kraamaat@gmail.com
+ +92 333-430-6384


گورنمنٹ دیال سنگھ کالج،لاہور وچ چَوتھی شاہ حسین کانفرنس۔۔۔۔۔٭رویل کالم٭


خاص لیکھ March 23, 2023


گورنمنٹ دیال سنگھ کالج،لاہور وچ شاہ حسین کانفرنس۔۔۔۔۔٭رویل کالم٭

خاص لیکھ

پنجابی زبان دے پہلے باقاعدہ شاعر بابا فرید الدین مسعود گنج شکر نیں اوہناں توں بعد جلال الدین اکبر دے ویلے لاہور شہر وچ وسدے شاہ حسین ساہمنے آندے نیں جہناں نے کافیاں لکھیاں۔ آپ دیاں کافیاں وچ حقیقت دیاں رمزاں وی نیں،جیون دی فلاسفی وی،صوفیانا رنگ وی تے اپنی دھرتی تے زبان نال موہ وی وکھالی دیندا اے شاید ای کوئی پنجابی ہووے جس نوں ”مائے نی میں کِہنوں آکھاں ……“ یاد نہ ہووے تے اوس دیاں کناں وچ ایہ بول رَس گھولدیاں دِل دیاں ڈونگھائیاں تیکر نہ اَپڑ گئیاں ہوون۔ شاہ حسین دا عُرس ہر ورھے مارچ دے اخیرلے ہفتے ہوندا اے ”میلا چراغاں“ دے موقعے تے پورے شہر وچ چھٹی کر دتی جاندی اے ایس ورھے سرکار نے یارھاں مارچ2023نوں مقامی چھُٹی دے دتی ایہدے پچھے اسلامی مہینے رمضان دے تقدس نوں مُکھ رکھیا گیا اے۔ایہ اوہی میلا چراغاں اے جہدے وچ پورے ہندوستان توں لوکیں آندے ہوندے سن پر سنتالی دی ونڈ مگروں ایہ کجھ خاص علاقے تک ای محدود کر دتا گیا تے ایس ونڈ نوں کجھ ای ورھے ہوئے سن کہ ایس نوں اک شہر تک محدود کر دتا گیا۔ساڈی دھرتی نال جُڑے وڈے لکھاریاں نوں جاننا اوہناں دے فلسفے تے فن نوں سمجھن لئی ضروری اے کہ اوہناں بارے مکمل جانکاری نویں نسل تیکر اپڑائی جاوے کیوں جے اک نسل دا ایہ فرض بن جاندا اے کہ اوہ اپنی آون والی نسل نوں اپنی دھرتی تے دھرتی واسیاں نال موہ وی منتقل کرے۔میلے ٹھیلے،عرس پنجاب دی دھرتی دی پچھان رہی اے ایس نال اپنی دھرتی تے وسیب نال جُڑئت وی مضبوط ہو جاندی اے۔ایس سلسلے وچ سرکاری طور تے جو کجھ ہو رہیا اے اوس نوں گھٹو گھٹ سو گُنا ودھاون دی لوڑ وی اے۔

پِچھلے دیہاڑ گورنمنٹ دیال سنگھ کالج،لاہوردے پنجابی شعبے ولوں شاہ حسین کانفرنس دا پربندھ کیتا گیا ایہ ورھے وار چَوتھی کانفرنس ہوئی ایس توں پہلاں کرونا وایرس دی گھر بندی توں پہلاں ہر ورھے تِن کانفرنساں ہوچُکیاں سن۔ایس کانفرنس دی صدارت پروفیسر ڈاکٹر نوید شہزاد کر رہے سن جد کہ اُچیچے پروہنیاں وچ پروفیسرڈاکٹر جمیل احمد پال،مدثر اقبال بٹ تے الیاس گھمن ہوریں سن۔منچ تے بیٹھن والیاں وچ صاحب صدر پروفیسر ڈاکٹر نوید شہزاد توں وکھ پروفیسر گلزارحسین بُخاری،مدثر اقبال بٹ،عاشق رحیل،پروفیسرڈاکٹر جمیل احمد پال،پروفیسر ڈاکٹر عباد نبیل شاد،پروفیسرعباس مرزا،الیاس گھُمن تے پروفیسر عاشق رحیل سن۔کانفرس دے پہلے سیشنمُڈھ تلاوت قرآن پاک تے نعت رسول مقبول ﷺ توں رکھیا گیا۔

