کرونادیاں تباہ کاریاں عالمی معیشت نُوں نقصان پہنچایا: چودھری شجاعت ……٭ رویل خبر٭

لاہور (نمایندا رویل) پاکستان مسلم لیگ دے صدر تے پچھلے وزیراعظم چودھری شجاعت حسین‘ سپیکر پنجاب اسمبلی چودھری پرویز الٰہی تے وفاقی وزیر برائے آبی وسائل مونس الٰہی نے وڈی عید اُتے اپنے پیغامات وچ کہیا اے کہ کرونا دی چوتھی لہر خطرناک ثابت ہو سکدی اے‘ ایس وباء توں نجات تے اپنیاں آندیاں نسلاں نُوں محفوظ رکھن لئی سانوں اللہ تعالیٰ دے حضور سجدا ریز ہو کے دُعا منگنی چاہیدی اے تے ساریاں نُوں ویکسین لگوانی چاہیدی اے۔ چودھری شجاعت حسین نے کہیا کہ عالمی برادری نُوں ایس خطرناک روگ توں نجات دلوان لئی ترقی پذیر ملکاں دا ساتھ دینا چاہیدا اے‘ انسانیت دا تقاضا ایہو اے کہ ایس اوکھے ویلے وچ سارے انسان اپنے نال نال دوجیاں دا وی خیال رکھن۔