استنبول لئی فریٹ ٹرین …….٭رویل کالم٭

بیتے دن مارگلا ریلوے سٹیشن اُتے اسلام اباد‘ تہران‘ استنبول فریٹ ٹرین دی افتتاحی تقریب ہوئی جہدے وچ وزیر برائے ریلوے‘ اعظم خان سواتی نے آکھیا کہ ایہ ٹرین خطے وچ گیم چینجر ثابت ہووے گی جہدے نال تناں دیساں دی تجارت نوں فروغ حاصل ہووے گا۔ اوہناں نے آکھیا کہ پاکستان ریلوے مستقبل وچ مسافر ٹرین چلاون دی منصوبے بندی وی کرے گا۔ ایس موقعے اُتے دسیا گیا کہ انٹرا ریجنل ٹریڈ نرا ست فیصد اے جو بہت گھٹ اے۔

پاکستان نوں ریلوے تے سڑک راہیں ایران تے ترکی نال جوڑنا اک پرانا سفنا اے جہدی اک زمانے وچ پورتی وی ہوندی رہی اے۔ سگوں اک زمانے وچ انگلینڈ توں لاہور تیکر بس سروس وی چلدی رہی اے۔ ایہو جہے فایدے مند تے چنگے منصوبے ویلے دے نال نال بند ہوندے گئے تے اج ایہ حال اے کہ گوانڈھی دیساں تیکر جاون لئی وی ٹرین یاں بس سروس گھٹ ای دستیاب ہوندی اے۔ ایہدے وچ ساڈِیاں بہت ساریاں پالیسیاں دا وی عمل دخل اے۔

ستراں دے دہاکے تیکر پاکستان‘ ایران تے ترکی وچکار آر سی ڈی یعنی ریجنل کوآپریشن فار ڈیولپمنٹ راہیں بہت سارے رابطے سن۔ ایہناں وچ ای تناں دیساں نوں ریلوے تے بس راہیں جوڑنا وی شامل سی۔بھاویں ایہ کارا امریکی اشارے اُتے سوویت یونین دے خلاف مختلف اقدام دا اک حِصّا سی پر ایہدے ہور فایدیاں توں انکار نہیں کیتا جا سکدا۔ پاکستانی لوکائی کوئٹے توں ایران دے شہر زاہدان راہیں ہوندی ہوئی استنبول جا اپڑدی سی جتھوں اگے یورپ جانا بہت سوکھا کم سی۔ ایس طرحاں بہت ای مناسب کرائے وچ یورپ اپڑن دا عمل ممکن سی۔

ایہو جہیا چنگا منصوبا خطے وچ تبدیلیاں کارن ختم ہو گیا۔افغانستان وچ ظاہر شاہ دی حکومت ختم ہون دے بعد مختلف خانا جنگیاں تے فیر طالبان آون دے بعد خطے وچ حالات دا دھارا کسے ہور پاسے وگن لگ پیا۔ ایران دے شہنشاہ دا زوال ہویا تے اوتھے خمینی دی حکومت آ گئی۔ ذوالفقار علی بھٹو نوں پھانسی دتے جاون دے بعد ایران نال ساڈے تعلقات سردمہری دا شکار ہوندے گئے تے اخیر آر سی ڈی دا نرا ناں باقی رہ گیا۔

اُڈارو جہاز راہیں سفر وچ ویلے دی تاں بہت بچت ہوندی اے پر ایہ سفر درمیانے درجے دے لوکاں واسطے ممکن ای نہیں ہوندا۔ خاص کر کرونا وباء دے بعد جہازاں دے کرائے وچ ہوش گواؤ وادھے ہو گئے نیں تے یورپ ول نوں اِکپاسی سفر وی گھٹو گھٹ اک لکھ دا پیندا پیا اے۔

اجہے حالات وچ مسافر ٹرین دا چلار‘ مسافراں دی وڈی اسانی دے نال نال واقعی خطے وچ گیم چینجر ثابت ہو سکدا اے جہدے ول ریلوے نوں فوری دھیان دینا چاہیدا اے۔ البتا ٹکٹاں دا مل مناسب رکھیا جانا وی ضروری اے۔