بے نظیر شہید دے ہر سُفنے نُوں حقیقت وچ بدلاں گے،ملکی ازادی‘ خُد مختاری‘عزت اُتے سمجھوتا نہیں کراں گے: آصف زرداری……٭رویل خبر٭

کراچی (اُچیچا نمایندا) پچھلے صدر تے پاکستان پیپلز پارٹی دے رلتی چیئرمین آصف علی زرداری نے محترما بے نظیر بھٹو شہید دے شہادت دیہاڑ اُتے جاری اپنے پیغام وچ کہیا کہ بے نظیر شہید نُوں خراج عقیدت پیش کردیاں ہویاں ایس عہد دی تجدید کردے آں کہ اوہناں دے ہر خاب نُوں حقیقت وچ بدلاں گے۔ آصف زرداری نے کہیا کہ ملک توں غربت تے بیروزگاری دا خاتما کر کے لوکائی نُوں معاشی اوکڑاں توں نجات دلوان لئی جدوجہد جاری رکھاں گے۔ پچھلے صدر دا اپنے بیان وچ کہنا سی کہ ملک سانوں اپنیاں جاناں توں ودھ عزیز اے‘ ایہدی ازادی‘ وقار‘ خُد داری تے عزت اُتے کوئی سمجھوتا نہیں کراں گے۔ اوہناں نے کہیا کہ اج ملک خطرناک صورتحال توں لنگھ رہیا اے‘ ملکی معیشت تباہ ہو گئی اے۔