جشن عید میلاد النبیؐ: ا قیدیاں دی 90 دناں دی سزا معاف،وزارت داخلا نے صوبائی سیکرٹریز داخلا نوں سزا معافی دا نوٹیفکیشن گھلا دِتا……٭رویل خبر٭

اسلام آباد (نیوز ڈیسک) جشن عید میلاد النبی ؐ دے موقعے اُتے حکومت نے ملک بھر وچ قیدیاں دی 90 دناں دی سزا معافی دا اعلان کر دِتا۔ وزارت داخلا نے صوبیاں دے سیکرٹریز داخلا نوں سزا معافی دا نوٹیفکیشن گھلا دِتا۔ وزارت داخلا ولوں جاری نوٹیفکیشن مطابق عمر قید دی دوتہائی سزا کٹن والے قیدیاں نوں 90 دناں دی سزا معافی وی مل سکے گی۔ عمر قید دی اک تہائی سزا کٹن والے 65 سال توں ودھ مرد تے 60 سال توں وڈیاں سوانی قیدیاں اُتے وی نوٹیفیکیشن دا اطلاق ہووے گا۔ بچیاں نال سزا کٹن والیاں سوانی قیدیاں سوائے سنگین کرایم‘ دہشتگردی آرڈیننس 1999 اُتے وی نوٹیفیکیشن دا اطلاق ہووے گا۔ اک تہائی سزا مکمل کرن والے 18 سال توں گھٹ عمر نابالغ بچیاں اُتے وی 90 دن معافی دا نوٹیفیکیشن دا اطلاق ہووے گا۔ وزیراعظم دیاں ہدایتاں اُتے صدر پاکستان نے سزا معافی دا نوٹیفیکیشن جاری کرن دیاں ہدایتاں کیتیاں سن۔