kraamaat@gmail.com
+ +92 333-430-6384


ظالم حکمراناں نُوں گھر گھلن لئی لوکائی گھراں توں نکلے: رانا ثناء اللہ ……٭رویل خبر٭


نمائندا رویل October 23, 2021


اسلام آباد (نیوز ڈیسک) نان سٹاپ مہنگائی دے خلاف پاکستان ڈیمو کریٹک موومنٹ سڑکاں اُتے آ گئی۔ لاہور‘ قصور تے مری سنے ہور شہراں وچ وی میدان لا لیا جد کہ نون لیگ نے مہنگائی دے خلاف احتجاج دا شیڈول جاری کر دِتا اے۔ نون لیگ ولوں خانیوال تے سیالکوٹ وچ کل میدان لگے گا‘ گوجرانوالا‘ گجرات‘ ساہیاول تے ملتان وچ 24 اکتوبر نُوں مظاہرے ہون گے۔ مسلم لیگ (ن) پنجاب دے صدر رانا ثناء اللہ نے پنجاب وچ مہنگائی دے خلاف عوامی احتجاجی مظاہریاں دا شیڈول جاری کیتا۔ ڈاکٹرز‘ لیبر تے تاجر سنے ساریاں تنظیماں تے ونگز نُوں ہدایتاں جاری کر دِتیاں گئیاں۔ جہدے وچ کہیا گیا کہ سارے مظاہریاں وچ عوامی رلت نُوں یقینی تے حکومتی نا اہلی‘ کرپشن‘ مہنگائی اُتے لوکائی د ے نال شانا بشانا کھلوتا جاوے۔ لیگی آگو رانا ثناء اللہ نے کہیا کہ عمران نیازی حکومت توں نجات نال ای مہنگائی‘ بیروزگاری تے معاشی تباہی توں قوم نُوں نجات مل سکدی اے‘ ایہ ظالم‘ کرپٹ تے نالائق حکومت جاوے تے فیر ای لوکائی نُوں مہنگائی توں ریلیف ملے گا‘ ظالم حکمراناں نُوں گھر گھلن لئی لوکائی گھراں توں نکلے‘ ایس ڈِگدی ہوئی کندھ نُوں آخری دھکا مارو۔ ایس توں وکھ قائد حزب اختلاف تے مسلم لیگ (ن) دے صدر شہباز شریف نے لوکائی توں مہنگائی دے خلاف ملک گیر احتجاجی مظاہریاں وچ بھرویں رلت دی اپیل کر دِتی۔ اوہناں نے پارٹی نُوں جاری ہدایتاں وچ کہیا کہ مرکز‘ صوبے تے ضلعیاں وچ پارٹی آگو شہری تے کاروباری تنظیماں تے عوامی انجمناں دے نال اشتراک عمل نُوں یقینی بنان۔ شہباز شریف نے کہیا کہ مہنگائی‘ بیروزگاری‘ معاشی تباہی دے خلاف احتجاجی مظاہریاں وچ لوکائی بھرویں رلت کر کے حکومت اُتے عدم اعتماد کرے‘ حکومت نُوں ہور ویلا دین دا مطلب لوکائی دی ہور تباہی‘ ہور مہنگائی‘ ہور بیروزگاری اے۔ دوجے پاسے وفاقی ادارا شماریات نے مہنگائی بارے ہفتا وار رپورٹ جاری کردیاں ہویاں دَسیا اے کہ ملک وچ مہنگائی ہور ودھ گئی۔ ادارا شماریات دی رپورٹ دے مطابق ملک وچ مہنگائی وچ ہور 1.38 فیصد وادھا ہو گیا اے جہدے نتیجے وچ مہنگائی دی مجموعی شرح 14.48 فیصد ہو گئیا ے۔ سبھ توں گھٹ آمدن والے بندیاں لئی مہنگائی 15.72 فیصد اُتے پہنچ گئی۔ حالیا اِک ہفتے وچ 29 شیواں دیاں قیمتاں وچ وادھا ہویا۔ اِک ہفتے وچ ٹماٹر اوسط 27 رُپئے 25 پیسے فی کلو مہنگا ہویا جہد ے نال ٹماٹر دی اوسط قیمت 93 پیسے 77 پیسے فی کلو ہو گئی۔ ایل پی جی دا گھریلو سلنڈر 154 رُپئے 15 پیسے‘ گھیو 6 رُپئے 67 پیسے فی کلو مہنگا ہویا تے اِک ہفتے وچ کھنڈ اوسط 42 پیسے فی کلو مہنگی ہوئی۔ حایا ہفتے پٹرولیم مصنوعات تے تھوم‘ آلو‘ آنڈے‘ دُدھ‘ دہی‘ مٹن‘ دال ماش وی مہنگے ہوئے۔ اِک ہفتے وچ 7 شیواں دیاں قیمتاں وچ کمی ہوئی۔ زندا مرغی اوسط فی کلو 6 رُپئے 34 پیسے‘ آٹے دا 20 کلو دا تھیلا 2 رُپئے 19 پیسے سستا ہویا۔ اِک ہفتے وچ دال چنا‘ دال مونگ‘ پیاز تے گُڑ ُے سستے ہوئے۔ ادارا شماریات دے مطابق حالیا ہفتے 15 شیواں دیاں قیمتاں و چ استحکام رہیا۔ ایس توں وکھ سونے دی فی تولا قیمت وچ ہور 1400 رُپئے دا وادھا ہو گیا اے جہدے بعد نویں قیمت 1 لکھ 25 ہزار 600 فی تولا ہو گئی اے جد کہ ڈالر وی 174 رُپئے دا ہو گیا اے۔