باب نمبر 7

نیویارک وچ گزرے ورھے

پرکنز سکول دے دروازے اوس اُتے بھِیڑ دِتے گئے سن‘ پر دوجا دروازا کھُل گیا۔ عینی نوں ا اِک ہور نویں سکول واسطے پتا چلیا جو ڈوریاں واسطے سی۔ دو بندے‘ ڈاکٹر تھامس ہمسن تے جان رائٹ نے 1894ء وچ نیویارک شہر وچ ایہ سکول کھولیا سی تے عینی نوں ہیلن واسطے بہتر جاپیا سی۔

پر کیلرز نوں ایس واسطے کِنے پیسے ادا کرنے پین گے؟ ہیلن دے پیو اُتے بھیڑے حالات دا پرچھاواں آگیا۔ خرچ کرن لئی پیسے نہیں سن۔ خُش قسمتی نال ہیلن بہت سارے امیر لوکاں نال مل چکی سی۔ جویں کہ ڈاکٹرگراہم بیل‘ جان ڈی راک فیلر تے جان سپالڈنگ۔ سپالڈنگ نے ہیلن دے سکول اخراجات برداشت کرن دی پیش کش کیتی فیر عینی تے ہیلن نیویارک جان لئی ٹُر پئے۔

اوہ سنٹرل پارک دے کول جا کے اک سوہنے جہے گھر وچ جا وسے۔ رائٹ ہیمسن سکول وچ اوس نے ریاضی پڑھیا (بھاویں اوس نوں ایہ بہت گھٹ پسند آیاسی) انگریزی ادب( جو اوس نوں پسند سی) امریکن تواریخ‘ فرانسیس‘ جرمن۔ اوس نے اوتھے ہونٹھ پڑھناتے تقریر کرنا سِکھ لیا۔

ہیلن دی شہرت ہر تھا ں تے پھیل گئی۔ ’’نیویارک ٹائمز‘‘ اخبار دا اک رپورٹر اوس دا انٹرویو کرن آیا۔ اوس نے سوچیا اوہ اک خموش طبیعت تے شرمیلی کُڑی نال ملن جا رہیا اے۔ پر پندرھاں ورھیاں دی ہیلن نے اوس نوں حیران کر چھڈیا۔ سارے انٹرویو وچ ای ہیلن ہسدی رہی تے اوس دا رویا چنچل پن نال بھریا رہیا۔

ہیلن تے اوس دی کلاس آزادی دے مجسمے نوں ویکھن گئی۔اوہ اتانہ چڑھ گئی۔ ہیلن واسطے اُپر والی ہوا زیادا صاف سی۔ سمندر دی بُونے اوس نوں کیپ کاڈ دی یاد دوا دِتی۔ دُوجی وار ہیلن دی کلاس اک ڈاگ شو ویکھن واسطے ’’میڈی سن‘‘ سکوائر گارڈن گئے۔ ہیلن نوں ایہ بہت من بھاؤنا لگیا کیوں کہ کُتّے اوس دے پسندیداجنور سن۔

ایس سیر نے ہیلن نوں بہت متاثر کیتا۔ عینی تے ہیلن مشرق دے ول گئے۔ ایہ اوہ تھاں اے جتھے بہت سارے مہاجررہندے سن۔ اوہ نِکّے نِکے بِھیڑ بھرے گھراں وچ رہندے سن جہناں نوں ’’کھولیاں‘‘ آکھدے نیں۔ اک نِکّے جہے کالے انھیرے والے کمرے وچ دس دس لوک رہندے سن۔

ہیلن غربت نوں نہیں سی ویکھ سکدی پر اوہ محسوس کر سکدی سی۔ لوکاں دے چیتھڑے جو اوہناں نے لباس وجوں پائے ہوندے اوہ ہیلن تے عینی نوں گلی وچ لنگھدیاں ٹپدیاں نال لگدے سن۔ ہیلن نے مشین دے تیل دی بُو سُنگھی ۔ بُورا۔ گلی دی گندگی تے نمک لگی مچھی۔ ایہ اوہ سبھ شیواں سن جو ایہ دس سکدیاں سن کہ ایتھوں دی زندگی کِنی اوکڑاں بھری اے۔ بہت زیادا مشہور لوک نیویارک وچ رہندے سن۔ اک پارٹی وچ ہیلن مارک ٹوین نا ل ملی۔ ٹوین اوس ویلے ہیکل بیری فِن تے ٹام سائبر دی مہمات ناں دی کتاب لکھ کے نامنا کھٹ چُکیا سی۔

