اوآئی سی کانفرنس

او آئی سی کانفرنس

اسلام آباد وچ ایس ویلے اسلامی دیساں دے نمایندیاں دی کانفرنس ہو رہی اے۔ 1974 دے بعد ایہ موقع اک واری فیر آیا اے۔ 55توں ودھ دیساں دے نمایندیاں وچ 20 وفداں دی وزیر گان‘ 10 دی نایب وزیرگان کر رہے نیں ایہناں وچ نکے تے وڈے سارے ای دیس شامل نیں۔ پی پنج دیساں دے نمایندیاں نوں وی اچیچی رلت دی دعوت دتی گئی اے۔ ایہناں وچ امریکا تے برطانیا توں وکھ جرمنی جاپان وی شامل نیں۔ اجلاس دا مقصد افغانستان توں امریکی نِکلنکاری دے بعد پیدا ہون والی صورتحال بارے غور کرنا اے۔

اسلام آباد وچ ایس ویلے ہنگامی صورتحال اے مختلف راہ بند کر دتے گئے نیں‘ میٹرو تے ہور ہائیکنگ ٹریکس وی بند نیں‘ ریڈ زون ول دے سارے داخلی تے خارجی رستے وی بند۔ کوئی کانفرنس ہووے‘ کسے حکمران دا دورا ہووے‘ لوکاں دے راہ بہرحال بند کیتے جاندے نیں۔

افغانستان وچ اقوام متحدا مطابق 38لکھ بندے خوراک دی کرڑی تھوڑ دا شکار نیں جد کہ ساڈھے چھے لکھ توں ودھ لوک بے گھر ہو چکے نیں۔شاہ محمود قریشی کنے سارے ٹی وی چینلز اُتے اپنے وچاراں دا اظہار کر چکے نیں تے وچارے افغانیاں دی مندحالی دے وین پاندے رہے نیں۔ کانفرنس دا مقصد وی دنیا دا دھیان افغانستان ول کرانا اے۔ساڈا موقف اے کہ افغانستان دی ماڑی حالت پاروں انسانی بحران جنم لے سکدا اے تے ایہ بحران نرا افغانستان ای نہیں‘ گوانڈھی دیساں ول وی جاوے گا۔

افغانستان دے گوانڈھی دیساں وچ پاکستان توں وکھ ایران‘ تاجکستان تے کجھ ہور دیس وی شامل نیں۔ اوہدی سرحد سوویت یونین (روس) تے چین نال وی رلدی اے۔ ایہناں وچوں کسے وی دیس نے افغانستان دے انسانی بحران واسطے اوہ اُتاولتا تے پریشانی نہیں وکھائی جنی پریشانی سانوں پئی ہوئی اے۔ ساڈے ولوں گھڑی مڑی دنیا نوں ایس ”انسانی بحران“ ول دھیانکاری کروائی جاندی اے تے شاید اسیں افغانیاں نالوں وی ودھ کے افغانستان واسطے پریشان آں۔ دنیا ساڈی پریشانی نوں دلچسپی نال ویکھدی اے تے ایہدے بارے کوئی اظہار کرن دی بجائے نرا سواد ماندی اے۔ عملی مدد بہت گھٹ ہو رہی اے۔

گوانڈھی دیس بارے ساڈی ساری پریشانی شاہ نالوں ودھ کے شاہ دی وفاداری ورگی اے۔ سانوں ایس انسانی بحران دی بہت پریشانی اے۔ ماڑِیاں رناں وانگ اسیں اپنے گھر نالوں ودھ کے گوانڈھیاں دے مسئلیاں وچ دلچسپیاں رکھدے آں۔ جتھے تک او آئی سی دا تعلق اے‘ اوہدی تواریخ وی نرا مذمت دیاں قرارداداں نال بھری پئی اے۔ کانفرنس مکن دے بعد‘ ”اوہ آئی سی اسلام آباد“ دا فقرا یقینن تواریخ دا حِصا بن جاوے گا۔