عمران خان دی پُٹھی گنتی شروع ہو چکی:پاکستان پیپلز پارٹی دے چیئرمین بلاول بھٹو زرداری ……٭رویل خبر٭

کراچی (نیوز ڈیسک) پاکستان پیپلز پارٹی دے چیئرمین بلاول بھٹو زرداری نے وی حکومت دے خلاف پورے ملک وچ مظاہریاں دا اعلان کردیاں ہویاں کہیا کہ ملک اُتے تبدیلی نہیں تباہی سرکار مسلط اے‘ کٹھ پتلی دا ہر وعدا جھوٹھ نکلیا‘ لوکائی لئی جِینا مرنا مشکل ہو گیا‘ عمران خان دی پُٹھی گنتی شروع ہو چکی اے جد کہ حکومت نُوں نَسا کے ای دَم لواں گے‘ اگلی واری جیالیاں دی ہووے گی۔ باغ جناح کراچی وچ پاکستان پیپلز پارٹی دے جلسے نال خطاب کردیاں ہویاں چیئرمین پی پی بلاول بھٹو زرداری نے کہیا عمران خان کہندے سن مہنگائی ہووے تے سمجھو وزیراعظم چور ا‘ لوکائی پُچھی اے اِک کروڑ نوکریاں تے 50 لکھ گھر کتھے نیں؟ ملک وچ تواریخی بیروزگاری تے مہنگائیا ے جد کہ اج ملک وچ عمران خان دی تبدیلی نہیں تباہی اے۔ بلاول نے ہور کہیا کہ اج ملک وچ پیپلز پارٹی دی حکومت دی ضرورت اے‘ ساڈی حکومت لوکائی دوست ہووے گی‘ غریب نہیں سگوں غربت دا خاتما کراں گے‘ پیپلز پارٹی حکومت وچ آن دے پہلے دن تنخاہواں وچ وادھا کرے گی۔ جلسے نال خطاب کردیاں ہویاں اوہناں نے کہیا کہ عمران خان نے جتھے ہتھ پایا اوتھے مہنگائی‘ پیپلز پارٹی کلّی جماعت اے جہڑی اپنا وعدا پورا کردی اے‘ اقتدر سنبھالدیاں ای نوجواناں نُوں روزگار دواں گے‘ عمران خان نُوں گھر گھلن تک احتجاج جاری رکھاں گے جد کہ حکومت دی پُٹھی گنتی شروع ہو چکی اے۔ بلاول نے کہیا جنا چور ایس ویلے ساڈا وزیراعظم اے اینا چور وزیراعظم پاکستان دی تواریخ وچ نہیں لنگھیا۔ ایس توں پہلاں باغ جناح وچ پریس کانفرنس نال خطاب کردیاں ہویاں وزیر اعلا سندھ سیدمراد علی شاہ نے کہیا کہ 18 اکتوبر دے دُکھانت دی تحقیقا ت لئی جو ڈیشل کمیشن دی تشکیل لئی جہڑے شواہد چاہید ے سن‘ اوہ دُکھانت دے فور ی بعد مٹا دِتے گئے‘ جہدی وجھا توں تحقیقات مکمل نہیں ہو سکیاں۔ اوہناں نے کہیا کہ 18 اکتوبر دے دے شہیداں نُوں کلّا نہیں چھڈاں گے۔ شہداء جمہوریت دا قافلا آصف علی زرداری تے بلاول بھٹو دی قیادت وچ اپنی منزل تک پہنچے گا۔ ڈی جی آئی ایس آئی دا معاملا وزیراعظم تے فوج دا اے۔ ایہدے وچ ساڈا کوئی کردار نہیں اے۔ اوہ ایس مسئلے نُوں حل کرن گے‘ بلوچستان وچ وزیرا علا دی تبدیلی جے جمہوری تے آئینی انداز وچ ہووے گی تے سارے ایہنوں منن گے۔ جمہوری حکومت نُوں ہر ویلے خطرا رہندا اے‘ وفاق تے ہور صوبیاں نُوں خطرا ہووے گا تے ویکھاں گے اوہ کویں حالات دا مقابلا کردے نیں۔ عمران خان دے آن نال آٹا مہنگا ہو گیا اے۔ اسیں قیمتاں نُوں کنٹرول کرن دی کوشش کر رہے آں۔ وزیر اعلا سندھ نے کہیا کہ شہید بے نظیر بھٹو 18 اکتوبر 2007 نُوں جلا وطنی ختم کر کے وطن واپس آئے‘ اوہناں دا تواریخی استقبال کیتا گیا۔ 12 وجے رات جدوں قافلا کار ساز دے مقام اُتے اپڑیا تے اوتھے 2 دھماکے ہوئے‘ جہدے وچ 180 کارکن شہید تے 500 توں ودھ زخمی ہو گئے۔ شہید بی بی اگلے دن لواحقین دے گھر گئے تے زخمیاں دی عیاست کیتی۔ اج دا جلسا شہداء کار ساز دی یاد وچ منعقد کیتا گیا اے۔ اج ملک و چ مہنگائی دا طوفان اے۔ مہنگائی توں لوکائی تنگ آ گئی اے۔ عمران خان تے پی ٹی آئی نے لوکائی نُوں مہنگائی وچ مدھ دِتا اے۔ اج 17 اکتوبر نُوں تبدیلی دا سفر شروع ہو رہیا اے۔ ہُن لوکائی دی حکمرانی تے جمہوریت دی اُچیرتا ہووے گی۔ غریباں نُوں جین دا حق ملے گا۔ بھٹو خاندان نے بڑیاں قربانیاں دِتیاں نیں۔ آپ تکلیفاں برداشت کیتیاں‘ جاناں دا نذرانا دِتا‘ اپنی حکومت دی پرواہ نہیں کیتی۔ اوہناں نے کہیا کہ شہید بی بی نے شہداء نُوں انصاف دِتا۔ کار ساز دُکھانت دے کجھ شہداء دی دفنائی گڑھی خدا بخش وچ کیتی گئی‘ اِک سوال دے جواب وچ اوہناں نے کہیا کہ اوس ویلے دی حکومت نے کار ساز دُکھانت دے شواہد مٹا دِتا‘ جہدی وجھا توں تحقیقات متاثر ہوئیاں۔ اوہناں نے کہیا کہ پیپلز پارٹی نے ہمیشا کوشش کیتی کہ کار ساز دُکھانت دے شہداء نُوں انصاف ملے۔ پیپلز پارٹی نے وفاقی وچ آ کے ملک وچ آئین بحال کیتا۔ بلوچستان نُوں آغاز حقوق پیکج دِتا۔ 18 ویں ترمیم پارلیمنٹ توں منظور کروائی‘ لوکائی پیپلز پارٹی اُتے بھروسا کردی اے‘ اگے وی ساڈ ی حکومت ہووے گی‘ بلاول بھٹو لوکائی لئی نجات دہندا نیں۔