سمندر پار پاکستانیا ں نوں ووٹ دا حق ۔۔۔۔۔٭رویل لیکھ٭

اک دن پہلاں منظور ہون والے قانون مطابق سمندر پار وسدے پاکستانیاں نوں ووٹ دین دا حق مل گیا اے۔ بل پاس کروان لئی حکومت حدوں ودھ اُتاولی رہی۔ اپوزیشن دے اعتراض وی ساہمنے آئے پر حکومت اپنی آئی اُتے تُلی ہوئی سی تے اوہنے اِکو دن وچ 33 قانون منظور کروا کے اک نویں روایت دا مڈھ رکھیا جہدے وچ اک قانون سمندر پار پاکستانیاں نوں ووٹ دا حق دین بارے وی سی۔

ایس ویلے سمندر پار وسن والے پاکستانیاں دی گنتی 90 لکھ دسی جاندی اے۔ ایہ گنتی پاکستان دی کل 22 کروڑ آبادی دا 4فیصد دے لگ بھگ بن جاندی اے۔ پردیس جان دی روایت تاں بہت پرانی اے پر 1970 دے دہاکے جدوں ذوالفقار علی بھٹو دی حکومت نے پاسپورٹ بنوان دا کم سوکھا کر دتا تاں لوک دھڑا دھڑ بنوا کے بدیساں دی دولت وچ اپنا حِصا لین لئی باہر جان لگ پئے۔ ایہدے نال ملک وچ خشحالی وی آئی تے لوکاں دے رویے وی بدلن لگ پئے۔ ایس ویلے ساڈے کلچر وچ بہت ساریاں تبدیلیاں تے خرابیاں دی اک وڈی وجھا بدیس گئے پاکستانیاں دا مال گھلن وی اے۔

بدیس وسدے پاکستانیاں دی وڈی گنتی دا مستقبل اوتھے ای جڑیا ہویا اے۔ بہت سارے اوتھوں دے شہری بن چکے نیں‘ باقیاں دی اولاد بن جاوے گی۔ سوائے اپنے مسلمان تے عرب بھراواں دے‘ یورپی دیساں دا رویّاساڈے کلچر بارے کھلا ڈُلا ہوندا سی۔ البتا جدوں ساڈے لوک اپنا کلچر وی نال ای لے گئے تے اوتھوں دے لوکاں اُتے وی ایہی کلچر ٹھوکن دے جتن کیتے تاں اوہناں نوں پریشانی ضرور ہوئی۔ ایس ویلے فرانس تے ہور کئی دیساں اندر حجاب سمیت‘ مسلماناں‘ خاص کر پاکستانیاں بارے سختی کیتی جا رہی اے جہدا کارن ساڈے لوک آپ نیں۔

بدیساں نوں جان والیاں وچ جتھے وڈے ڈاکٹر تے انجینئر وی شامل ہوندے نیں‘ اوتھے زیادا تر عام پرایمری تے مڈل پاس مزدور تے مستری ٹایپ لوک وی گئے جو ادھ ہنر مند نیں پر اوتھے اجہی افرادی قوت دی تھوڑ پاروں اپنا رزق بھال لیندے نیں۔ ایہ ادھ پڑھ لوک زیادا سیاسی شعور دے مالک نہیں ہوندے۔

تحریک انصاف دا شروع توں ای خیال اے کہ اوہدے ووٹ بینک دا اک حِصّا ایہی ادھ پڑھ لوک نیں جہڑے نرا نعرا سُن کے ووٹ دے دیندے نیں۔ ایہناں پرواسیاں نے پاکستان وچ لوکائی اُتے تحریک انصاف دی تبدیلی تے مہنگائی دے رنگ نہیں ویکھے ایس لئی اوہ ووٹ پکے نیں۔

البتا پارٹی دے مفاد لئی تے اپنا بینک ووٹ ودھان لئی اجہے قانون بنانا کسے طرحاں وی مناسب نہیں۔ کمپیوٹر تے انٹرنیٹ راہیں ووٹ دا حق اجے پاکستان وسدے پاکستانیاں نوں وی نہیں ملیا جو باہری دیساں والیاں نوں دے دتا گیا اے۔ قانون مستقل تے ہر اک لئی ہونے چاہیدے نیں‘ کسے خاص ڈھانی تے ووٹ بینک لئی نہیں۔

(شکریے نال روزوار "لوکائی ")