مارک ٹوین نے ہیلن نوں ہونٹھ پڑھدیاں ویکھیا اوہناں نے پارٹی وچ اکٹھیاں گل بات کیتی۔ جدوں ہیلن جان لگی اوس نے بنفشے دے پھُل اوہدے کوٹ دے بٹن دے سوراخ وچ لایا۔ ایہ دوویں ہمیشا ہمیشا واسطے گُوڑھے مِتر بن گئے۔ سکول توں بعد ہیلن نوں سنٹرل پارک جانا چنگا لگدا ہوندا سی۔ سردیاں دے دن وچ ہیلن اوتھے برف دے اُتے چلان والی گڈی چلان چلی جاندی۔ اوہ گھوڑ سواری دے سبق لے رہی سی۔ اوہ خوبصورت تے دلچسپ عورت بندی جاون لگی اے۔

باب نمبر 8

کیمبرج دا ویلا

1900ء دے مُڈھلے دہاکے وچ بہت گھٹ عورتاں کالج گئیاں۔ کسے مناکھی ڈوری عورت نے کالج دی پڑھائی مکمل نہ کیتی۔ پر ہیلن نے ایس طرحاں دی پہلی عورت بنن دا پکا ارادا کر لیا۔ اوس نوں پتا سی کہ اوہ کِتھے جانا چاہندی اے۔ ریڈ کلف ‘ ایہ ہا ورڈ یونیورسٹی دی اک شاخ سی جو کہ بلکل بوسٹن دے باہر اے۔ ریڈ کلف نوں یونائیٹڈ سٹیٹ وچ سبھ توں ودھیا کالج مِتھیا جاندا سی۔ ایس دا پڑھیار بن جانا ہیلن واسطے اک بہت وڈی کامیابی ہو جانی سی۔ ہیلن نے اوہ طریقا لبھیا جس نال اوہ ریڈ کلف وچ داخلا لے سکے۔ نوجوان کُڑیاں واسطے کیمبرج سکول سی جو ریڈ کلف وچ داخلا لین گئی اوہناں نوں تیار کردا تے اوہناں دی مدد وی کردا۔

عینی آرتھر گلمین نوں ملن گئی جوکیمبرج سکول دا ہیڈ سی۔ اوس نے گلمین نوں التجا کیتی کہ ہیلن نوں اپنی پڑھیاربنا لوے۔ ایس سوال توں حیران اوس نے کہیا کہ اوہ ایس بارے سوچے گا۔ ہیلن تے عینی کول سوائے انتظار دے کوئی چارا نہیں رہیا۔ اوس دا جواب ہیلن دا مستقبل طے کرے گا۔

ایس دوران ہیلن دا پیو وفات پا چُکیاسی۔ ہیلن اپنے پیو کپتان دے کفن دفن واسطے گھر جانا چاہندی سی پر اوسدی ماں نے اوس نوں اجازت نہ دِتی۔ ایہ گرمی دا موسم سی تے بہت ساریاں اُڈنی بماریاں جنوب وچ پھُٹ پئیاں سن۔ ہیلن دی ماں اپنی دِھی دی صحت نوں خطرے وچ نہیں سی پاسکدی۔ ایس لئی ہیلن ماسچیسٹس وچ ای کپتان واسطے دُکھی رہی۔

آخرکار‘ فیر کلمین نے جواب دِتا۔ ہیلن نوں قبول کر لیا گیا اے۔ پہلی وار ہیلن نوں سکول جان لئی ڈر لگیا۔ دوجیاں کُڑیاں نوں کوئی ڈر نہیں سی؟ جے اوہ فیل ہو گئی تے کیہ ہووے گا؟

پہلے پہل تاں ہیلن نوں ایوں لگا کہ اوہ سکول دی اک ودیارتھن ای اے۔ اوہ تے عینی باؤلز ہاؤس وچ رہندیاں سن۔ ہیلن نے دوست بنائے۔ کُجھ عورتاں نے ہتھ نال اکھر پٹی سکھ لئی تاں جو اوہ ہیلن نال گل کر سکن۔ اوہ کھیڈاں وچ اوہناں نال بھاگ لیندی نالے لمی لمی سیر پیدل کرن لئی چلی جاندی۔ ہیلن نے انگریزی‘ تواریخ‘ لاطینی تے جرمن پڑھی۔

