kraamaat@gmail.com
+ +92 333-430-6384


موبائل دے غلط استعمال دی وجھا توں جنسی جرماں وچ وادھا ہو یا، پچھلیاں حکومتاں نِکّے کماں دیاں وی بہت مشہور کردیاں سن،تعلیم بارے کجھ نہیں سوچیا: عمران خان دا  ایجوکیشن کنونشن نال خطاب……٭رویل خبر٭


نمائندا رویل August 26, 2021


لاہور (نیوز ڈیسک) وزیراعظم عمران خان نے کہیا اے کہ موبائل دے غلط استعمال دی وجھا توں جنسی جرماں وچ وادھا ہورہیا اے۔ لاہور وچ ایجوکیشن کنونشن نال خطاب دے دوران وزیراعظم نے کہیا کہ بدقسمتی نال ماضی وچ تعلیم اُتے کسے نے زور ای نہیں دِتا‘ ماضی دی کسے حکومت نے نہیں سوچیا کہ مستقبل دا کیہ بنے گا‘ ماضی وچ ڈیم بنان تے بہتر گورننس سسٹم اُتے وی توجا نہیں دِتی گئی‘ ماضی وچ اِک نصاب لیاندا جانا چاہیدا سی پر انج نہیں کیتا گیا‘ پچھلیاں حکومتاں چھوٹے کماں دیاں وی بہت مشہور کردیاں سن‘ اوہ کم گھٹ تے رؤلا بُہتا پاندیاں سن‘ ہمیشا سوچدا آں کہ تُسیں اوہ کم کر رہے او جہڑا کوئی صوبا نہیں کر رہیا‘ پنجاب وچ موجود ا حکومت نے اوہ کم کیتے نیں جہڑے کسے نے نہیں کیتے‘ عثمان بزدار چنگے کم کر رہے نیں پر لوکاں نُوں پتا ای نہیں لگدا‘ اوہ چنگے کماں وچ اپنا ناں لیانا ای نہیں چاہندے‘ عثمان بزدار چُپ چپیتے کم تے لوک تنقید کردے رہندے نیں۔ وزیراعظم نے کہیا کہ جدوں اسیں ازاد ہوئے ساں تے سانوں سبھ توں ودھ تعلیم اُتے توجا دینی چاہیدی سی‘ دنیا وچ جہناں قوماں نے ترقی کیتی اے اوتھے اِک نظام تعلیم اے‘ مغرب تعلیم وچ ساڈے توں اگے نکل گیا اے‘ انگریزاں نے اِک خا ص کلاس بنان لئی مختلف نظام تعلیم رائج کیتے‘ جدوں میں باہر گیا تے مینوں محسوس ہویا کہ مینوں اپنے کلچر تے دین توں دور کیتا گیا‘ انگریزاں دا سسٹم تبدیل کرن دی بجائے اسیں ایہنوں ہور ودھایا‘ ملک وچ اِک چھوٹے جہے طبقے لئی انگلش میڈیم تے باقی لوکاں لئی اردو میڈیم اے‘ انگلش میڈیم سسٹم ذہنی غلامی لیایا‘ انگلش میڈیم سسٹم نے سانوں مغربی کلچر دا غلام بنا دِتا۔ وزیراعظم نے کہیا کہ مینار پاکستان وچ جو ہویا اوہدے توں تکلیف ہوئی‘ جو حرکتاں ہو رہیاں نیں ایہ ساڈے کلچر تے دین دا حصا نہیں اے‘ ماضی وچ ملک وچ سوانیاں دی جہڑی عزت تے تکریم کیتی جاندی سی انجدی دنیا وچ کدھرے نہیں سی‘ مغرب وچ سوانی دی اینی عزت نہیں جنی اسیں ایتھے کردے آں‘ اسیں جہڑی تباہی ویکھ رہے آں ایہدی وڈی وجھا ایہ اے کہ ساڈے بالاں دی صحیح تربیت نہیں ہو رہی۔ موبائل دے غلط استعمال دی وجھا توں جنسی جرماں وچ وادھا ہو رہیا اے‘ سانوں اپنے بالاں نُوں سیرت النبیؐ توں اگاہی دین دی ضرورت اے۔ وزیراعظم نے مینار پاکستان واقع نُوں انتہائی شرمناک تے تکلیف دہ متھدیاں ہویاں کہیا کہ مناسب تربیت نہ ہون دے کارن نویں نسل تباہی ول جا رہی اے۔ وزیراعظم نے مینار پاکستان وچ سوانی نال بدسلوکی دے واقع دا نوٹس لیندیاں ہویاں ویلے سر پولیس رسپانس نہ ہون اُتے سخت ناراضگی دا اظہار کردیاں ہویاں آئی جی پنجاب نُوں ہدایت دِتی اے کہ ایہو جہے واقعات دے سدباب لئی فوری اقدامات کیتے جان۔ ایس توں پہلاں شیخوپورا وچ رکھ جھوک سمارٹ جنگل دے افتتاح دے موقع اُتے خطاب دوران وزیراعظم نے کہیا کہ میں ملک وچ آپ جنگلات نُو ں تباہ ہوندیاں ویکھیا اے‘ لاہور وچ ماحولیات دی تباہی ویکھی‘ اج لاہور وچ ماحولیاتی تبدیلی پاروں پانی دا لیول تھلے جا رہیا اے۔ راوی ریور پراجیکٹ لاہور ای نہیں‘ پاکستان لئی وی اہم اے‘ آلودگی نال بالاں تے وڈیریاں دیاں جاناں خطرے وچ نیں‘ سمارٹ لاک ڈاؤن دے دے بعد ہُن سمارٹ فارسٹ بن رہیا اے‘ ٹیکنالوجی دے استعمال نال بوٹیاں دی ودھوتری دی وی مانیٹر کر سکاں گے‘ سینسرز نال پتا لگ جاوے گا کتھے رُکھ وڈھیا جا رہیا اے۔ راوی ریور ورگے منصوبے عزم نال بندے نیں‘ ایہ پاکستان دے مستقبل لئی اہم منصوبا اے‘ سانوں پہلے دن توں پتا سی کہ ایہ انتہائی مشکل منصوبا اے‘ جے ایہ منصوبا مشکل نہ ہوندا تے پرویز مشرف دے دور وچ بن جاندا یاں ایہدے بعد پنجاب سپیڈ شہباز شریف نے بنا لینا سی پر اوہ نہیں بنا سکے‘ ایس منصوبے نال ساڈی معیشت وچ 40 ارب ڈالر شامل ہون گے تے ایہدے نال 10 لکھ لوکاں نُوں روزگار دے موقع ملن گے‘ جے اسیں اپنیاں آن والیاں نسلاں لئی بہتر پاکستان چھڈنا اے تے سانوں پاکستان نُوں سرسبز بنانا پوے گا‘ اسیں شجرکاری وچ ٹیکنالوجی نُوں لے کے آ رہے آں جہدے انتہائی مثبت اثرات مرتب ہون گے۔ وزیراعظم عمران خان نے شیخوپورا دے رکھ جھوک جنگل وچ بوٹا لا کے پاکستان دے پہلے سمارٹ جنگل دا افتاح کیتا۔ رکھ جھوک جنگل راوی اربن ڈویلپمنٹ اتھارٹی دا اِک اہم منصوبا اے جہڑا 24000 کنال زمین اُتے محیط اے۔ ایہ پاکستان دا پہلا سمارٹ جنگل ہووے گا جہڑا سمارٹ سینسرز تے نگرانی دے نظام نال لیس ہووے گا۔ ایس موقع اُتے ٹیکنالوجی دی وڈی کمپنی ہواوے نُوں ایس منصوبے دا سمارٹ شرالت دار بنان لئی مفاہمتی یادداشت اُتے دستخط وی کیتے گئے۔ وزیراعظم نے کہیا کہ میں وزیر اعلا پنجاب‘ اوہناں دی ٹیم تے ساری ایڈمنسٹریشن نُوں خاص طور اُتے عمران امین نُوں خراج تحسین پیش کرنا چاہندا آں کیوں جے ایہ پاکستان دی تواریخ دا اِک بہت وڈا منصوبا اے‘ اسیں اوس راہ اُتے نکلے ہوئے آں تے اوہ کم کرن جا رہے آں جہدے اُتے انشاء اللہ سیاستدان تے ایڈمنسٹریٹرز وی ویکھن گے‘ ایہ ممکن اے کہ تُسیں اِک نواں ماڈرن شہر وی بنا سکدے او‘ سبھ توں وڈی گل ایہ اے کہ اسیں اپنیاں آن والیاں نسلاں لئی جہڑی شجرکاری دا اغاز کیتا اے تُسیں اوہناں نُوں دَس سکدے او کہ جے اسیں اپنیاں نسلاں لئی بہترین پاکستان چھڈنا اے تے ایہد یلئی بہت ضروری اے کہ ساری قوم رَل کے اپنے اللہ دے ساہمنے ایہ عہد کر لو ے کہ اسیں اپنے ملک نُوں سر سبز کرنا اے‘ جہڑیاں اللہ تعالیٰ نے سانوں اینیاں نعمتاں بخشیاں نیں اسیں اوہناں نعمتاں دا شکر ایہناں دا دھیان رکھ کے کر سکدے آں۔ اوہناں نے کہیا کہ ساڈے 3 وڈے مسئلے نیں سبھ توں وڈا مسئلا پانی دا اے سگوں دنیا وچ پانی دا مسئلا آن والا اے‘ ایہدے لئی رُکھ اُگانے ضروری نیں‘ گلوبل وارمنگ پاکستان نُوں بُہتا متاثر کر رہی اے‘ پاکستان اوہناں دس ملکاں وچ شامل اے جہڑے گلوبل وارمنگ وچ سبھ توں ودھ متاثر ہون گے‘ ساڈے دریاواں وچ پانی گھٹ ہوندا جاوے گا‘ گلیشیئر تیزی نال پنگھڑ رہے نیں‘ شہراں وچ ماحولیاتی آلودگی اے‘ سیوریج دا پانی بغیر ٹریٹمنٹ دے دریاواں وچ سُٹ رہے آں ایہدے پین والے پانی اُتے اثرات نیں۔ اوہناں نے کہیا کہ سمارٹ فاریسٹ وچ پہلی وار پلان کر کے اِک کروڑ رُکھ اُگائے جان گے جہدے نال ایہ پورا جنگل بن جاوے گا‘ ایہدے نال لاہور دے شہریاں نُوں سیاحت لئی وی تھاں میسر آئے گی‘ راوی ریور منصوبے دے تحت 3 بیراجز بنن گے جتھے پانی نُوں روکیا جاوے گا جہدے نال لاہور دا زمینی پانی اُتے آنا شروع ہو جاوے گا‘ سیوریج دے پانی نُوں ٹریٹمنٹس پلانٹاں راہیں صاف کر کے دریاواں وچ سُٹاں گے۔