غلطیاں سبھ توں ہوندیاں نیں پر اوہناں نُوں دُہرانا ٹھیک نہیں: سلما ن خان……٭رویل خبر٭

ممبئی (نیوز ڈیسک) فلم ”دبنگ“ دے اداکار سلمان خان دا کہنا اے کہ ماضی وچ میرے توں کئی غلطیاں سرزد ہوئیاں نیں۔ سلمان خان نے ایہ گل معروف اداکار کبیر بیدی دے نال ویڈیو کال اُتے اوہناں دی آپ بیتی ”سٹوریز آئی مسٹ ٹیل“ اُتے اپنے خیالاں دا اظہار کردیاں ہویاں کہی۔ کبیر بیدی نے اداکار نُوں کہیا کہ میں اپنی کتاب وچ اوہ ساریاں گلاں تے واقعات لکھے جہڑے میری زندگی وچ پیش آئے‘ میں اپنیاں اوہناں غلطیاں دے بارے وچ وی لکھیا اے جہڑیاں میرے توں سرزد ہوئیاں‘ امید اے پڑھن والے ایہناں غلطیاں تے واقعات توں بہت کجھ سکھ سکن گے۔ اداکار سلمان نے کہیا کہ زندگی وچ سبھ توں مشکل کم اپنی غلطی نُوں مننا ہوندا اے‘ ہر کوئی غلطی کر کے مُکر جاندا اے‘ میں اوہ بندا آں جہڑا بلا جھجک اپنی غلطی نُوں تسلیم کردا آں‘ میں ماضی وچ بہت غلطیاں کیتیاں تے اوہناں نُوں ٹھیک وی کیتا‘ غلطیاں سبھ توں ہوندیاں نیں پر دُہرانا ٹھیک نہیں۔