بالی ووڈ سپر سٹار رجنی کانت ہسپتال وچ داخل،رجنی کانت فلم انڈسٹری وچ آن توں پہلے بس کنڈیکٹر سن……٭رویل خبر٭

ممبئی (شوبز نیوز) بالی ووڈ تے تامل فلماں دے سپر سٹار رجنی کانت چنئی دے اِک ہسپتال وچ داخل ہو گئے۔ بھارتی میڈیا رپورٹاں دے مطابق رجنی کانت نُوں پچھلے دن معمول دے طبی معاینے لئی چنئی دے ہسپتال وچ داخل کیتا گیا۔ دوجے پاسے رجنی کانت دے پی آر ہینڈل دے ترجمان نے دَسیا کہ ’رجنی کانت معمول دے چیک اپ لئی چنئی دے ہسپتال وچ داخل ہوئے نیں تے اوہ بڑی چھیتی واپس آ جان گے۔ ایہدے علاوا ہسپتال انتظامیا ولوں حالے تک رجنی کانت دی صحت دے حوالے توں کوئی بیان ساہمنے نہیں آیا اے۔ واضح رہوے کہ بھارت دی راجدھانی نویں دِلی چ پچھلے دن 67 ویں نیشنل فلم ایوارڈ دی تقریب دا انعقاد کیتا گیا۔ ایس تقریب وچ رجنی کانت نُوں دادا صاحب پھالکے ایوارڈ نال سرفراز کیتا گیا۔ نیشنل فلم ایوارڈ دے فنکشن وچ رجنی کانت نُوں خراج تحسین پیش کیتا گیا۔ تجربا کار اداکار رجنی کانت‘ جہڑے فلم انڈسٹری وچ آن توں پہلے بس کنڈیکٹر دے طور اُتے کم کردے سن‘ اوہناں نے دادا صاحب پھالکے ایوارڈ اپنے پرانے بس ڈرائیو دوست دے ناں کیتا جہناں نے اوہناں نُوں فلماں وچ شامل ہون دا مشورا دِتا سی۔