کُجھ کتاباں بریلے (اُبھرے ہوئے اکھراں والی کتاب جو مناکھے یاں نابینالوک پڑھ سکدے نیں)وچ سن۔ عینی نوں اوس واسطے ساریاں کتاباں پڑھنیاں پیندیاں۔ عینی نوں اوہ لفظ وی ویکھنے پیندے جو اوہ نہیں سی جاندی۔ بھاویں اوہ لفظ جرمن وچ ہوون یاں فرانسیسی وچ۔

ہیلن نے دن رات محنت کیتی ۔ ہیلن اپنی تعلیم تِن ورھیاں وچ پوری کرنا چاہندی سی۔ کیہ اوہ اینی سخت محنت کر رہی سی؟بہت سار ے پڑھیار گلمین دے سکول وچ پنج ورھے گزاردے سن۔ پہلے دی طرحاں عادت وانگوں ضدی اوس نے واپسی توں انکار کر دِتا۔

مستقل محنت نال اوس نے پورا زور ماریا۔ ہیلن بمار ہو گئی۔ اوہدی بھین ملڈرڈ وی سکول جاندی سی۔ ملڈرڈ نے ویکھیا کہ ہیلن بمار لگدی اے تے ہمیشا تھکی تھکی وی۔ مسز کیلر نوں خطرا لگ گیا۔ کیہ عینی اوہدی دِھی توں اینا جوکھم تے کرڑی محنت کروا رہی اے؟

مسز کیلر‘ ہیلن دیاں سہیلیاں نال ملی۔ کیہ اوہنوں ہیلن نوں عینی توں دُور کر لینا چاہیدا سی۔ گل مین وی ایوں ای سوچدا سی۔ ہیلن تے عینی لگ بھگ دس ورھیاں توں اکٹھے رہ رہے سن۔ جدوں ہیلن جاندی‘ عینی وی چلی جاندی۔ شاید ایہ ای اوہ ویلا سی کہ ہیلن نوں اپنی اُستانی کولوں وِچھڑنا سی۔ ہیلن اپنی اُستانی نوں چھڈنا نہیں سی چاہندی۔ ہیلن نوں ایوں لگدا اوہ استانی توں بغیر رہ جاوے گی۔

مسز کیلر لڑکھڑا گئی۔ اوس نوں یقین نہیں سی آیا۔ آخر مسز کیلر عینی دے نال ای سی۔ ہیلن‘ عینی دے نال ای ہووے گی۔ ہیلن نوں گلمین دے سکولوں ہٹا لیا گیا۔ اوہ تے عینی رینتھم ماسچسٹس رہن لئی چلے گئے۔ اوتھے ہیلن اک پرایویٹ استاد نال کم کردی رہی۔ ریڈ کلف وچ جاون توں اوس نوں کوئی انکار نہیں سی کرسکدا۔

جون 1899 وچ ہیلن نے ریڈ کلف دے ٹیسٹ دِتے۔ اوہ پہلاں ای اُنّھی ورھیاں دی ہو چُکی سی۔ ریڈ کلف دے نوں پڑھیار صرف اٹھارھاں دے سن۔ ہیلن نوں فیل ہو جاون دا ڈر سی‘ پر اوہ چنگے نمبراں نال پاس ہو گئی۔ آخر کار4 جولائی 1899ء نوں قبولیت دا خط آیا۔ ہیلن واسطے صرف چھٹیاں ای رہ گئیاں سن۔ پر ریڈ کلف دے ہیڈ نے اوس نوں تجویز دِتی کہ ہیلن نوں ایتھے داخلا لین واسطے اک ورھے انتظار کرنا چاہیدا اے۔ ستمبر 1900ء وچ ہیلن نویں پڑھیار دے طور اُتے ریڈ کلف وچ داخل ہوئی۔ ذہانت دی حیران کُن

دھرتی وچ ہیلن نے آکھیا ’’مینوں وی دوجیاں وانگ اَزاد ای ہونا چاہیدا اے‘‘ ہیلن دا خاب سچ بنن لگا سی۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔باقی اگی وار