پاکستان سنے دنیا دے 22 ملین بالاں نُوں سبھ توں تیزی نال کھلرن والی وباء خسرے دا ساہمنا اے:‘ ورلڈ ہیلتھ آرگنائزیشن……٭رویل خبر٭

لاہور (نیوز ڈیسک) پاکستان وچ ڈینگی دے بعد بالاں وچ خسرے دی وباء پھُٹن دا دھڑکُو‘ ورلڈ ہیلتھ آرگنائزیشن نے خبردار کر دِتا۔ عالمی ادارا صحت نے خبردار کیتا اے کہ کرونا تے ڈینگی دے بعد پاکستان سنے دنیا دے 22 ملین بالاں نُوں سبھ توں تیزی نال کھلرن والی وباء خسرے دا ساہمنا اے کیوں جے کرونا دی وجھا توں پاکستان‘ نائیجریا‘ کانگو‘ ایتھوپیا‘ بھارت‘ انڈونیشیا‘ انگولا‘ فلپائن‘ برازیل تے افغانستان وچ کروڑاں بالاں نُوں ویلے سر خسرے دی پہلی ویکسین نہیں لائی جا سکی سی۔ ایس خطرے دا ساہمنا امریکا ورگے ترقی یافتا ملک نُوں وی اے جتھے 2019 وچ وبائی خسرے دے ریکارڈ کیسز ساہمنے آئے سن۔ یاد رہوے 1992 دے بعد امریکا وچ پہلی وار اینے کیسز ساہمنے آئے نیں۔ 2020 وچ صرف 70 فیصد بالاں نُوں ویکسین دی دوجی خوراک لگی سی۔ عالمی ادارا صحت دے ڈائریکٹر برائے امیونائزیشن ڈاکٹر کیٹ اوبرائن نے موجودا صورتحال نُوں طوفان توں پہلاں خاموشی متھدیاں ہویاں خبردار کیتا اے کہ پوری دنیا وڈے بحران لئی تیار رہوے۔ اوہناں نے کہیا کہ کرونا دی ویکسینیشن ضروری سی پر ایہنوں دوجیاں خطرناک بیماریاں دی قیمت اُتے ترجیح نہ دِتی جاوے۔