kraamaat@gmail.com
+ +92 333-430-6384


بزدار نُوں پکی پکائی ملی پر ہضم نہیں ہو رہی، مون سون دی پہلی بارش وچ لاہور دا حشر ساریاں نے ویکھ لیا:: عظمیٰ بخاری ……٭ رویل خبر٭


نمائندا رویل July 21, 2021


لاہور (نیوز ڈیسک) مسلم لیگ ن پنجاب دی ترجمان عظمیٰ بخاری دا کہنا اے کہ مون سون دی پہلی بارش چ لاہور دا کیہ حشر ہویا اوہ ساریاں نے ویکھ لیا۔ اوہناں نے کہیا کہ نکاس آب وچ مددگار ثابت ہون والیاں لائناں کوڑے نال بھریاں ہوئیاں نیں‘ نالیاں دی صفائی نہ ہون نال بارشاں وچ ایہ کوڑا کرکٹ گلیاں تے سڑکاں اُتے آ جاندا اے‘ پنجاب دے 45 وزیر یاں ریموٹ کنٹرول وزیر اعلا کسے ڈرین یاں نالے دی صفائی کرواندے نظر آئے؟۔ عظمیٰ بخاری نے کہیا کہ شہباز شریف نُوں لانگ بوٹ دے طعنے دیندے سن‘ اج ایہناں نُوں تے شہباز شریف دا شکریا ادا کرنا چاہیدا اے‘ پکی پکائی مِل گئی اے پر ہضم نہیں ہو رہی‘ لکشمی چوک جہڑا 70 سال توں ہر مون سون وچ ڈُب جاندا سی ہُن اوتھے اِک قطرا پانی وی جمع نہیں ہوندا‘ ایہدا کریڈٹ شہباز شریف نُوں جاندا اے۔ عظمیٰ بخاری نے کہیا کہ ایل ڈبلیو سی دے مطابق اوہناں نے آلائشاں لئی لاہور وچ 15 لکھ شاپر ونڈے‘ ضلعی انتظامیا دے مطابق لاہور وچ 17 لکھ توں ودھ قربانی دے جنور آئے نیں‘ کیہ 2 لکھ جنوراں دیاں ناڑاں لاہور دے گلی محلیاں وچ بدبو نہیں کھلارن گیاں؟