kraamaat@gmail.com
+ +92 333-430-6384


پھَکی والا باوا -----٭ رویل شاعری٭


شکیل کاشف May 07, 2022


سُن لو گل پیارے لوکو، باوا چل کے آیا

صحت نالوں نَہیں وڈی کوئی دُوجی جگ مایا

قبض نُوں کہندے ماں پِیڑاں دی سبھ حکیم تے وَید

ہوا، اپھارا، کھادا، پیتا ڈِھڈ وِچ رہندا قید

قبض دماغ تے دِل گُردے نال اِنج کردی اے دھکا

معدہ ساڑ کے حلق تے گل نُوں لاندی پِیڑ بَھڑَکا

لے کے تُہاڈی سیوا اندر آے آیا کھٹی پَھکی

شفا اللہ نے ہر اِک مرض دی ایہدے اندر رکھی

سونف، اجوائن تے تُمے نالے چارے عرق نچوڑے

پَھکی کر کر حملے ڈِھڈ وِچ، بَنھ قبضاں دے توڑے

مار فراٹے ہوا وگاوے، معدہ کردی صاف

اُچا تِنِیں مِنٹِیں جاندا ویکھنا صحت گراف

لَے لَئو، لَے لَئو بَیبَیو بھائیو! مُل جے چَوکھا تھوڑا

تَرِیہ روپئیے بدلے لَے لَئو دو ڈبیاں دا جوڑا

جی جی آیا کول تہاڈے، ہتھ وِچ رکھو نوٹ

قسم خُدا دی دھوکا نہیں تے نہ کوئی رکھی اوٹ

دَیو اِجازت سجنو مِترو اگلی واری تائیں

کاشف خیرِیں مَہری اپڑو آپنو آپنی تھائِیں

٭٭٭٭٭