جیابگا دا ادبی تارا۔۔۔۔۔٭رویل لیکھ٭

جیا بگا دا ادبی تارا۔۔۔۔۔٭رویل لیکھ٭

صبیرہ تبسم

کجھ دن پہلاں میرے اک عزیز متر دے ہتھوں مینوں اک ودھیا کتاب پڑھنا نصیب ہوئی۔ایہ کتاب پنجابی زبان وچ شاعری اُتے بنی ہوئی سی۔ایس کتاب دے شاعر جناب طارق محمود واسط صاحب سن۔ جہناں دی شاعری تے شاعری لکھن دے انداز نے میرا دل موہ لیا۔تے میں اوس کتاب بارے کجھ لکھن تے مجبور ہو گئی۔

جناب طارق محمود واسط صاحب ضلع لاہور دے اک پنڈ جیابگا تحصیل رائیونڈ نال تعلق رکھدے نیں۔ تے پنڈ جیابگا وچ ای گورنمنٹ پرایمری سکول جیا دے ہیڈ ماسٹر دیاں ذمے واریاں سنبھالدے پئے نیں۔جناب طارق محمود واسط صاحب دیاں اردو ادب دے نال نال پنجابی زبان وچ وی خدمتاں نیں۔

ایہناں دی ایہ کتاب ”کن من دے اندر“ پنجابی زبان وچ شاعری دا بڑا چنگا پراگا اے۔اوہناں دی شاعری وچ اللہ پاک نال تے اوہدیاں دتیاں نعمتاں نال عشق تے پریت دا پتا لگدا اے۔تے قدرت دی ہر چیز نوں بڑے غور نال ویکھدے تے فیر اوہنوں اپنی شاعری وچ لکھدے نیں۔ اوہناں اپنی کتاب دی شروعات اک سپاس ناما توں کیتی۔جہدے وچ اوہ سارے لوگ شامل سن جہناں نے ایس ادبی سفر وچ ساتھ دتا۔

اوس توں بعد اوہناں اپنیاں نظماں دے ناواں توں پہل کیتی۔ اوہناں دی کتاب کن من دے اندر دی باقاعدا شروعات اللہ تعالیٰ دی حمدوثنا توں ہوئی۔ اوہناں حمد وچ سورۃ اخلاص نوں بڑے چنگے طریقے نال لکھیا اے۔اوس توں بعد اوہناں جناب بابا بلھے‘طفیل پرویز محترم تے اپنے متر محمد ساجد دے ناں تے وی نظماں لکھیاں۔جہناں توں پتا لگدا اے کہ ایہ یاراں دے یار وی نیں۔۔۔۔۔واہ اوئے ادب دیاں شیرا۔۔۔۔۔ ایہناں نے علاما محمد اقبال رحمتہ اللہ علیہ دے کلام شکوا‘جواب شکوا نوں وی پنجابی زبان وچ نویں ڈھنگ نال لکھ کے اک نویں جان پا دتی۔جہڑی پڑھن والیاں نوں اک وکھرے ای راہے پا دوے گی۔تے سمجھن نوں وی سوکھی ہووے گی۔ایہناں دی اک نظم فنا و بقا دی رمز تے بڑے ای ودھیا بول نیں:

کفر عین حق دا راہ اوکھاسچ الف ایمان دا ویر آ

کن فیکون دے نام رکھاں جتھے ہوندی صبراخیر ایہ آ

ایس تو بعد ایہناں دیاں نظماں وچ نماز عشق‘ مئے عشق‘ چخاں تے عشق‘ منزل عشق‘ سفرعشق‘ میدان عشق‘ احتساب عشق‘ عشق رسول‘ رمز عشق‘ خون عشق‘ عشق محبوب‘ کفن عشق‘ آتش عشق‘ عشق العشق‘ صحبت عشق‘ درد عشق‘ عشق طور سینا‘ غرور عشق‘ رنگ عشق‘ رضا عشق‘ راہ عشق‘ حسن عشق‘ شمشیر عشق‘ زنجیر عشق‘ عشق داکجل‘ عین عشق‘ عشق واسط شامل نیں۔جہناں وچ ایہناں دے مذہبی تے عصری عشق دا پتا لگدا اے۔ ایہ اپنی نظم نماز عشق وچ لکھدے نیں پئی:

*پڑھن سبق دا تینوں جے شوق ہووے

آ بیٹھ تے تینوں پڑھا دیواں

پھر کلما احد پڑھا کے تے

کنڈی میم دی ہتھ پھڑا دیواں

اخیرلے ورقے تے ایہناں اپنیاں باقی کتاباں دے وی ناں دتے نیں جہڑیاں طبع تے غیر طبع نیں۔جہناں وچ بہار بخشش‘ جیابگا کی تاریخ‘ جیابگا_ _ _ _تاریخ کے آئینے میں‘ پنج چشمے‘ من کا سفر شامل نیں۔جناب طارق محمود واسط صاحب پنڈ جیابگا دا اوہ چمکدا ہویا تارا اے پئی جنے اپنیاں کتاباں تے ڈھیر ساریاں ادبی سنگتاں چوں ایوارڈ جتیا اے۔ایہناں دی کتاب کن من دے اندر وی عالمی مقابلے وچ ایوارڈ جت چکی اے۔

میری دعا اے کہ بھئی اللہ سوہنا ایہناں لئی ہور ترقیاں دے راہ کھولے آمین!