kraamaat@gmail.com
+ +92 333-430-6384


(گئر تھامپسن دی لکھت "کون سی ہیلن کیلر؟" دا پنجابی ترجما(پہلی قسط


کرامت مُغل December 21, 2019


پہلی قسط

ہیلن دا100ورھے پہلاں جنم ہویا‘ ہیلن نے بولنا پڑھنا تے فیر لکھنا سکھیا۔ ایہ شاید بہت وڈی گل نہیں لگدی پر ہیلن کیلر واسطے وڈّی گل سی کیوں جو اوہ ڈَوری (جوبول تے سُن نہ سکے) تے مناکھی (نابینا‘ جوویکھ نہ سکے)سن۔

سوچو تہاڈے کنّاں وچ رُوں بھری ہووے تُسیں کُجھ سُن نہ سکو بھاویں کوئی چِیکدا رہوے تہاڈیاں اکھّاں اُتے پٹی بنّھی ہووے تُسیں کُجھ ویکھ نہ سکو ایہ انھیریاں بھری کالی تے چُپ والی دُنیا ہیلن کیلر دی دُنیا سی۔

جدو ں ہیلن کیلر تھوڑا کُووڈی ہوئی اوس ویلے تیکر کُجھ بولیاں تے بولنا کویں بولنا سی‘ سکھ لیا ہویا سی۔ اوس ویلے ڈوریاں تے مناکھیاں واسطے بہت گھٹ سکول سن۔ اکھاں توں وانجھے کُجھ لوک ای لکھنا پڑھنا سکھے سن۔ ہیلن کیلر نے نہ صرف ایہ دوویں کم لکھنا تے پڑھناسکھے سگوں ایس توں ودھ ہور وی بہت کجھ کیتا۔ بہت ودھ وکن والیاں کئی کتاباں اوہناں نے لِکھیاں ۔ اوہناں نے وکھایا کہ اوہناں دا بجھل پن اوہناں نوں پچھے نہ رکھ سکیا۔ ایس توں اگانہ اوہناں نے اوہناں لوکاں نُوں اُمید دِتی جو اوہناں دے وانگ ای سُن تے ویکھ نہیں سن سکدے۔ پہلا باب ہیلن کیلر 27جون‘ 1880 نوں تسکوبیا‘ الباما وچ پیدا ہوئی۔ آرتھر کیلر اوہناں دے والد سن جہناں نے جنوب ول ہوئی سِول وار وچ بھاگ لیا۔ لڑائی توں بعد اوہ واہی بیجی واسطے اپنے پِنڈ چلے گئے۔ اپنی پہلی بیوی دے مرن مگروں اوہناں نے کیٹ ایڈم نال ویاہ کر لیا۔ پہلی بیوی توں دو پُتر سن۔ نویں بیوی آرتھر کیلر نوں ’’کپتان‘ کہندی سی۔ واہی بیجی دے نال نال اوہ اک مقامی اخبار دے ایڈیٹر وجھوں وی کم کردے ‘ خموش رہن والے سنجیدا انسان سن۔ پروار وچ پہلی کُڑی ہیلن دے جمن نال گھر جیوں رُشنایا گیا۔ اوہ ہسدی تے غُٹر غُوں کردی رہندی۔ ہیلن اپنی ماں دی اکھ دا تارا بن گئی۔ اوہدا پیو اوس دی تعریف کردا تے اوس نوں پسند کردا۔ ہیلن اپنی مُڈھلی حیاتی بارے لِکھدی کہندی اے ’’میری زندگی دا مُڈھ بہت ای سادا سی کسے سدھارن بال دے جیون وانگ سادا۔۔۔۔۔۔۔۔۔ میں آئی‘ میں ویکھیا جِت لیا جویں خاندان وچ پہلا بال کردا اے۔‘‘ ہیلن ذہین سی اوس نے بڑی جلدی ای بولنا شروع کر دِتا۔ اوس دے پہلے بولے گئے اکھر ایہ سن۔ ’’تی آ‘ تی آ‘ تی آ‘‘ تے ’’واء‘ واء‘‘ جو اوس نے پانی واسطے بولے سن۔ جے اوہنوں شیواں واسطے لفظ نہیں سن آندے تاں اوہ اشاریاں نال اوہناں شیواں دی نشاندہی کردیندی جو اوس نوں لوڑیندے سن۔ بڑی جلدی ای اوس نے ٹُرنا سِکھ لیا۔ فیر کُجھ دیر بعد بڑی جلدی ای ہیلن پورے گھر وچ دوڑاں لا رہی سی۔

