بلاول پرچی چیئرمین نیں، ایان ایکسپریس دی فلائٹ خالی آندی تے جاندی بھر کے سی‘  اسیں تہانوں کھان نہیں دواں گے:شہبازِ گل ……٭رویل خبر٭

کراچی (نیوز ڈیسک) وزیراعظم عمران خان دے معاون خصوصی شہبازِ گل نے کہیا اے کہ چنگی طرحاں پتا اے کہ بلاول پرچی چیئرمین نیں‘ وفاق دے ٹیکس دی بلاول نُوں کیہ فکر اے؟ سندھ سرکار نے نان ٹیکس ریونیو دا ہدف وی حاصل نہیں کیتا‘ ایہ اینی نکمی اے کہ ایہناں توں اپنا ٹارگٹ حاصل نہیں ہوندا۔ گورنر ہاؤ س کراچی وچ پریس کانفرنس کردیاں ہویاں وزیراعظم دے معاون خصوصی شہباز گِل نے کہیا کہ ڈاکو چور وی ایس طرحاں حکومت نہیں چلاندے‘ ایان ایکسپریس دی فلائٹ خالی آندی تے جاندی بھر کے سی‘ سارا پیسا باہر چلا جاندا سی۔ شہبا ز گِل نے کہیا کہ 5200 ارب سندھ دی لوکائی دے ناں اُتے پیسا آیا‘ ادھے توں ودھ ایہ لے اُڈے‘ سندھ سرکار نے نان ٹیکس ریونیو دا ٹارگٹ 50 ارب رکھیا پر حاصل 12 ارب کیتا‘ تُسیں تے اینے نکمے او کہ تہاڈے توں اپنا رکھیا گیا ٹارگٹ حاصل نہیں ہوندا۔ معاون خصوصی نے کہیا کہ ایہ نہیں نہیں کَہ رہیا‘ ایہ دستاویزات کَہ رہے نیں‘ مینوں نہیں پتا کہ ایہدے وچ کیہ سچ کیہ جھوٹھ اے۔ اوہناں نے کہیا کہ اسیں تہانوں کھان نہیں دواں گے‘ ٹیکس پیئر دا پیسا تہاڈے کول ہوندا اے‘ ایہ کیش رکھیا کیوں اے؟ کتھوں آئے ایہ جھمکے کہنے دِتے ایہ جھمکے؟ کیش وچ تے تُسیں لتھڑے سوں لوکائی اُتے کیوں نہیں لایا۔ شہباز گِل نے کہیا کہ سندھ پولیس دی ایہناں نے کیہ حالت کیتی ہوئی اے تُسیں سارے جاندے او‘ سندھ پولیس دے لئی 102 ارب رکھے‘ صرف 93 ارب خرچ کیتے‘ ایگری کلچر لئی 14 ارب رکھے سن ایہدے وِچوں وی 4 توں 5 ارب بچا لئے نیں۔ اوہناں نے کہیا کہ کراچی تے سندھ نے سانوں بھاری مینڈیٹ دِتا‘ سندھ دی لوکائی نُوں جواب دہ آں‘ سارے وڈیریاں نے ایگریکلچر ٹیکس 61 کروڑ رُپئے دِتا‘ ایہناں نُوں 13 سال ہو گئے لُٹ مار کردیاں ہویاں‘ بلاول کھوتیاں دا ذکر ایس لئی کردے نیں کہ سندھ دے سکولاں وچ کھوتے بھجے نیں۔ شہباز گِل نے کہیا کہ میں کس نُوں کھوتا نہیں کَہ رہیا‘ سارے وڈیرے مگر مچھ نیں‘ تہاڈی خراب کمکاری دی وجھا توں سانوں سندھ وچ نالی تے گٹر دا کم وی کرنا پے رہیا اے‘ تُسیں ہر شے وچ ناکام او ایہ بڑی بدقسمتی دی گل اے۔ شہباز گل نے کہیا کہ اسیں کیوں سندھ نُوں محرو م کراں گے؟ ایہ کوئی پرائی تھاں اے کہ گھٹ پیسے دواں گے‘ جدوں پیسا ملدا اے تے سوال تے پُچھاں گے‘ اسیں ایہناں نُوں کیش بلکل نہیں دواں گے‘ اسیں ابک دفعا وی این ایف سی توں گھٹ حصا نہیں دِتا‘ پیساتہاڈے اُتے نہیں لگدا ایان علی لے اُڈدی اے۔