ٹی 20 ورلڈ کپ: قومی سکواڈ بابر اعظم دی قیادت و چ دبئی اپڑ گیا……٭رویل خبر٭

لاہور (نمایندا رویل) جت دا عزم لئے ورلڈ ٹی 20 لئی قومی ٹی 20 سکواڈ بابراعظم دی قیادت وچ دبئی اپڑ گیا‘ پی آئی اے دی خصوصی اُڈان پاکستان کرکٹ ٹیم نُوں لے کے دبئی روانا ہوئی‘ ٹی 20 ورلڈ کپ وچ رلت لئی پی آئی اے دی خصوصی چارٹر اُڈان 203PK راہیں ٹیم دے ارکان روانا ہوئے۔ لاہور ائر پورٹ اُتے پی آئی اے ولوں خصوصی انتظامات کیتے گئے سن‘ لاہور ائر پورٹ اُتے پی آئی اے دے ڈسٹرکٹ منیجر ڈاکٹر عبدالمقدم خان تے سٹیشن منیجر علی عباس شا ن نے ٹیم نُوں الوداع کیتا۔ سکواڈ دبئی وچ اِک دن دا اکلاپا مکمل کر ے گا‘ سکواڈ وچ ٹیم دے 15 کھڈاری‘ 3 ٹریول ریزرو تے سپورٹ سٹاف دے ارکان شامل نیں۔ ایس توں پہلاں قومی ٹیم دے کپتان بابراعظم نے ورلڈ کپ لئی امارات روانا ہوندیاں ہویاں قوم لئی جارم سنیہے وچ کہیا اے کہ پاکستان ٹیم اُتے یقین رکھو‘ شائقین دی سپورٹ سبھ توں ودھ کے اے‘ ٹیم دے نال کھلوو تے ایہدے لئی دُعا کرو۔