kraamaat@gmail.com
+ +92 333-430-6384


پاکستان دی ریڑھ دی ہڈی میرے کسان نیں۔چھوٹے کسان دی مدد کراں گے:و زیراعظم دا کسان کنونشن نال خطاب……٭رویل خبر٭


نمائندا رویل July 02, 2021


اسلام آباد نیوز ڈیسک) اسلام آباد وچ کسان کنونشن نال خطاب کردیاں ہویاں و زیراعظم عمران خان نے ملک دی فوڈ سیکیورٹی نُوں سبھ توں وڈا چیلنج متھدیاں ہویاں کہیا کہ ملک وچ 40 فیصد بچے غذائی تھوڑ دا شکار نیں‘ اسیں اپنی قوم نُوں آن والے مسئلیاں توں بچانا اے تے ایہدے لئی زراعت دا شعبا بہت اہم اے۔ اوہناں نے کہیا کہ پاکستان دے 40 فیصد بال غذا دی کمی دی وجھا توں معمول دے مطابق نہیں ودھدے۔ اوہناں دا کہنا سی کہ اسیں پہلی وار پروگرام لے کے آ رہے آں جہڑا ایہناں مسئلیاں بارے اے‘ اسیں جدوں آئے تے پتا لگا کہ بالاں نُوں دُدھ وی خالص نہیں مِل رہیا تے ایہدے وچ مختلف شیواں رلائیاں جا رہیاں نیں‘ جدوں خالص کرن دی کوشش کیتی گئی تے دُدھ دیاں قیمتاں ودھ گئیاں۔ عمران خان نے کہیا کہ جے اسیں ایسے طرحاں چلدے رہے تے فوڈ سیکیورٹی اینا وڈا مسئلا بن جاوے گا کہ ساڈے لئی قومی سلامتی د مسئلا بن جاوے گا‘ قوم دے 15 یاں 20 فیصد لوک بھُکھے رہ گئے تے اوہی سانوں پچھے لے جان لئی کافی ہون گے۔ اوہناں نے کہیا کہ اسیں اج توں فیصلا کر رہے آں کہ اگے سانوں فوڈ سیکیورٹی دا مسئلا نہ ہووے سگوں اسیں غذائی اجناس برآمد کراں گے‘ ساڈے کول اللہ نے بے شمار موقعے دِتے نیں تے اسیں کجھ وی اگا سکاں گے۔ اوہناں دا کہنا سی کہ اسیں فیصلا کیتا کہ نہ صرف کسان دی مدد کرنی اے سگوں تحقیق کر کے دَسنا اے کہ کہڑے علاقے وچ کیہ اُگا سکدے نیں‘ سی پیک وچ زراعت نُوں شامل کیتا اے تے چین دی تکنیک لے کے آواں گے۔ وزیراعظم نے کہیا کہ چین نے غربت ختم کیتی تے سبھ توں ودھ زور چھوٹے کساناں اُتے دِتا سی تے پنڈاں وچ غربت ختم کیتی‘ ایسے طرحاں اسیں وی چھوٹے کسان دی مدد کراں گے کیوں جے اوہناں دے کول وسائل نہیں نیں۔ اوہناں نے کہیا کہ کساناں نُوں قرضے دین دا پروگرام شروع کیتا‘ پنجاب تے خیبر وچ کسان کارڈ دا پروگرام زبردست منصوبا اے‘ جہدے تحت کساناں نُوں براہ راست قرضے ملن گے۔ اوہناں دا کہنا سی کہ چولستان تے بلوچستان‘ پچھلے فاٹا دے ضم ضلعیاں وچ زمین خالی پئی اے‘ ساڈا کم اے کہ ساری دنیا توں کساناں لئی جدید مشینری تے تکنیک لے کے آواں تے تے ایہناں نُوں د َسّاں گے۔ عمران خان نے کہیا کہ ساڈے پھَل تے سبزیں سٹوریج تے ٹرانسپورٹیشن کارن 30 فیصد ضایع ہو جاندیاں نیں‘ کسان تے مارکیٹ وچکار رکاوٹاں نیں پر ایہنوں ختم کرن لئی نویاں شیواں لے کے آواں گے تے کوشش کراں گے کہ کسان خشحال ہووے۔ اوہناں نے کہیا کہ اسیں اپنے کسان نُوں خشحال کردے جاواں گے تے ملکی پیداوار ودھے گی۔ اوہناں دا کہنا سی کہ میرا ایمان اے کہ اللہ نے ایس ملک نُوں خاص مقصد لئی بنایا تے ان شاء اللہ دنیا وچ ایہدا اِک وڈا مقام ہووے گا‘ قائداعظم تے علاما اقبال نے ایہدے لئی خاب ویکھیا سی تے عام ملک دا خاب نہیں ویکھیا سی سگوں کہیا سی کہ مثالی ریاست بنے گی‘ جتھے انصاف ہووے گا تے اِک خُد مختار ملک بنے گا۔