فیر دو سال دے لگ بھگ اوہ بمار سگوں بہت بمار ہو گئی۔ اوس نوں بہت تیز بخار ہویا۔ اوس ویلے بماری دے علاج واسطے بہت گھٹ دوائیاں سن۔ ڈاکٹراں نے سوچیا سی کہ ہیلن مر جاوے گی۔ فیراچانچک بُخار ٹُٹ گیا۔ ہیلن سکون دی نیندر سُتی۔ اوس دا پرواراک وار فیر خُش ہو گیا۔ اوہناں دی سنہری دِھی فیر ٹھیک چنگی بھلی ہو گئی۔

پرہیلن ٹھیک نہیں ہوئی۔ جدوں ہیلن دی ماں اوس نُوں نہوا رہی سی اوس نے ہیلن دے موُنہ اگے اپنا ہتھ ہلایا۔ اوس اکھ نہیں جھپکی‘ اوہدیاں اکھیاں سِدھا گھُور رہیاں سن۔ کیٹ نے دُبارا جتن کیتا اوہنے چاہیا جو او س نے محسوس کیتااے اوہ غلط ای ہووے۔پر اوہ غلط نہیں سی۔ ہیلن مناکھی ہو چکی سی تے ایہ سبھ کُجھ ٹھیک نہیں سی۔

ہر شام‘ گھنٹی وجائی جاندی سی تاں جو پروار نوں کھانے تے بلایا جاوے۔ ہر کوئی اواز سُندا‘ ایہ جھنکار دے شور وانگ سی۔ اوہ جو وی کُجھ کر رہے ہوندے سن اوہ چھڈ دیندے تے کھانے تے آ جاندے پر کیٹ نے ویکھیا کہ ہیلن ایس جھنکار دی اواز تے کوئی ردءِ عمل نہیں کردی۔ کیٹ نے کپتان تے اوہدی بھین ایولین نوں دسیا جو اوہناں نال ای رہندی پئی سی۔ اوہناں نے ہیلن نوں اُچی ساری پُکاریا‘ فیر اوہ نرمی نال بولے اوہناں نے ہیلن دے کنّاں کول تالی وجائی۔ ہیلن نے کُجھ وی محسوس نہ کیتا اوس نوں کُجھ سُنائی ای نہ دِتا۔ مسز کیلر دا ڈر سچا ثابت ہویا۔ اوہدی دِھی ڈوری تے مناکھی ہو چکُی سی۔ اوہ نہ سُن سکدی‘ نہ بول سکدی تے نہ ای ویکھ سکدی سی۔

اوس دے ماپے اوس نوں ڈاکٹر کول لے اپڑے۔ ڈاکٹر نے اوس دا معاینا کیتا پر اوہ بے بس وکھائی دِتا۔ کویں‘ مسز کیلر حیران رہ گئی۔ کیہ اوہدی ہُشیار تے سوہنی بالڑی نوں خموش تے انھیری دُنیا وچ رہناپوے گا؟

باب نمبر 2

کالے انھیرے بھرے ورھے

ہیلن دی دُنیا وچ کوئی دن تے راتاں نہیں سن۔ اوہ ہر روز صبح سویرے چڑھدا سورج نہیں سی ویکھ سکدی یاں فیر رات نوں چن دی چاندی ورگی چاننی وی نہیں سی ویکھ سکدی۔ اوہ پکھیروواں دے گیت تے جھینگر دی اواز تیکر وی نہیں سی سُن سکدی۔ اوہ خموش انھیرے وچ جیون لگ گئی۔ اپنے بارے سوچو ذرا جے تُسیں ویکھ‘ سُن تے بول نہ سکدے ہوؤ تُسیں لوکاں نوں کویں اپنی گل سمجھاندے؟ کویں ’’گل‘‘ کردے؟ ہیلن تیز‘ ہُشیار سی۔ اوہ ہر تھاں اپنی ماں دے پچھے پچھے رہندی۔ اوہ اپنی ماں دی سکرٹ نال چِنبڑی رہندی۔ ہیلن نوں وکھ وکھ خشبوواں آندیاں۔ اوس نوں اپنے آل دوالے پھردیاں لوکاں تے شیواں دی حرکت ہِل جُل محسوس ہوندی۔ ویلے دے نال نا لاوس نے اپنی گل دوجیاں تیکر اپڑان دا ول لبھنا شروع کیتا۔ اوس نے اشارے بنائے تاں جو اپنی گل لوکاں تیکر اپڑا سکے۔ جدوں ہیلن نِکی سی اوس ویلے ڈورے تے مناکھی بالاں واسطے بہت زیادا سکول نہیں سن۔ الباما وچ تاں کُجھ وی نہیں سی جتھے ہیلن وسدی سی۔ سکولاں وچ ڈوریاں نوں ہتھ نال اشارے کرنا سکھایا جاندا۔ ایہ اشارے اکھراں واسطے ہوندے سن۔

