kraamaat@gmail.com
+ +92 333-430-6384


بالاں دا جوش‘ پرویز خٹک داگریبان -----٭رویل کالم٭


جمیل احمد پال December 07, 2021


حکمران ٹولے وچ اک توں ودھ کے اک نورادستیاب اے۔ ایہناں وچوں پرویز خٹک دا ناں اُگھا اے۔ سیالکوٹ واقعے دے بعد جتھے پوری قوم دا سر شرم نال نیواں اے تے وڈے وڈے شرپسنداں دی مجال نہیں کہ اوہ اسلام دے ناں اُتے ایس ات گردی دا دفاع کرنپرویز خٹک ہوراں اپنا فرمان دے کے دس دتا اے کہ عقل اک ایسی ربی نعمت اے جہڑی ہر اک نوں عطا نہیں کیتی گئی۔ جناب ہوراں فرمایا کہ سیالکوٹ وچ بچے جوش وچ آ گئے سن پر ایہدا ایہ مطلب نہیں کہ دیس وچ سبھ کجھ وگڑ چُکیا اے۔ اوہناں مطابق دین دی گل اُتے تے میں وی جوش وچ آ کے غلط کم کر سکنا آں۔ جناب ہوراں مزید فرمایا کہ میڈیا لوکاں نوں کیوں نہیں سمجھاندا کہ ہر گل دی ذمے واری حکومت اُتے نہیں پائی جا سکدی۔ اوہناں مطابق میڈیا صرف پیسے کماندا اے۔

رب دی شان اے کہ اوہ نکے بالاں نوں عمر ودھن دے نال نال عقل توں نوازدا اے تے فیر عمر ودھیری ہون دے بعد جہدی چاہندا اےعقل کھوہ وی لیندا اے۔ ایس کھُہائی دا نہ تے متعلقا بندے نوں پتا ہوندا اے تے نہ ای کسے ہور نوں پر گل کرن دے نال سبھ نوں چانن ہو جاندا اے۔ پرویز خٹک ہوراں وی بول کے اپنے بارے دس دتا اے۔

اوہناں دے بقول میڈیا صرف پیسے کماندا اے۔ ایہو جہیا اک بیان ایہ وی ہو سکدا اے کہ پرویز خٹک ورگے سیاستدان وی صرف پیسا ای کماندے نیں۔ میڈیا بارے گل تاں ثابت نہیں پر خٹک ہوراں دی پارٹی دے حوالے نال بے شمار سکینڈل ساہمنے آ چکے نیں تے پارٹی دے اقتدار توں لتھن دی دیر اےامکان اے کہ فیر نیب ہووے گا تے پرویز خٹک جہے سیاستداناں دی دھوتی۔

دنیا دا نظام جوش نہیںہوش نال چلدا اے۔ جس مذہب دی گل پرویز خٹک کر رہے نیںاوہدے وچ تاں سوائے معقولیت دےہور کسے گل دا درس نہیں دتا گیا۔ زندگی دے ہر معاملے وچ اعتدالمعقولیت تے ہوش نال کم لین دی تلقین کیتی گئی اے۔ رب دے پیارے نبیؐ دے منن والے تاں سوچ سمجھ کے ہر کم کردے نیں کیوں جے اوہناں نوں تلقین ای ایس گل دی کیتی گئی اے۔ بغیر سوچے سمجھے کھوہ وچ چھال مار دینا تاں اسلام نہیںجہدا پرویز خٹک ہوری اعتراف فرما رہے نیں۔بہتر اے اوہ ایہ وی دس دین کے جے حکومت ہر گل دی ذمے وار نہیں تاں اوہدی ذمے واری کیہ کیہ اے؟ لاء اینڈ آرڈر دا مسئلا جے حکومت دا نہیں تاں ہور کہدا اے؟

اج سیالکوٹ دے بچے جوش وچ آ گئے نیںکل کسے ہور شہر دے بچے جوش وچ آ کے کوئی ہور کارا کر سکدے نیں۔ ایہ وی ہو سکدا اے کہ کسے معاملے پاروں بچے جوش وچ آ کے خٹک ہوراں دیاں ڈھائی پسلیاں برابر کر دینیاں اوہناں دے گریبان تیکر اپڑ جاون۔

افسوس دی گل اے کہ ساڈے بچے ای نہیںکجھ سینئرسیاستداناں نوں وی ہوش تے عقل دا سبق سکھاون دی لوڑ اے۔