آئی ایم ایف ولوں خطرے دی گھنٹی وجا دِتی، بیروزگاری تے مہنگائی ودھن دا دھڑکو……٭رویل خبر٭

اسلام آبا د(نیوز ڈیسک) عالمی مالیاتی ادارے (آئی ایم ایف) نے ورلڈ اکنامک آؤٹ لُک رپورٹ 2021جاری کردیاں ہویاں پاکستان لئی خطرے دی گھنٹی وجا دِتی اے جہدے مطابق بیروزگاری وچ وادھا تے کرنٹ اکاؤنٹ وچ کسارا ودھن دی وی پیشن گوئی کر دِتی گئی اے۔ انٹرنیشنل مانیٹری فنڈ (آئی ایم ایف) ولوں رپورٹ جاری کیتی گئی اے جہدے وچ دَسیا گیا کہ مہنگائی وچ ہور وادھے دا دھڑکو اے‘ موجودا مالی سال پاکستان دی معاشی شرح نمو 4 فیصد رہن دا امکان اے جد کہ حکومت 5 فیصد معاشی ترقی لئی پُرعزم اے۔ رپورٹ وچ ہور دَسیا گیا کہ ورلڈ بینک دے 3.4 فیصد دے تخمینے دے مطابق پاکستان وچ پچھلے مالی ورھے بیروزگاری وچ وادھا ہویا جد کہ بیروزگاری دی شرح 4.5 فیصد توں ودھ کے 5 فیصد ہو گئی۔ رپورٹ وچ کہیا گیا کہ موجودا مالی سال بیروزگاری گھٹ ہو کے 4.8 فیصد اُتے آ ن دا امکان اے جد کہ پاکستان وچ ایس سال مہنگائی 9.2 فیصد تک اپڑ سکدی اے۔