ویلا لنگھیااوہ پنج ورھیاں دی ہو گئی۔ ہیلن نے اپنے توں ای پنجاہ (50) اشارے بنا لئے۔ اوہ اپنی ماں یاں پیو نوں اپنے ول کھِچدی جس دا مطلب سی ’’میرے کول آؤ‘ اوہ اوہناں نوں پرانہ دھکیل دِتی جدوں اوہناں نُوں دُور گھلناچاہندی ہووے۔ ’’روٹی‘‘ ’’بریڈ‘‘ واسطے اوہ سلائس کٹن تے اوس اُپر مکھن لاون وانگ کردی۔ ’’نِکّا‘‘ کہن واسطے اوہ اپنے ہتھ اُتے چُونڈھی وڈھدی۔ ہیلن اپنیاں ’’اُنگلاں‘‘ پھیلاندی تے اوس نوں جوڑدی جس دا مطلب ہوندا ’’وڈا‘‘ ہیلن اپنے گھروالیاں واسطے ہر اک لئی وکھرااشارا رکھدی۔ کپتان یاں پیو واسطے ہیلن اپنیاں عینکاں نوں ہتھ لاندی تے اپنی ماں واسطے اوہ اپنے سِر دے پچھے والاں نوں لیجا کے گنڈھ ماردی۔

پروار نے ہیلن نوں جانن دا جتن کیتا جو کہ اسان کم نہیں سی۔ اوہدا مزاج خوفناک سی جدوں ہیلن نوں کوئی ہور راہ نہ لبھدا تاں اوہ غُصّا چھڈ دیندی۔ ہیلن نوں پتا سی کہ لوک ہونٹھاں نال گلاں کردے نیں۔ اوس نے اپنے ہونٹھاں نوں ہلاون دا جتن کیتا پر کوئی اواز نہ نکلی۔ ایس عمل نے ہیلن نوں پاگل کر دِتا۔ اوس نے غُصّے تے دباؤ وچ ٹھُڈے مارے تے چِیکی۔ اوہدا غُصّا اودوں مُکیا جدوں اوہ بہت زیادا تھک گئی۔ اینی تھک گئی کہ ہور چِیک وی نہ سکی۔

ہیلن دے ماپیاں نُوں کُجھ سُجھ نہیں سی رہیا کہ اوہ ایہ صورتحال کویں قابو وچ لیاون گے۔ رِشتے داراں نے فیصلا سُنایا کہ ہیلن نوں ہُن پروار وچ بہت زیادا دیر نہیں رہنا چاہیدا۔ اوس نُوں ’’سُٹ دینا‘‘ چاہیدا اے جس دا مطلب اے کہ ہیلن نوں ہسپتال یاں فیر مناکھیاں تے ڈوریاں دے آشرم وچ گھل دینا چاہیدا اے۔ 19ویں صدی وچ بجھل لوکاں نوں ایوں ای باہر گھل دِتا جاندا سی۔ اک وار اوہناں نوں گھل دِتا جاندا تے فیر پروار اوس نوں کدے وی نہ ویکھدا۔ پر مسز کیلر اپنی دِھی نال کُجھ وی ایہو جہیا نہیں سی کرنا چاہندی۔ اوس نوں پتا سی کہ اوس دی دِھی ذ ہین اے پر کون کویں اوس نوں سِکھا سکدا سی۔

(باقی اگلی وار)