پنجابی فلماں دی بحالی لئی عملی قدم چُکنا پوے گا: صائمہ نور……٭رویل خبر٭

لاہور (نمایندا رویل) نامور اداکارا صائمہ نور نے کہیا اے کہ پنجابی زبان وچ نویاں فلماں نہ بنن دی وجھا توں لاہور دی انڈسٹری جمود دا شکار ہو چکی اے۔ میڈیا نال گلبات کردیاں ہویاں اوہناں نے کہیا کہ ساریاں نُوں سانجھا پلیٹ فارم تشکیل دے کے پنجابی فلماں دا تسلسل شروع کرنا پوے گا تے گھٹ توں گھٹ سالانا 10 توں 12 فلماں دی نمایش نال پنجابی فلماں دا دور واپس آ سکدا اے۔ اوہناں نے کہیا کہ اج وی ساڈی انڈسٹری وچ ایہو جہے ہدایتکار موجود نیں جہڑے کسے وی فلم دی کامیابی دی علامت سمجھے جاندے نیں‘ پر ایہدے لئی سرمایا کاراں نُوں اِک قدم اگے آنا پوے گا‘ خالی گلاں نال کدی منصوبے مکمل نہیں ہوندے۔ اوہناں نے کہیا کہ جدوں تک عملی طور اُتے قدم نہیں چُکیا جاوے گا اودوں تک ایسے طرحاں کنڈھے اُتے کھلوتے رہواں گے۔