kraamaat@gmail.com
+ +92 333-430-6384


شوکت ترین دی صدارت ہیٹھ ایکنک اجلاس وچ کئی وڈے منصوبیاں دی منظور ی……٭رویل خبر٭


نمائندا رویل December 23, 2021


لاہور (نیوز ڈیسک) وزیراعظم عمران کان دے مشیر برائے امور خزانا شوکت ترین دی صدارت ہیٹھ ایکنک دا اہم اجلاس ہویا‘ جہدے وچ کئی وڈے منصوبیاں دی منظوری دِتی گئی۔ ایکنک اجلاس وچ سکھر‘ حیدر آباد موٹروے منصوبے‘ جنوبی پنجاب وچ غربت مکاؤ پروگرام‘ راولپنڈی رنگ روڈ تے ہور منصوبیاں دی منظوری دے دِتی گئی۔ ایکنک اجلاس دے اعلامیے دے مطابق شوکت ترین دی صدارت ہیٹھ ہوئے اجلاس وچ سکھر حیدر آباد موٹروے منصوبے دی منظوری دِتی گئی۔ اعلامیے مطابق منصوبے اُتے 191 ارب رُپئے لاگت آئے گی‘ 6 لائن اُتے مشٹۃ 306کلو میٹر منصوبا بلٹ اپریٹ بنیاداں اُتے مکمل ہووے گا۔ ایکنک نے راولپنڈی لئی ایکسپریس ویے منصوبے دی منظوری دِتی اے‘ جہدے اُتے 24 ارب 96 کروڑ رُپئے لاگت آئے گی۔ اعلامیے دے مطابق اجلاس دوران راولپنڈی رنگ روڈ منصوبے دی منظوری وی دِتی گئی‘ ایہدے اُتے 23 ارب 60 کروڑ رُپئے لاگت آئے گی۔ ایکنک اجلاس وچ جنوبی پنجاب دے غربت مکاؤ پروگرام دی وی منظوری دے دِتی گئی۔ اعلامیے دے مطابق جنوبی پنجاب دے 10 ضلعیاں لئی 25 ارب 24 کروڑ رُپئے دا پروگرام شروع ہووے گا۔ ایکنک اجلاس وچ تھل کینال فیز 2 منصوبے دی منظوری اِک واری فیر مؤخر کردیاں ہویاں صوبا سندھ دیاں سفارشاں نوں شامل کرن دی ہدایت کر دِتی گئی۔