احمد نعیم ارشد ہوراں دی شاعری

ہَسنا گناہ اے , ہَسانا وی گناہ اے

کنگ, تونبا, ونجھلی وجانا وی گناہ اے

بَھر بَھر بوتلاں چ ویچنا ثواب اے

پینا وی گناہ اے , پلانا وی گناہ اے

سنیائے اوتھے بس ہاں کری جانی اے

سُنیائے دل دی سنانا وی گناہ اے

ہتھاں وِچ ہَتھ پا کے پِھرنا فضول اے

سینے نال سجناں نُوں لانا وی گناہ اے

اپنی لکیر وچ کِھچ کے لیانا اے

کِسے دی لکیر وَل جانا وی گناہ اے

گل سُن! جِتھے بھیڈ چال دا رواج اے

بندا اوتھے بندے نُوں بنانا وی گناہ اے

عید اُتے اِک بی بی ٹی وی اُتے آن کے

آکھدی سی چُمنا چمانا وی گناہ اے

سُنیائے ہئولی ہئولی نِما نِما بول کے

سُتے ہوئے لوکاں نُوں جگانا وی گناہ اے

توبہ توبہ , توبہ توبہ ,توبہ توبہ کری جا

گیت کوئی سننا تے گانا وی گناہ اے

٭٭٭٭٭