kraamaat@gmail.com
+ +92 333-430-6384


دنیا نُوں افغان لوکائی دی مدد لئی اگے آنا پوے گا،بھارت نے  غلط تے جعلی پروپیگنڈے کیتے:چودھری فواد حسین ……٭رویل خبر٭


نمائندا رویل November 13, 2021


اسلام آباد (نیوز ڈیسک) وفاقی وزیر اطلاعات و نشریات چودھری فواد حسین نے کہیا اے کہ بھارت نے پاکستان دے خلاف کئی معاملیاں اُتے غلط تے جعلی پروپیگنڈے کیتے نیں‘ کئی دوجے ملک وی ایہو جہے مسئلیاں نال دوچار نیں‘ فیک نیوز دے خاتمے لئی عالمی سطح اُتے کوششاں ہونیاں چاہیدیاں نیں‘ سانوں عالمی کوششاں راہیں سوشل میڈیا ریگولیشنز تے میڈیا دے تحفظ نُوں یقینی بنانا پوے گا‘ افغانستان وچ عدم استحکام دی صورتحال نال پورا پاکستان متاثر ہوندا اے‘ اسیں افغانستان وچ جامع حکومت چاہندے آں‘ دوجے پاسے سانوں افغانستان وچ انسانی المیے اُتے ہرکھ اے‘ افغانستا ن 40 ملین آبادی دا اِک وڈا ملک اے‘ افغانستان دے بارے وچ اکانومسٹ دی حالیا رپورٹ پریشان کن اے‘ معصوم بالاں نُوں خوراک لئی ویچیا جا رہیا اے‘ دنیا نُوں افغان لوکائی دی مدد لئی اگے آنا پوے گا‘ فیک نیوزی دنیا دے کئی ملکاں دا مسئلا نیں‘ اسیں چاہندے آں سفارتخانیاں نُوں جان والیاں معلومات بلکل واضح ہون۔ اوہ مکتلف ملکاں دے سفارتخانیاں دے پریس اتاشیاں نال گلبات کر رہے سن۔ چودھری فواد حسین نے کہیا کہ افغاسنتان وچ عدم استحکام دی صورتحال نال پورا پاکستان متاثر ہوندا اے‘ ایس ویلے افغان لوکائی غربت دی زندگی لنگھارہی اے‘ اکانومسٹ نے اپنی حالیا رپورٹ وچ دَسیا اے کہ افغانستان وچ 23 ملین بندے خوراک دی کمی دا شکار نیں‘ افغانستان وچ غربت دی صورتحال دی وجھا توں انسانی المیا پیدا ہون دا دھڑکُو اے‘ ایہو جہیاں ویڈیو ساہمنے آ رہیاں نیں جہناں وچ دَسیا جا رہیا اے کہ معصوم بالاں نُوں خوراک لئی ویچیا جا رہیا اے۔ اوہناں نے کہیا کہ دنیا نُوں افغان لوکائی دی مدد لئی اگے آنا پوے گا۔ وفاقی وزیر اطلاعات نے کہیا کہ اسیں افغانستان وچ جامع حکومت چاہندے آں پر دوجے پاسوں سانوں افغانستان وچ انسانی المیے اُتے ہرکھ اے۔ وفاقی وزیر اطلاعات نے کہیا کہ قبائلی علاقیاں وچ اسیں لمے عرصے تک جنگ لڑی‘ جدوں اسیں اپریشن دا اغاز کیتا تے 40 توں 45 ہزار پاکستانی افغانستان چلے گئے‘ ایہ سارے لوک پاکستانی نیں‘ ایہناں نُوں واپسی دا موقع دینا چاہیدا اے۔ فیک نیوز تے جعلی خبراں دا ذکر کردیاں ہویاں فواد چودھری نے کہیا کہ ٹیکنالوجی دے بُہتے استعمال نال فیک نیوز تے جعلی نیوز دے مسئلے نے جنم لیا۔ وفاقی وزیر اطلاعات نے امریکا دے پچھلے صدر اوباما دا حوالا دیندیاں ہویاں کہیا کہ امریکا دے پچھلے صدر اوباما نے 2003 وچ کہیا سی کہ جدید دور وچ حکومتاں دا سبھ توں وڈا چیلنج فلو آف انفارمیشن نُوں منظم کرنا اے۔ اوہناں نے کہیا کہ فلو آف انفارمیشن دا چیلنج سار ے ملکاں نُوں درپیش اے۔ سارے ملک قانون سازی راہیں ایس مسئلے نال نبڑن دی کوشش کر رہے نیں۔ اوہناں نے کہیا کہ یورپی یونین‘ امریکا تے برطانیا وی فیک نیوز تے جعلی پروپیگنڈے اُتے قابو پان لئی اقدامات چُک رہے نیں۔ چودھری فواد حسین نے کہیا کہ پاکستان دے میڈیا دا شمار ترقی پذیر ملکاں دے میڈیا و چ اِک وڈے میڈیا وجوں ہوندا اے۔ پاکستان وچ 200 توں ودھ ٹی وی چینلز‘ 2 ہزار توں ودھ ویب سائٹس تے یوٹیوب چینلز کم کر رہے نیں‘ ایتھے 1500 توں ودھ روز وار اخبار تے سینکڑے ہفتا وار تے مہینا وار اخبارات چھپدے نیں‘ تقریبن 48 عالمی نیوزی چینلز پاکستان وچ کم کر رہے نیں۔ وفاقی وزیر اطلاعات نے کہیا کہ اسیں نویں قانون سازی لیان دی کوشش کر رہے آں‘ پی ایم ڈی اے دا آئیڈیا تجویز کرن دا مقصد سارے قوانین نُوں اکٹھا کرنا سی‘ ریگولیشن دے موجودا میکنزم دے تحت ادھ درجن توں ودھ فرسودا قوانین موجود نیں جہڑے جدید دور دے تقاضیاں اُتے پورا نہیں اُتردے۔