر رہے آں‘ جہڑا پاکستان دی خشحالی تے معاشی ترقی دا بجٹ ہووے گا تے اِک لٹ مار کے ایہ آئی ایم ایف توں نِکل جان گے‘ تے تُسیں کشکول لے کے ہر ملک کیوں جا رہے او‘ تُسیں عرب ممالک جا کے بھیک کیوں منگ رہے او؟ بجٹ پیش ہووے گا تے دُدھ دا دُدھ تے پانی دا پانی ہو جاوے گا‘ تُسیں تے آپ کَہ رہے او کہ تُسیں شرح نمو دے سار ے ریکارڈ توڑ دِتے نیں‘ خشحالی آ رہی اے‘ ایس لئی اسیں امید کردے آں کہ اسیں آئی ایم ایف توں نکلن والے آں‘ اسیں امید کردے آں کہ تُسیں پیپلزپارٹی وانگوں تنخاہواں وچ 100 تے پینشن وچ 150 فیصد وادھا کرو گے‘ اسیں امید کردے آں کہ جدوں ایہ بجٹ آئے گا تے تُسیں مہنگائی‘ بیروزگاری نُوں ختم کر دو گے‘ لوکائی نُوں 1 کروڑ نوکریاں مِلن گیاں‘ 50 ہزار گھر نظر آن گے۔ اوہناں نے کہیا کہ اِک گل تے نظر آ رہی اے کہ وزیر خزانا شوکت ترین تے ہور وزیراں نے پیپلز پارٹی د ے معیشت اُتے موقف نُوں مننا شروع کر دِتا اے تے ایہناں دے وزراء پچھلے صدر آصف زرداری وانگوں آپ کَہ رہے نیں کہ نیب تے معیشت نال نہیں چل سکدے‘ ہُن شوکت ترین کَہ رہے نیں کہ ایہناں نے آئی ایم ایف نال بُری ڈیل کیتی اے تے ایہدے نال پاکستان تے ایہدی لوکائی نُوں نقصان پہنچ رہیا اے تے دَسیا جاوے کہ اسیں ہُن تک آئی ایم ایف وچ کیوں آں‘ وزیراعظم اج وی کرپشن تے مافیاز دا راگ الاپ رہے سن کہ ایہناں نُوں ڈر اے کہ پی ٹی آئی دی اگلی حکومت آئی تے ایہناں دا بیرون ملک موجود پیسا نہیں بے گا‘ ایہناں نُوں ایہ پیسے حکومت دے پہلے 90 دن وچ واپس لیانے سن‘ ہُن کَہ رہے نیں کہ اگلی حکومت وچ واپس لیاواں گے‘ ایہ کس قسم دا احتساب دا نظام اے‘ ایہ کیہ مذاق اے‘ ملک وچ دوغلا نظام چل رہیا اے‘ ایہ انصاف نہیں انتقام تے سیاسی انجینئرنگ اے تے ہُن آپ ایہناں دے وزراء مندے نیں کہ ایہدے نال معیشت نُوں نقصان ہویا اے۔ بلاول نے کہیا کہ عمران خان کہندے سن کہ انتقام نہیں انصاف ہووے گا‘ ایہ کس قسم دا انصاف اے کہ ایہناں دے لوکاں اُتے الزام لگے تے اوہ جیل نہ جان‘ وزیراعظم تے اوہناں دی بھین اُتے الزام لگے تے کجھ نہ ہووے پر پچھلے صدر دی بھین اُتے الزام لگے تے اوہناں نُوں ہسپتال توں گھسیٹ کے جیل لے جایا جاندا اے‘ رائیونڈ دے وزیراعظم نُوں مجرم متھے جان دے باوجود بیرون ملک گھل دِتا جاندا اے تے اوہ لندن جا کے بَہ جاندے نیں پر نوابشاہ دے صدر اُتے جھوٹھا الزام لگے تے اوہ 3 سال تک طبی بنیاد اُتے ضمانت اُتے ہون تے اپنے ملک وچ قید دی زندگی لنگھان‘ قائد حزب اختلاف پنجاب توں ہووے تے ضمانت مل جاندی اے‘ قائد حزب اختلاف سندھ توں ہووے تے جیل وچ ہوندا اے‘ عمران خان صاحب سمجھو‘ ہُن احتساب لوکائی کرے گی تے تُسیں ایہناں دے نشانے اُتے او‘ روٹی تے پانی لئی ترسن والی لوکائی ہُن تہانوں نہیں چھڈے گی‘ اسیں کدھرے درخاست کرن نہیں جا رہے کہ تہانوں ڈِگایا جاوے جے اپوزیشن جماعتاں دے کول تہاڈی حکومت نُوں ختم کرن دی طاقت نہیں اے تے اسیں چوناں دا انتظار کراں گے۔