kraamaat@gmail.com
+ +92 333-430-6384


مریم نواز اداریاں خلاف بیان دے کے اپنے پیراں اُتے کہاڑی مار رہے نیں: شیخ رشید……٭رویل خبر٭


نمائندا رویل October 19, 2021


اسلام آباد (نیوز ڈیسک) وزیر داخلا شیخ رشید احمد نے کہیا اے کہ مریم نواز اپنے پیراں اُتے کہاڑی مار رہے نیں۔ (ن) لیگ دی پچھلی حکومت جان وچ وی اوہناں دا کردار سی۔ پی ڈی ایم مریا ہویا سیاسی ہاتھی اے۔ کھوہ دے ڈڈوآں دی سیاست دا دور ختم ہو چکیا اے۔عمران خان 5 سال پورے کرن گے۔ اسلام آباد وچ میڈیا نال گل بات کردیاں ہویاں شیخ رشید احمد نے کہیا کہ ملک لُٹن والے مونہ صاف کر کے فیر وکٹری دا نشان بناندے نیں۔ بینک ڈکیٹ وی وکٹری دا نشان بنا کے جیلاں توں باہر آندے نیں۔ شیخ رشید احمد نے کہیا کہ اوہ مندے نیں کہ مہنگائی اے‘ قرضے وی نیں‘ کرونا دا وی ساہمنا رہیا‘ وزیراعظم عمرنا خان مہنگائی وچ کمی لیان دی پوری کوشش کر رہے نیں۔ کابینا اجلاس وچ آٹا‘ دال‘ چاؤل تے دوائیاں اُتے گل کردا آں۔ عالمی بحران وچ پاکستان ڈیفالٹ ہون توں بچیا۔ شیخ رشید احمد نے کہیا کہ نویں انتخابات وچ اک سال ای رہ گیا اے۔ عمران خان اپنے 5 سال پورے کرے گا۔ مریم نواز اداریاں خلاف جہڑے بیان دے رہے نیں اوہ اپنے پیراں اُتے کہاڑی مار رہے نیں۔ اوہ اپنے لئی آپ ٹویا پٹ رہے نیں۔ (ن) لیگ دی پچھلی حکومت جان وچ وی اوہناں دا کردار سی۔ شیخ رشید نے کہیا کہ عمران خان دی خُش قسمتی اے کہ اوہناں نوں ایس قسم دی اپوزیشن ملی۔ پی ڈی ایم بیتے دسمبر توں کہندی سی ہُن ایہ دسمبر وی آگیا۔ ڈاکٹر عبدالقدیر خان دا مقبرا اُساراں گے‘ اوہناں دی دھی نے مقبرے دا ڈیزاین فراہم کیتااے۔ وزیر داخلا شیخ رشید احمد نے افغانستان لئی 31 دسمبر تک ویزا فیس معاف کرن دا اعلان کردیاں ہویاں کہیا کہ افغانستان دا ویزا آن ارائیول دی سروس شروع کر دِتی اے۔ شیخ رشید احمد نے معمولی جرماں وچ ملوث قیدیاں دی سزا وچ 3 مہینے دی کمی دا وی اعلان کیتا۔