kraamaat@gmail.com
+ +92 333-430-6384


پورے دیس وچ گیس دا بحران  کرڑا ہو گیا،پنجاب دی ٹیکسٹائل انڈسٹری بند ہون دا دھڑکُو……٭رویل خبر٭


نمائندا رویل December 20, 2021


اسلام آباد/لاہور/ کراچی/ پشاور/ کوئٹہ (نیوز ڈیسک) کراچی‘ لاہور‘ اسلا م آباد‘ راولپنڈی‘ کوئٹہ‘ پشاور‘ ملتا ن تے حیدر آباد سنے پورے ملک وچ گیس دا بحران ہور کرڑا ہو گیا‘ جہڑی گیس 24 گھنٹیاں وچ کجھ دیر لئی آندی سی ہُن اوہ وی آنا بند ہو گئی جہدے کارن لوکاں نُوں سخت اوکڑاں دا ساہمنا اے‘ گیس دی بندش دے کارن لکڑاں تے گیس دے سلنڈر دیاں قیمتاں اسمان اُتے چلیاں گئیاں‘ لایناں وچ لگ کے لوک سلنڈر بھروان اُتے مجبور ہو گئے۔ تفصیلات دے مطابق کراچی دے اکثر علاقیاں واچ گیس دی ڈاڈھی تھوڑ پید ا ہو گئی‘ لیاری وچ پچھلے 4 مینیاں توں گیس ناپید اے جہدی وجھا توں علاقا مکین لکڑیاں بالن اُتے مجبور نیں‘ علاقے والیاں نے دَسیا کہ دھووں نال کھنگ تے اکھاں دے رو گ ودھ گئے نیں۔ سردی دی شدت وچ ہور وادھے دے بعد لاہور دے کئی علاقیاں وچ گیس پریشر وچ ڈاڈھی کمی ہو گئی‘ کجھ علاقیاں وچ گیس بلکل غایب ہو گئی اے۔ وسیلیاں دے مطابق شہر وچ گیس شارٹ فال 15 سو ملین کیوبک فٹ توں ودھ گیا اے۔ آل پاکستان ٹیکسٹائل ملز ایسوسی ایشن دے عہدیداراں دے مطابق حکومت نے گیس سپلائی برقرار رکھن دا وعدا کیتا سی پر ہُن تک پورا نہیں کیتا‘ اِک دو دن وچ جے گیس فراہمی نُوں یقینی نہ بنای اگیا تے اوہ اپنیاں مِلاں بند کر کے سڑکاں اُتے آ جان گے۔ راولپندی اسلام آباد وچ وی گیس بحران شدت اختیار کر گیا اے‘ گھریلو صارفین گیس دی تھوڑ توں پریشان‘ کھانا پکانا وی اوکھا ہو گیا۔ کوئٹہ وچ گیس پریشر وچ ڈاڈھی کمی دی وجھا توں شہری سخت پریشان وکھائی دِتے۔ پورے ملک وچ گیس دے ڈاڈھے بحران دے پیش نظر پورے پنجاب دی ٹیکسٹائل انڈسٹری بند ہون دا دھڑکُو پیدا ہو گیا۔ چیئرمین اپٹما رحیم دناصر دا کہنا سی کہ حکومت نے 6 ڈالر فی ایم ایم بی ٹی یو گیس دی یقین دہانی کروائی سی پر بعد وچ ٹیرف 19 ڈالر کرن دا کہیا جہدے اُتے وی تعاون لئی تیار ساں۔ رحیم ناصر نے دَسیا کہ وزیر توانائی حماد اظہر نال کیپٹو پاور پلانٹ توں نکل کے گرڈ نال منسلک ہون دی کمٹمنٹ نہیں کیتی سی‘ اوہناں دیاں 92 درخاستاں ونڈ کار کمپنیاں وچ کنکشنز لئی موجود نیں پر اج تک عمل نہیں ہویا۔