مدینہ دی ریاست دے اصولاں اُتے چلاں گے تے ملک ترقی کرے گا: وزیراعظم عمران خان۔۔۔٭رویل خبر٭

مدینہ دی ریاست دے اصولاں اُتے چلاں گے تے ملک ترقی کرے گا: وزیراعظم عمران خان۔۔۔٭رویل خبر٭ اسلام آباد (نیوز ڈیسک) وزیراعظم عمران خان نے کہیا اے کہ کمزور انسان انصاف تے طاقتور این آر او چاہندا اے‘ مدینہ دی ریاست دے اصولاں اُتے چلاں گے تے ملک ترقی کرے گا۔ میں جہناں نُوں رول ماڈل سمجھدا سی اوہناں دی زندگی نُوں نیڑیوں ویکھیا‘ ساڈے رول ماڈلز تے سیدھے راہ وچ زمین اسما ن دا فرق سی۔ ایہناں خیالاں دا اظہار وزیراعظم عمران خان نے اسلام آباد وچ دہاکا رحمت اللعالمینؐ دی مرکزی تقریب نال خطاب وچ کیتا۔ اوہناں دا کہنا سی کہ دہاکا رحمت اللعالمینؐ دیاں تقریباں دا اغاز کر کے فخر محسوس کر رہیا آں۔ نبی کریمؐ ساری انسانیت لئی رحمت بن کے آئے‘ جہڑا معاشرا حضرت محمدؐ دے اصولاں اُتے عمل کرے گا اوہ اُتے چلا جاوے گا۔ تقریب وچ ڈاکٹر عبدالقدیر خان لئی فاتحہ خوانی وی کیتی گئی۔ وزیراعظم دا کہنا سی کہ میں ہمیشا اپنی زندگی دا جایزا لیندا آں‘ موجودا دور وچ نوجوان نسل انتہائی دباء دا شکار اے۔ دنیا وچ سبھ توں وڈا انقلاب 625 توں 635 دے وچکار آیا۔ چھوٹے ساں تے سون توں پہلے ایہو دُعا کردے ساں کہ اللہ سانوں سدھے راہ اُتے لا۔ اللہ سانوں نبی کریمؐ دی زندگی توں سکھن دا حکم دیندا اے‘ اِک راہ ناجایز دولت کمان دا اے تے دوجا راہ نبی کریمؐ دی سیرت دا اے۔ کمزور انسان انصاف تے طاقتور این آر او چاہندا اے۔ وزیراعظم نے کہیا کہ جدوں اقتدار وچ آیا تے آئی جی توں پُچھیا کہ کہڑے جرماں وچ وادھا ہو رہیا اے‘ تے اوہناں نے دَسیا کہ جنسی جرماں وچ وادھا ہو رہیا اے‘ بالاں دے نال زیادتی معاشرے وچ رَچ چکی اے۔ جنسی جرماں نال سارے معاشرے نُوں مقابلا کرنا پیندا اے۔ جہڑے معاشرے دیاں اخلاقیات تباہ ہو جان اوہ کدی اُتے نہیں جا سکدا۔ عمران خان دا کہنا سی کہ ساڈے لوک مغربی معاشرے نُوں جاندے نہیں نیں ایتھے اِک طبقا ایہو جہیا اے جہڑا اپنے آپ نُوں لبرل کہندا اے‘ میں 18 سال دی عمر وچ جدوں برطانیا گیا تے اوتھے بہت تبدیلی آ رہی سی‘ میں اپنیاں ا کھاں نال مغربی ملکاں وچ تبدیلی آندی ویکھی اے‘ مغربی ملکاں وچ فحاشی ودھی تے ایہدا اثر اوہناں دے خاندانی سسٹم اُتے پیا‘ اج مغربی ملکاں وچ طلاقاں دی شرح 70 فیصد ودھ چُکی اے۔ طلاق دا سبھ توں بُرا اثر بالاں اُتے پیندا اے۔ مغرب وچ اِک ویاہ دی اوسط عمر ڈھائی سال اے‘ مغربی ملکاں دا خاندانی نظام ساڈے ساہمنے تباہ ہویا‘ تے مغربی کلچر اپناون نال ساڈا معاشرا کویں بچ سکدا اے؟۔ وزیراعظم دا ہور کہنا سی کہ 1970 دے بعد جو ہاردا اے اوہ کہندا اے کہ الیکشن وچ دھاندلی ہوئی‘ اپوزیشن والے دھاندلی کردے نیں‘ ایس لئی نظام نُوں ٹھیک نہیں کرنا چاہندے‘ ساڈی پہلی حکومت اے جہڑی الیکشن ریفارمز بارے گل کر رہی اے۔ وزیراعظم نے کہیا کہ حکومت نہیں معاشرا کرپشن دے خلاف لڑدا اے‘ اوہ معاشرا کدی ترقی نہیں کر سکدا جتھے کرپشن ختم نہ ہووے۔