صغیر تبسم دی نویں ورھے تے نویں نظم
صغیر تبسم
January 03, 2020
پچھلے سال وی سوچیا سی کہ
ہور محبت نہیں کرنی
دل کسے نوں نہیں دینا
جان تلی تے نہیں دھرنی
نہ کوئی اکھ نشیلی تکنی
نہ کوئی بدن گلابی
نہ کوئی جام عشق دا پینا
نہ کوئی ہونٹھ شرابی
نہ کوئی زلف دا کنڈل تکنا
نہ کوئی صندل بانہواں
نہ کوئی اگ عشق دی منگنی
نہ کوئی نگھیاں ساہواں
ایس ورھے میں سوچ رہیا واں
اپنے آپ نوں کول بٹھا کے
روز اک فوٹو کھچاں
اپنا حال سنا کے خد نوں
اپنا حال ہی پچھاں
اک اک درد سناواں دل نوں
اک اک دکھڑا دساں
اپنے سینے لگ کے روواں
اپنےآپ ای ہساں
گھپ ہنیریاں راتاں کولوں
بھورا نہ گھبراواں
رسی سٹ کے انبراں وچوں
چانن کڈھ لیاواں
ایس ورھے وی سوچیا اے کہ
ہور محبت نہیں کرنی
دل کسے نوں نہیں دینا
جان تلی تے نہیں دھرنی۔۔۔۔۔۔۔!
صغیر تبسم