قومی اسمبلی دا تواریخی اجلاس ……٭رویل کالم٭

قومی اسمبلی دا تواریخی اجلاس ……٭رویل کالم٭

جمعے والے دیہاڑ ہون والے قومی اسمبلی دے اکٹھ بارے اکثر اخباراں مطابق اک تواریخی اجلاس ہون والا سی پر عمل وچ آ کے ایہ تواریخی اجلاس‘ جغرافیائی بن کے رہ گیا جدوں توقع تے اندازے دے خلاف وزیر اعظم بارے بے وساہی لہر پیش نہ کیتی گئی تے نرا فاتحہ خانی کر کے اجلاس پیر دیہاڑ تیکر ملتوی کر دتا گیا۔ اجلاس وچ وزیر اعظم تے خارجا وزیر سَنے تحریک انصاف دے 64 رکن وی غیر حاضر رہے۔ جد کہ باقی پارٹیاں دے وی اک اک دو دو رکن غیر حاضر رہے۔ جہڑے تماشا ویکھن دی آس کر رہے سن‘ اوہ نہاتے دھوتے رہ گئے۔

اجلاس شروع ہون توں پہلاں جنے حفاظتی انتظام کیتے گئے سن اوہناں توں لگدا سی جویں دشمن ملک نے حملا کر دتا ہووے۔ اراکین نوں اپنے پروہنے تے راکھے نال لیاون دی اجازت نہیں سی‘ پارکنگ اپنی تھاں کرن دی پابندی دے نال نال داخلے تے نکاس واسطے اِکو سڑک راکھویں کر دتی گئی سی۔ جے نرا فاتحہ خانی ای کرنی سی تاں اینا کجھ اُکا ای غیر ضروری سی۔ اسمبلی دا اجلاس اینا وی غیر معمولی نہیں سی‘ جنا انتظاماں پاروں بنا دتا گیا۔ بے وساہی لہر وی پیش کیتی جاندی تاں وی اجہے راکھی انتظاماں دا جواز کوئی نہیں سی۔

پاکستانی لوکائی دے مذہبی رحجان پاروں مذہبی کارڈ ورت کے ووٹ یاں ہمدردیاں لینا بہت عام گل اے۔ ایہو کجھ حکمران پارٹی نے شروع کر دتا اے۔ سڑکاں اتے لگن والے پوسٹراں وچ وزیر اعظم نوں ختم نبوت دے محافظ تے خورے ہور کیہ کیہ بنا کے پیش کیتا جا رہیا اے۔ ایس طرحاں سیاسی مسئلے نوں مذہب راہیں حل کرن دا جتن کیتا جا رہیا اے جو اک بہت خطرناک رحجان اے۔ اسیں کسے دی نیت اُتے شک نہیں کردے‘ ”خاتم النبیین“ دا لفظ ادا نہ کر سکن دے باوجود وزیر اعظم اک سچے تے سُچے مسلمان ہو سکدے نیں تے عاشق رسولؐ وی پر اوہناں دے مقابلے اُتے آون والے وی یہودی نہیں‘ مسلمان ای نیں تے مسلمان دا ایمان‘ رسول پاکؐ نال محبت توں بغیر مکمل نہیں ہو سکدا۔ گل کیہ‘ مذہبی طور اُتے پاک پاکیزا ہون دا دعوا صرف تے صرف رب سچے نوں پتا اے جو دل دا حال جاندا اے۔ اپنے آپ نوں مذہبی طور اُتے اُچا تے دُوجے نوں نیواں بنا کے پیش کرنا ماڑی گل اے۔

وزیر اعظم ہوری بظاہر اپنا ٹھرمھا قایم رکھی نظر آوندے نیں۔ اوہناں نے من پسند پرچاکاراں نال وی دو گھنٹے دی گل بات کر کے سارے اکٹھ دی گل نوں آف دی رِکارڈ متھ دتا۔ جہڑیاں گلاں باہر آئیاں اوہناں مطابق اوہناں نوں بہت ساریاں دِھراں نال گِلے شکوے وی نیں تے ثبوت وی موجود نیں پر ”ملکی مفاد“ دی خاطر اوہ کسے اُتے الزام لان دی حد تیکر نہیں جا رہے۔ اوہ اپنے خلاف لہر نوں ”بیرونی ہتھ“ دی سازش وی متھ رہے نیں۔ ایہ سارا کجھ پہلاں وی ہوندا آیا اے۔ ذوالفقار علی بھٹو خلاف 1977 دی تحریک توں لے کے اج تیکر‘ ایہ سارا کجھ اینی واری دُہرایا گیا اے کہ بے اثر ہو کے رہ گیا اے۔

٭٭٭٭٭