وزیراعظم عمران خان نے کہیا کہ اقتدار وچ آن توں پہلے مدینہ دی ریاست دی نہیں فلاحی ریاست دی گل کردا سی‘ منشیات دے عادی وانگوں سانوں قرضے لین دی عادت پے گئی‘ ہتھ کھلارن نال طاقتور نہیں بنیا جا سکدا‘ آندے ورھیاں وچ اسیں اپنی ابادی لئی اناج پیدا کراں گے‘ فلسطینیاں اُتے ظلم دی وجھا توں اسیں اسرائیل نُوں تسلیم نہیں کردے پر اوہناں نے ریگستان وچ پانی اپڑا کے شیواں اُگائیاں نیں‘ اسیں اپنی قوم نُوں آن والے مسئلیاں توں بچانا اے تے ایہدے لئی زراعت دا شعبا بہت اہم اے‘ پاکستان لئی سبھ توں وڈا مسئلا فوڈ سیکیورٹی دا اے‘ فوڈ سیکیورٹی ای نیشنل سیکیورٹی اے‘ ساڈے 40 فیصد بال پوری غذا نہ ملن دی وجھا توں جسمانی کمزوری دا شکار نیں‘ مینوں دَسیا گیا اے کہ وِکن والا زیادا تر دُدھ مضر صحت ہوندا اے۔ خالص دُدھ دی چیکنگ شروع کیتی تے دُدھ مہنگا ہو گیا‘ سانوں خالص دُدھ نہیں ملدا‘ دُدھ ٹیسٹ کرن توں پتا لگا اوہ دُدھ ای نہیں اے‘ دُدھ نُوں یوریا راہیں واشنگ مشین وچ تیار کیتا جا رہیا اے‘ اسیں کدی گاں‘ مجھ دی جین نُوں تبدیل کرن دا سوچیا ایی نہیں‘ پاکستان دی ریڑھ دی ہڈی میرے کسان نیں۔ وزیراعظم نے کہیا انسان کسے دے ساہمنے جھُکدا نہیں‘ اپنے پَیراں اُتے آپ کھلوندا اے‘ کمزور بندا جدوں طاقتور دے ساہمنے جاندا اے تے مار کھاندا اے۔ چھوٹے جہے طبقے نے ملک دے وسائل اُتے قبضا کر لیا۔ میں جدوں پڑھ رہیا سی اودوں تھوڑے جہے انگلس میڈیم سکول سن‘ فیر انگلش میڈیم سکول بننا شروع ہو گئے تے سرکاری سکولاں دا معیار خراب ہو گیا۔ ایسے طرحاں ہسپتالاں دا معیار وی خراب ہو گیا‘ انسانی معاشرے وچ کمزور طبقے دا خیال رکھیا جاندا اے۔ اقتدار وچ آن توں پہلے مدینہ دیر یاست دی نہیں فلاحی ریاست دی گل کردا سی۔ اوہناں نے کہیا کہ بلوچستان وچ اسیں بہت ساریاں فصلاں اُگا سکدے آں‘ فلسطینیاں اُتے ظلم دی وجھا توں اسیں اسرائیل نُوں تسلیم نہیں کردے پر اسرائیل نے ذہن لڑا کے ریگستان وچ پانی پہنچان دی ٹیکنیک استعمال کیتی تے شیواں اُگا کے ریگستان نُوں کتھوں کتھے پہنچا دِتا‘ پاکستان نُوں اللہ نے 12 موسم دِتے نیں۔ایس توں وکھ وزیراعظم عمران خان نے چینی کمیونسٹ پارٹی دیاں 100 سالا تقریبات اُتے چینی میڈیا نال گلبات کردیاں ہویاں کہیاکہ چین نے ہر مشکل ویلے وچ ساتھ دِتا‘ پاکستان کسے دباء اُتے چین نال تعلقات تبدیل نہیں کرے گا‘ چین تے امریکا وچ اختلافات تشویشناک نیں‘ جے افغانستان وچ خانا جنگی ہوندی اے تے پاکستان سبھ توں ودھ متاثر ہووے گا‘ افغانستان دی تواریخ اے کہ کوئی افغانیاں نُوں تابع نہیں کر سکیا‘ امریکا نے افغان مسئلے نُوں عسکری طاقت نال حل کرن دی کوشش کیتی جو اوہناں دی غلطی اے‘ اسیں ہر حال وچ افغان مسئلے دا سیاسی حل چاہندے آں‘ وزیراعظم عمران خان نے کہیا کہ چینی کمیونسٹ پارٹی دیاں 100 سالا تقریبات اُتے مبارکباد دیندا آں‘ پاکستان وچ چینی صدر نُوں جدید دور دا سیاستدان سمجھیا جاندا اے‘ چینی صدر دی کرپشن خلاف جنگ نال پاکستانی متاثر نیں‘ چینی صدر دی انسداد بدعنوانی مہم مؤثر تے کامیاب اے۔ اوہناں نے کہیا کہ پاک چین تعلقات انتہائی گوڑھے تے نیڑلے نیں‘ میڈیا تے ثقافتی تعلقات اینے نیڑے نہیں جنے سیاسی تعلقات نیں‘ اج دی ملاقات دا مقصد میڈیا رابطیاں نُوں ودھانا اے۔ عمران خان دا کہنا سی کہ چین دا وڈی گنتی وچ لوکاں نُوں غربت توں کڈھنا وڈا کارناما اے‘ چین نے کجھ سالاں وچ 70 کروڑ بندیاں نُوں غربت توں کڈھیا‘ چین نے غربت دے خاتمے دا اعلان کیتا جو غیر معمولی کامیابی اے۔ اوہناں نے کہیا کہ ساڈے معاشرے وچ کسے نظام وچ تبدیلی بہت مشکل اے‘ کمیونسٹ پارٹی دی کامیابی لمی منصوبا بندی اے‘ انتخابی جمہوریت وچ صرف 5 سال دی منصوبا بندی کیتی جاندی اے‘ اسیں چین توں زراعت دے شعبے و چ تعاون دے چاہیوان آں‘ پاکستان زرعی ملک اے تے اسیں چین توں فایدا چُک سکدے آں۔ وزیراعظم نے کہیا کہ چینی صدر تے وزیراعظم نے پنڈاں دی سطح توں جدوجہد شروع کیتی‘ چینی صدر تے وزیراعظم 30 سالا جدوجہد نال ایس تھاں تک اپڑے نیں‘ امریکی صدر نُوں ایس قسم دی سخت محنت تے جدوجہد توں نہیں لنگھنا پیندا‘ چینی قیادت جدوں اعلا عہدے اُتے اپڑدی اے تے اوہناں نُوں تجربا حاصل ہو چکیا ہوندا اے‘ چینی قیادت نظام نُوں مکمل سمجھدی اے‘ اوہناں نُوں پتا ہوندا اے ہیٹھلی سطح اُتے لوک کویں زندگی لنگھا رہے نیں‘ ایہو وجھا اے کہ چین غربت دے خاتمے وچ کامیاب رہیا۔ عمران خان نے ہور کہیا کہ پاکستان چین دے نال تعلقات نُوں کدی گھٹ نہیں کرے گا‘ جنا وی دباء ہووے ساڈے تعلقات تبدیل نہیں ہون گے‘ سی پیک نال اقتصادی مستقبل جُڑیا اے‘ تعلقات ہور مضبوط ہو رہے نیں‘ سنکیانگ دے حوالے توں مغربی میڈیا تے چین دے مؤقف وچ فرق اے‘ اسیں سینی مؤقف نُوں مندے آں‘ کشمیر سنے دنیا وچ نا انصافی دے کئی واقعات ہوئے پر کوئی توجا نہیں دیندا‘ کشمیر دے حوالے توں مغربی میڈیا وچ بہت گھٹ کوریج ہوندی اے۔ اوہناں نے کہیا کہ جہڑا ملک ترقی کردا اے اودا کھیڈاں دا شعبا وی ترقی کدا اے‘ جدوں ادارے مضبوط ہوندے نیں تے اوس ملک دے کھیڈ نُوں وی فروغ ملدا اے۔ وزیراعظم نے کہیا کہ کرونا وباء دوران تعاون کرن اُتے چین دے شکر گزار آں‘ چینی صدر دی کرپشن خلاف جنت توں متاثر آں۔ وزیراعظم نے کہیا کہ میں اپنے آندے دورا چین دا منتظر آں پاکستان تے چین وچکار نیڑلے تعلقات دا چاہیوان آں‘ چین دا وڈی گنتی وچ لوکاں نُوں غربت توں کڈھنا اِک بہت وڈا کارناما اے‘ اسیں سی پیک منصوبیاں دا جایزا لین لئی اعلا سطح کمیٹی قایم کیتی اے۔ چینی صدر دی کرپشن دے خلاف جنگ نال پاکستان متاثر ہویا‘ ساڈے چین دے نال تعلقات انتہائی قریبی تے گوڑھے نیں‘ بھاویں کنا وی دباء ہووے چین نال اپنے تعلقات نُوں کدی گھٹ نہیں کراں گے‘ چینی صدر نُوں دور حاضر دا عظیم انسان تے سیاستدان سمجھدا آں‘ اگلے ہفتے گوادر وچ سی پیک منصوبے دا جایزا لین لئی گوادر دا دورا کراں گا تے اوتھے چینی کارکناں نال گل تے ملاقات کراں گا۔ پاکستان دی اقتصادی ترقی لئی سی پیک منصوبا نہایت ای اہمیت دا حامل اے تے اگلا مرحلا حوصلا افزا اے‘ سی پیک بیلٹ روڈ اقدام کلیدی منصوبا اے۔ بھاویں کنا وی تباء ہووے چین نال تعلقات تبدیل نہیں کر سکدے۔ وزیراعظم نے فیر کہیا کہ جے افغانستان وچ خانا جنگی ہوندی اے تے پاکستان ایہدے توں سبھ توں ودھ متاثر ہووے گا‘ افغانستان توں امریکا دے انخلاء نُوں طالبان نے فتھ مِتھ دِتا۔