ادارا شماریات دے موجب 2021 لوکائی لئی تبدیلی سرکار دا مہنگا ئی والا ورھا،لوکائی ڈاڈھی پریشان رہی……٭رویل خبر٭

اسلام آباد (نیوز ڈیسک) ادارا شماریات دے موجب 2021 لوکائی لئی تبدیلی سرکار دا مہنگا ترین سال ثابت ہویا‘ چالو سال لوڑی دیاں بُہتیاں شیواں دیاں قیمتاں وچ وادھا ہویا۔ میڈیا رپورٹاں دے مطابق وزیراعظم‘ وفاقی وزراء وڈے وڈے دعوے‘ تقریراں‘ بیانات کجھ کم نہ آیا‘ تبدیلی سرکار نے لوکائی نُوں مہنگائی دی صورت وچ ایہو جہے تحفے دِتے کہ ہر پاسے اِک ای کہانی مہنگائی مہنگائی تے بس مہنگائی‘ تواریخی مہنگائی دے کارن لوکائی حقیقت وچ ڈاڈھی پریشانی دا شکار اے‘ ہر مہینے ودھدی مہنگائی دی شرح نومبر وچ 11.5 فیصد دی سطح اُتے اپری تے انج ستمبر سبھ توں ودھ ستمگر ثابت ہویا‘ تے ایس طرحاں مہنگائی نے ای 2021 نُوں رخصت کر دِتا۔ آنکڑیاں دے مطابق فروری 2021 دے دوران مہنگائی دا پارا 8.7 تے مارچ وچ 9.1 فیصد تک پہنچ گیا تے فیر اپریل وچ شرح دی دوجی بلند ترین سطح 11.1 فیصد اُتے اپڑیا‘ گل ایتھے نہیں رُکی تے اِک واری فیر نومبر وچ مہنگائی سال دی اُچّی ترین سطح11.5 فیصد تک پہنچ گئی۔ وفاقی اداریا شماریات نے اپنی رپورٹ وچ دَسیا اے کہ چالو سال دے دوران بُہتیاں شیواں دیاں قیمتاں وچ وادھا ہویا‘ تبدیلی سرکار دے اِک سال دے دوران 20 کلو آٹے دا تھیلا 210 رُپئے تک‘ ڈھائی کلو گھیو دا کاٹن 1 سال وچ ریکارڈ 359 رُپئے 33 پیسے تے 5 کلو گھیو دا کاٹن 1 سال وچ 775 رُپئے مہنگا ہویا‘ چالو سال کھنڈ اوسط 7 رُپئے 53 پیسے فی کلو مہنگی ہوئی‘ چالو سال کھنڈ دی اوسط قیمت 84 توں ودھ کے 91 رُپئے 53 پیسے فی کلو ہو گئی‘ چالو سال کھنڈ دی قیمت 140 رُپئے فی کلو تک وی اپڑی۔ رپورٹ مطابق اِک سال وچ بجلی چارجز 3 رُپئے 40 پیسے فی یونٹ ودھ گئے‘ بجلی چارجز 4.05 رُپئے توں ودھ کے 7.45 رُپئے فی یونٹ ہو گئے‘ اِک سال وچ مٹن 163 رُپئے 68 پیسے‘ بیف 100 رُپئے 41 پیسے فی کلو مہنگا ہویا‘ چالو سال ایل پی جی دا گھریلو سلنڈر 1 ہزار 22 رُپئے 87 پیسے مہنگا ہویا۔ آنکڑیاں وچ دَسیا گیا کہ چالو سال تازا دُدھ دی فی لیٹر قیمت وچ 9 رُپئے 13 پیسے دا وادھا ہویا‘ چالو سال دہی دی فی کلو قیمت وچ 11 رُپئے 12 پیسے دا وادھا ہویا‘ چالو سال دال مسور 52 رُپئے 86 پیسے فی کلو مہنگی ہوئی‘ دال چنا دی اوسط قیمت 17 رُپئے 24 پیسے فی کلو ودھی‘ اِک سال وچ گڑ 13 رُپئے 50 پیسے فی کلو مہنگا ہویا‘ ایسے عرصے و چ تھوم 43 رُپئے 84 پیسے فی کلو مہنگا ہویا۔ ادارا شماریات نے دَسیا کہ اِک سال وچ دال ماش 42 رُپئے 59 پیسے فی کلو سستی ہوئی‘ دال مونگ 56 رُپئے 20 پیسے فی کلو سستی ہوئی‘ آندیاں دی قیمت وچ 21 رُپئے 28 پیسے فی درجن کمی ہوئی‘ اِک سال وچ ٹماٹر 11 رُپئے 40 پیسے تے گنڈھے 6 رُپئے 92 پیسے فی کلو سستے ہوئے‘ اِک سال وچ زندا مرغی دی فی کلو قیمت وچ 1 رُپئے 40 پیسے کمی ہوئی۔ آنکڑیاں دے مطابق 2021 وچ ایل پی جی دا گھریلو سلنڈر 962 رُپئے مہنگا ہویا‘ دسمبر 2020 وچ ایل پی جی دا گھریلو سلنڈر 1419 رُپئے دا سی جہڑا دسمبر 2021 وچ 2345 رُپئے دا ہو چکیا اے۔