kraamaat@gmail.com
+ +92 333-430-6384


ہائے!ڈاکٹر اجمل نیازی۔۔۔۔ دلیر تے دیس نال محبت کرن والے لکھاری ۔۔۔۔٭رویل لیکھ٭


ڈاکٹر عرفان پاشا October 28, 2021


پروفیسرڈاکٹرمحمد اجمل خان نیازی اک بہوں پکھی ہستی سن جہناں نے علم وادب دے ہر شعبے وچ اپنی خدمات سرانجام دتیاں۔اوہ اکو ویلے شاعر،ادیب، سفرناما نگار،کالم نگار،محقق ،پارکھ،تحقیقی مقالہ جات دے نگران ،اردو تے پنجابی ٹی وی تے ریڈیو پروگراماں دے مجمان اَتے استاد سن۔آپ جی دا تعلق نیازی قبیلے نال سی اورا وہ ہمیش اس گل تے فخر محسوس کردے سن۔ایسے مناسبت نال اوہ معروف شاعرمنیر نیازی نوں ہمیشا"میرے قبیلے دا سردار" کہہ کے بلاندے سن۔ڈاکٹر اجمل نیازی دی پیدایش پاکستان بنن توں اک ورھا اگدوں موسیٰ خیل ضلع میانوالی وچ ہوئی۔ مڈھلی تعلیم میانوالی تے فیرلاہورتوں حاصل کی ۔گورنمنٹ کالج لاہورنال اوہناں نوں عشق سی۔ا وہ ایس ادارے دے پڑھیاروی رہے تے استادوی۔ ایس توںاڈ اوہ رسالہ"راوی"دے مدیردی حیثیت نال وی اپنی ذمہ داریاں انجام دیندے رہے۔ ملازمت دے سلسلے و چ گورڈن کالج راولپنڈی،گورنمنٹ کالج میانوالی،گورنمنٹ کالج لاہور،ایف سی کالج لہور، اتے گورنمنٹ کالج ٹاؤن شپ،لہور وچ تعینات رہے۔لہور وچ وحدت روڈ تے واقع سرکاری کالونی دے کوارٹر نمبر D-7 وچ ساری زندگی لنگھادتی۔اوہناں دیاں لکھیاں کتاباں وچ ’’مندر میں محراب‘‘، ’’جل تھل‘‘ ، محمددین فوق‘‘، "بے نیازیاں" ، ’’بازگشت‘‘ ، "محبت اور جنگ" ،’’"مجموعہ مقالات"تے"پچھلے پہر کی سرگوشی"وغیرہ شامل نیں۔ اوہناںدے ہزاراں طالب علم وی اوہناں دی زندہ میراث نیں۔18اکتوبر2021نوں دھرتی دا ایہ سپتر تے سوجھوان دوسال بیماری نال مردانا وار لڑن توں مگروںجنتاں نوں سدھار گیا۔ڈاکٹر اجمل نیازی دی رحلت نال اردو ادب دی دنیا اک قد آور ادیب تے اک سچے محب وطن توں محروم ہو گئی اے۔اوہناں دی وفات دے حوالے نال متحرک علمی و ادبی تنظیم آفاق ادب، پاکستان نے اوہناں لئی اک تعزیتی ریفرنس دا اہتمام کیتا۔ایہ تقریب اکادمی ادبیات پاکستان دے لہوروالے صوبائی دفتر وچ منعقد ہوئی جس دی صدارت پروفیسر ڈاکٹر سعادت سعید نے کیتی جد کہ مہمانان خاص وچ ڈاکٹر کنول فیروز، ڈاکٹر ہارون قادر، ڈاکٹر عبدالکریم خالد، ڈاکٹر نواز حسن زیدی،معروف شاعر ناصر بشیر، ڈاکٹر عرفان پاشا،محمد اقبال،سجاد جعفری،علی راج،اسٹیفن گل تے ڈاکٹرایم ابرار شامل سن۔نظامت دے فرائض آفاق ادب دی روح رواں ڈاکٹر عابدہ بتول نے ادا کیتے۔تلاوت و نعت دی سعادت علی راج نے حاصل کیتی ۔حاضرین وچ عظمیٰ اجمل خان،طاہرہ بتول،آشر حنیف،سلمان صدیق،اقبال بخاری،محمد جمیل تے علم و ادب سے تعلق رکھنے والی کئی ہوراچیچیاں ہستیاں شامل سن۔تقریب نوں خطاب کردے ہوئیاں مینیجر فیصل بنک محمد اقبال نے کہیا کہ ڈاکٹر اجمل نیازی نے ہمیشہ کلمہ حق کہیا تے حکومتی جبر اورپابندیوںنوںہس کے قبول کیا۔ ڈاکٹر عرفان پاشا نے کہیا کہ ڈاکٹر اجمل نیازی صاحب اسلوب ادیب سن تے تحریر و تقریر وچ تراکیب سازی تے رعایت لفظی دے ماہر سن۔اوہ اک دلبر تے دلیرآدمی سن۔ اوہ جس محفل وچ موجود ہوندے اس نوں ہاسیاں دی پھل جھڑی بنا دیندے۔اوہ ہرتقریب وچ بیٹھے ہوئے کجھ نہ کجھ نوٹس لکھدے رہندے سن تاں جے کہ اوس بارے وچ مگروں کالم یا کوئی ہور تحریر لکھدیاں اہم گلاں ذہن چوں اوجھل نہ ہو جان۔اوہناں نے اپنی زندگی نوںمعاشرے دے بوہتے لوکاں دے برعکس درندگی اور شرمندگی ہون توں بچا لیاتے اوہنوں تابندگی بنا دتا۔اوہناں دی شخصیت محنت اور محبت دا پیکر سی۔ناصر بشیر نے کہیا کہ ڈاکٹر اجمل نیازی دا اوہناں دے نال اخباراں وچ بے حد حسین وقت گزریااے تے نیازی صاحب اپنے بچیاںنوں اوہناندے کول چھڈجاندے سن جتھے اوہ ااوہناں نوںکمپنی وی دیندے تے کھانا وی کھلاندے جہدے نال ا وہ خوش ہوندے۔ حتیٰ کہ اپنے والددے جنازے تے وی نیازی صاحب دے بیٹے ااوہناںویلیاں نوں یاد کر کے جذباتی ہو رہے سن۔ سجاد جعفری نے کہیا کہ ڈاکٹر اجمل نیازی اوہناں نوں ہمیشا اپنے نال رکھدے تے مختلف تقریباں وچ لے جاندے۔ ایس طرحاں اوہناں نے اوہناں دی شعری ،نثری تے تقریری تربیت کیتی۔اکادمی ادبیات کے مہتمم محمد جمیل نے کہیا کہ ڈاکٹر اجمل نیازی نال اوہناں دے دوستانہ تعلقات چالی سالاں تے محیط نیں جنہاں دا ہن اختتام ہوگیااے پر اوہ نیازی صاحب نوں ہمیشہ مس کردے نیں۔ڈاکٹر نوازحسن زیدی نے اوہناندے نال اپنے ایف سی کالج دے زمانے دے مشاہدات تے تجربیاںنوں بیان کردے ہوئیاں کہیاکہ ڈاکٹر اجمل نیازی دوستی تے دشمنی دے معاملات وچ کھرے اورانتہائی صاف گو آدمی سن۔ڈاکٹر عبدالکریم خالدنے کہیا کہ ڈاکٹر اجمل نیازی نال اک واری اوہناں دی کجھ کھیہ بکھیہ ہو گئی تے نیازی صاحب خد اوہناں نوں منان اوہناندے گھراپڑ گئے تے اوس توں بعد اوہناندی دوستی گھریلو تعلقات وچ بدل گئی۔اوہناں دی شخصیت معصومیت تے حیرت نال عبارت سی۔ڈاکٹرہارون قادرنے کہیاکہ ڈاکٹر اجمل نیازی اوہناندے بہت بے تکلف دوست سن تے اوہ اوہناں نال اپنے تمام معاملات سانجھے کردے سن۔صدارتی خطبہ دیندے ہوئیاں ڈاکٹرسعادت سعید نے کہیا کہ ڈاکٹر اجمل نیازی دا سفرنامہ’’ مندر میں محراب‘‘ اوہناں دی حب الوطنی دی زندہ مثال اے جس وچ اوہناں نے دورہ ہندوستان نوں مسلم ہندوستان دی بازیافت قرا دین دی کوشش کہیا اے۔اوہ اک سچے پاکستانی تے نڈراور دبنگ ادیب سن جہناں نےاپنے قلم دے ذریعے اوہ کام کیتا جو بڑے بڑے جرنیل نہیں کرپائے۔ علی راج نے ڈاکٹر اجمل نیازی دی شان وچ منظوم خراج عقیدت وی پیش کیتا۔تقریب دے اختتام تے ڈاکٹر اجمل نیازی ہوراں دی مغفرت، بلندی درجات اورشفاعت رسول کریم لئی دعا کیتی گئی تے حاضرین نوں چاہ پیش کیتی گئی۔