kraamaat@gmail.com
+ +92 333-430-6384


"اَدِھیاں"


ارشاد سندھو December 30, 2019


ماں کولوں پچھیا

پیو وی نہیں دسدا

ایہ گل ویراں کولوں

پُچھ وی نہیں سکدی

اسیں جدوں جمیے تے

چاء کیوں نہیں چڑھدے

سارے ای نیں

بے تقصیراں نال لڑدے

رب نے جو لکھیا اے

اوہ کیوں نہیں پڑھدے

نہ ساڈا در اے

نہ کوئی گھر اے

نہ ساڈی تھاں اے

نہ کِتے ناں اے

اُبری تے سُبری وی

اسیں رہیے کھاندیاں

کُنبے قبیلیاں دے

جھیڑے وی مکاندیاں

چُنیاں دے بدلے ہاں

پگّاں نو بچاندیاں

مال وانگوں اِک دوجے

نال وی وٹاندے او

انکھاں دی سولی تے وی

سانوں ای چڑھاندے

کئی واری جیوندیاں نوں

مویاں لکھواندے او

انھے مُورے ر سماں

رواجاں وچ بدھیاں

پُورے پُورے جم کے وی

اسیں کیوں ہاں ادھیاں

پُوریو تے سُوریو وے

اسیں کیوں ہاں ادھیاں