kraamaat@gmail.com
+ +92 333-430-6384


امریکا  تشویش وچ، پاکستان چین دے نال اپنے تعلقات خراب نہیں کرے گا:وزیراعظم عمران خان……٭رویل خبر٭


نمائندا رویل June 30, 2021


اسلام آباد (نیوز ڈیسک) وزیراعظم عمران خان نے کہیا اے کہ امریکا تے مغربی طاقتاں دا پاکستان نُوں جانبدار ہون اُتے مجبور کرنا درست نہیں‘ کجھ وی ہو جاوے کِنا وی دباء ہووے پاکستان چین دے نال اپنے تعلقات خراب نہیں کرے گا۔ چینی ٹی وی نُوں انٹرویو دیندیاں ہویاں وزیراعظم عمران خان نے کہیا کہ پاکستان دے نال چین دے نال ہمیشا خاص تعلقات رہے نیں‘ چین ہے ہرمشکل گھڑی وچ پاکستان دا ساتھ دِتا۔ خطے وچ وڈیاں طاقتاں دا وچکار اِک عجیب کشمکش جاری اے‘ امریکا چین نُوں لے کے تشویش وچ اے‘ امریکا نے چین دے خلاف علاقائی ایکا قایم کیتا اے‘ امریکا نے بھارت تے دور ہو رملکاں دے نال رَل کے خطے وچ اِک ایکا بنایا اے‘ امریکا تے مغربی طاقتاں دا پاکستان نُوں جانبدار ہون اُتے مجبور کرنا درست نہیں‘ سانوں جانبدار ہون دی لوڑ نہیں‘ ساریاں دے نال چنگے تعلقات ہونے چاہیدے نیں‘ کسے وی دباء دی صورت وچ چین نال پاکستان دے تعلقات متاثر نہیں ہون گے۔ اوہناں نے کہیا کہ امریکا تے چین وچ مخاصمت ودھ رہی اے جد کہ امریکا تے یورپی ملک چاہندے نیں کہ اسیں کسے اِک گرُپ دا ساتھ دیے‘ سانوں کسے دے گرُپ وچ جان دی لوڑ نہیں سگوں اسیں ساریاں دے نال تعلق رکھنا چاہندے آں۔ اوہناں نے کہیا کہ اسیں چین دے نال تجارت ودھانا چاہندے آں‘ سی پیک پاکستان لئی بہت وڈا منصوبااے‘ سی پیک پاکستان دے معاشی مستقبل لئی اہم اے۔ اِک سوال دے جواب وچ اوہناں نے کہیا کہ پاکستانیاں دے دل وچ چینی لوکائی دی بڑی عزت اے‘ پاک چین تعلقات صرف حکومتی سطح اُتے نہیں‘ عوامی سطح اُے وی نیں‘ تجارت تے سیاسی تعلقات نال چین دے نال ہور مضبوط رشتا قایم کراں گے‘ عالمی معاملات وچ چین دے نال کھلوتے آں تے کھلوتے رہواں گے‘ مشکل ویلے وچ ساتھ دین والے یاد رہدنے نیں‘ چین دے نال تعلقات مضبوط توں مضبوط تر ہو رہے نیں۔عمران خان نے امریکا نُوں دو ٹوک پیغام دیندیاں ہویاں کہیا کہ بھاویں جنا دباء پوے پاک چین تعلقات وچ تبدیلی نہیں آئے گی۔ امریکا نے ”کواڈ“ نامی علاقائی ایکا بنا کے معاملا پیچیدا کر دِتا اے۔ بھار ت نُوں وی ایسے ایکے وچ شامل کیتا گیا اے‘ پاکستان اُتے چین نال تعلقات گھٹ کرن دا امریکی دباء غیر منصفانا اے۔