kraamaat@gmail.com
+ +92 333-430-6384


حکومت دا پورا دھیان مہنگائی دے خاتمے اُتے اے:وزیراعظم عمران خان……٭رویل خبر٭


نمائندا رویل June 23, 2021


اسلام آباد (نیوز ڈیسک) وزیراعظم عمران خان دی صدارت ہیٹھ وفاقی کابینا دے اجلاس وچ سٹیٹ بینک دی رپورٹ وچ حکومت وچ با اثر شخصیات تے کمپنیاں دے کروڑاں رُپئے دے قرضے معاف ہون دا انکشاف کیتا گیا اے جد کہ وفاقی کابینا نے موٹرویز تے ہوائی اڈے گروی رکھن دے پلان دی منظوری دے دِتی۔ وزیراعظم عمران خان نے مہنگائی اُتے قابو پان لئی اقدامات دی ہدایت کردیاں ہویاں کہیا اے کہ کوشش کر رہے آں‘ غریب بندے نُوں ودھ توں ودھ ریلیف دِتا جاوے۔ تفصیلات دے مطابق منگل والے دن وزیراعظم عمران خان دی صدارت ہیٹھ وفاقی کابینا دا اجلاس ہویا جہدے وچ 17 نکاتی ایجنڈا غور ہیٹھ آیا۔ اجلاس وچ ملک دی سیاسی تے معاشی صورتحال اُتے تفصیلی وچار وٹاندرا کیتا گیا جد کہ یوٹیلیٹی کارپوریشن حکام نے مہنگائی تے کھاون پیون شیواں دیاں قیمتاں بارے اجلاس دے رلتیاں نُوں تفصیلی بریفنگ دِتی۔ اجلاس وچ وفاقی کابینا نے پاکستان انٹرنیسنل ائر لائن کوآپریشن لمیٹڈ بورڈ دے چیئرمین دی تعیناتی‘ حکومتی اثاثیاں بدلے ڈومیسٹک تے انٹرنیشنل اجارا سکوک بانڈ جاری کرن‘ نیشنل ووکیشنل اینڈ ٹیکنیکل ٹریننگ کمیشن دے ایگزیکٹو ڈائریکٹر دی تعیناتی‘ لکسمبرگ دے نال دُہری شہریت دے معاہدے‘ پبلک پراپرٹی لئی اینکروچمنٹ بل 2021‘ سپریم کورٹ سٹاف لئی اسلام آباد وچ ہاؤسنگ سوسائٹی‘ ڈرگ ریگولیٹری اتھارٹی دے سی ای او دی تعیناتی‘ سکھر الیکٹرک پاور کمپنی دے سی ای او دی تعیناتی‘ دیامر بھاشا ڈیم کمپنی دے بورڈ آف ڈائریکٹرز دی تعیناتی دی منظوری دے دِتی اے۔ اجلاس وچ تربیلا‘ منگلا ڈیم وچ پانی دی تھوڑ اُتے وی بریفنگ دِتی گئی تے کابینا نے متعدد نکات دی منظوری وی دِتی جد کہ اقتصادی رابطا کمیٹی دے فیصلیاں دی وی توثیق کیتی گئی۔ ایس توں وکھ کابینا نے بینکاں بارے خصوصی کیسز دی انسپیکشن رپورٹ‘ کارٹلن ہوٹل کراچی دی زمین دے استعمال‘ ممنوعا بور لائسنسز دے اجراء دی منطوری‘ اسلام آباد دی ماسٹر پلاننگ لئی قائم کمیشن وچ ممبران دی تعیناتی دا معاملا وی مؤخر کر دِتا اے۔ وسیلیاں دے مطابق کابینا اجلاس وچ سٹیٹ بینک آف پاکستان ولوں انسپکشن رپورٹ جمع کروائی گئی۔ رپورٹ وچ دَسیا گیا کہ سرکاری بینک ولوں کئی کمپنیاں نُوں نوازن لئی خلاف ضابطا قرض معاف کیتے گئے‘ چار بینکاں ولوں 1 ارب 24 کروڑ توں ودھ قرضے معاف کیتے گئے۔ رپورٹ دے مطابق سرکاری بینک نے 28 کیساں وچ 27 کروڑ تے 3 نجی بینکاں نے 97 کروڑ معاف کیتے نیں۔ سٹیٹ بینک ولوں سرکاری بینک نُوں ایکشن لین دی ہدایت کر دِتی گئی اے تے ناکامی اُتے بھاری جرمانا عاید ہووے گا۔ عوامی مفاد دے پیش نظر قرض معاف کرن دی رپورٹ قائما کمیٹی خزانا وچ جمع کروائی جاوے گی۔ وفاقی کابینا سٹیٹ بینک انسپکشن رپورٹ دا جایزا لین دے بعد ہور کارروائی دی منظوری دیوے گی۔ وسیلیاں مطابق اجلاس دوران وزیراعظم نے مہنگائی دے خاتمے لئی ہور ٹھوس اقدامات دی ہدایت کردیاں ہویاں کہیا کہ غریب طبقے نُوں ودھ توں ودھ سہولتاں فراہم کرنا حکومت دی پہلی ترجیح اے‘ مہنگائی نال غریب طبقا ڈاڈھا متاثر ہویا اے‘ جہدا احساس اے‘ حکومت دی پوری توجا مہنگائی دے خاتمے اُتے اے تاں جے غریب لوکائی نُوں 2 ویلے دی روٹی اسانی نال مل سکے‘ وزیراعظم نے حکام نُوں سختی نال ہدایت کیتی اے کہ پورے ملک وچ لوڑی دیاں شیواں دیاں قیمتاں اُتے کڑی نظر رکھی جاوے تے ناجایز منافع خوراں دے خلاف سخت کارروائی کیتی جاوے۔