ڈاکٹرسعادت علی ثاقب نے شاہ حسین دے کلام نوں گا کے سماں بنھ دتا۔کانفرنس دے پہلے مقررپروفیسر ڈاکٹر عرفان الحق نے شاہ حسین دے جیون تے اوہناں دے فلسفے نوں من کھچویں ڈھنگ نال بیان کیتا تے ایس کلاسیک شاعر دیاں گُجھیاں رمزاں نوں بیانیا۔آپ نے کانفرنس دے آہریاں نوں ودھائی وی دتی تے ایہو جہے پربندھ نوں سلاہیا۔پروفیسرڈاکٹر جمیل احمد پال نے اپنیاں رُجھاں پاروں کانفرنس دے مُڈھ وچ ای اپنا مقالا پیش کیتا جس وچ شاہ حسین دے کلام راہیں امن،برداشت تے تحمل دے درس نوں اُگھڑواں کیتا گیا۔لکھنہار نے اپنی گلبات وچ شاہ حسین دی علامت بارے دسیا۔

کانفرس دے دوجے سیشن وچ ڈاکٹر ارشد اقبال ارشد تے دوجے مِجمان شاعراں توں وکھ عطاالعزیز،شاکر ملھی،حنیف زاہد، پر وفیسر گلزارحسین بُخاری،عاشق رحیل،پروفیسر ڈاکٹر عباد نبیل شاد،پروفیسرعباس مرزا،الیاس گھُمن تے پروفیسر عاشق رحیل،پروفیسر ڈاکٹر سعادت علی ثاقب تے وِیر سپاہی نے اپنا کلام سنایا۔وِیرسپاہی نے اپنے مخصوص انداز نال سنن والیاں نوں اپنیاں نظماں سُنائیاں تے ڈھیر داد کھٹی۔

الیاس گھمن نے پنجابیاں نوں اپنی زبان نال جُڑن دے حوالے نال بھرویں گل بات کیتی اوہناں دا

کہنا سی کہ نویں پِیڑھی نوں اپنی زبان نال جوڑنا بہت ضروری اے تے ایہو جہے پروگرام ایس سلسلے وچ وڈا کردار ادا کردے نیں۔پہلے تے دوجے سیشن دی صدارت پروفیسر ڈاکٹر نوید شہزاد ہوراں ای کیتی اوہناں نے اپنے صدارتی خطبے وچ اجہیاں جَتناں نوں سلاہیا۔

نویں نسل نوں اپنی زبان نال جوڑنا ات ضروری اے تے ایہو جہے پروگراماں نال جتھے پڑھیاراں نوں پنجابی زبان وادب دیاں وڈیاں ہستیاں بارے جانکاری ملدی اے اوس دے نال نال صدیاں پہلاں رچیا جاون والے ادب راہیں ایتھوں دی سیاست تے سماجی حالت نوں وی جانن لئی بہت لاہے وند ہوندا اے۔تے ایس طرحاں دے ادبی اکٹھاں پچھے پروفیسر ڈاکٹر ارشد اقبال ارشد تے پروفیسر ممتاز اعوان توں وکھ اوہناں سنگیاں مِتراں دا ساتھ وی ضروری ہوندا اے جو اپروکت بیان کیتیاں ہستیاں دے موڈھے نال موڈھا جوڑی کھلوتے ہوندے نیں اوہ بھاویں کالج دیاں ادبی سوسائٹیز دے صدر ہوون یاں پرنسپل،کیوں جے ایہناں دے ساتھ توں بِنا ایہ اکٹھ ہوونا ممکن نہیں رہندا اے۔گورنمنٹ دیال سنگھ کالج دے پنجابی شعبے ولوں پنجابی زبان و ادب دی ودھوتری واسطے انج دے پربندھ ہوندے رہنا آون والے ویلے نوں آس نال بھردیندا اے۔

٭٭٭٭٭