پنجابی مزدور دا نوحہ۔۔۔۔۔٭نظم٭

پنجابی مزدور دا نوحہ۔۔۔۔۔٭نظم٭

حکیم احمد نعیم ارشد

میں پنجابی مزدور آں

میرا شناختی کارڈ ویکھ کے

مینوں گولی ماری جاندی اے

موت نس کے میرے وَل آندی اے

میرے لئی نہ تے سڑک بلاک ہُندی اے

نہ کوئی نعرے لاندا اے

نہ کوئی چوک چ آکے مِٹی سر وِچ پاندا اے

میں پنجابی مزدور آں

اخباراں پھرول کے ویکھو

مینوں کِنیاں گولیاں وَجیاں

میرا خون اج وی پتھراں نال چِنبڑیا اے

نہیں یقین تے جا کے ویکھ لو

میرے خون دا حساب کون لوے گا

ظالم نُوں اوہدے مُنہ تے ظالم کون کہوے گا

میں پنجابی مزدور آں

میرا خون وی لال اے

توں ای دَس ہاں یار حکیما !

کون اے جہڑا میرے نال اے....... ؟

٭٭٭٭٭