بھارت سی پیک دے خلاف سازشاں وچ،ٹی ٹی پی نُوں پاکستان وچ دہشتگری نہیں کرن دیاں  گے:شیخ رشید……٭رویل خبر٭

اسلام آباد (نیوز ڈیسک) وزیر داخلا شیخ رشید نے انکشاف کیتا اے کہ بھارت سی پیک دے خلاف سازشاں وچ ملوث اے۔ افغانستان وچ سارے بھارتی سفارتخانے پاکستان دے خلاف استعمال ہو رہے سن۔ بھارت نُوں افغانستان وچ مونہ دی کھانی پئی‘ افغان طالبان نے وعدا کیتا اے کہ افغان دھرتی پاکستان سنے کسے دے خلاف استعمال نہیں ہووے گی‘ کالعدم ٹی ٹی پی نُوں پاکستان وچ دہشتگردی دی اجازت نہیں دواں گے۔ عمران خان ٹکا کے 5 سال پورے کرن گے صر ف مولانا فضل الرحمان نُوں افغانستان دی صورتحال دا ادراک اے‘ پی ڈی ایم دے باقی کھڈاری انڈر نائنٹین نیں۔ اسلام آباد وچ میڈیا نا ل گلبات کردیاں ہویاں وزیر داخلا نے کہیا کہ دستانے پائے ہوئے ایہو جہے ہتھ نیں جہڑے سی پیک نُوں نقصان پہنچانا چاہند ے نیں‘ بھارت سی پیک دے خلاف سازشاں وچ ملوث اے‘ سی پیک اُتے کم کرن والے سارے چینیاں نُوں سیکیورٹی فراہم کیتی جاوے گی‘ ایس ویلے 131 کمپنیاں پاکستان دی ترقی وچ ہتھ ونڈا رہیاں نیں‘ بھارت دے افغانستان وچ سارے قونصلیٹ پاکستان دے خلاف استعمال ہو رہے سن پر بھارت نُوں افغانستان وچ مونہ دی کھانی پئی‘ بھارت وچ جہڑی صف ماتم وچھی اے اوہناں دی شکست چہریاں توں عیاں اے تے دنیا نُوں وی ایہدا احساس اے‘ بھارت نے پاکستان وچ دہشتگردی کروائی‘ افغانستان دی صورتحال اُتے بھارت دا پریشان ہونا لازمی امر اے۔ وزیر داخلا نے کہیا کہ افغانستان وچ کوئی خونریزی نہیں ہوئی‘پی ڈی ایم نُوں مفت مشورا اے کہ خطے وچ ڈومیسٹک سیاست دی گنجایش نہیں ہے‘ پاکستان خطے دا اہم ملک بنن جا رہیا اے‘ مولانا فضل الرحمان سمجھدار بندے نیں‘ خطے وچ سمجھن کیہ ہون جا رہیا اے‘ اپوزیشن ٹائیں ٹائیں فش اے کتھے متحد ہون جا رہی اے؟ اپوزیشن 10 سال پچھے دی سوچ رکھدی اے‘ وزیراعظم 10 سال اگے دا سوچ کے چلدے نیں‘ جلسے جلوساں نال حکومت نہیں جان والی‘ پی ڈیا یم وچ ہور طاقت نہیں‘ ایہناں نُوں الیکشن دی تیاری کرنی چاہیدی اے‘ صرف مولانا فضل الرحمان نُوں افغانستان دی صورتحال دا پتا اے پر پی ڈی ایم دے باقی کھڈاری انڈر نائنٹین نیں۔ وزیر داخلا نے کہیا کہ عمران خان دا جملا ایبسلوٹلی ناٹ پوری دنیا وچ مشہور ہویا۔ ساڈا کم صرف افغانستان توں آن والیاں نُوں طور خم تک پہنچانا اے چمن دے راہ تجار ت وچ 65 فیصد وادھا ہویا اے۔ افغانستان دا مسئلا اوہناں دا اندرونی اے اسیں مداخلت نہیں کراں گے‘ اوہ جانن تے افغان لوکائی جانے۔