kraamaat@gmail.com
+ +92 333-430-6384


(5)انگریزی کویں سکھیے؟


Choose Writer ... January 12, 2020


Present Perfect tense

فعل حال مکمل

ایہ اوہ فعل اے جہدے وچ کوئی وی کم موجودا زمانے وچ مکمل ہویابارے دسیا جاوے

جویں کہ

میں چا ہ پی چُکیاآں۔

اوہ سکول جا چُکے نیں۔

سورج پچھم وچ ڈُب چُکیا اے۔

اوہ جھوٹھ بول چُکی اے۔

اسیں اپنا سبق یاد کر لیا اے۔/اسیں اپنا سبق یاد کر چُکے آں۔

ایہناں جُملیاں وچ جو کم دسے گئے نیں اوہ موجودا زمانے وچ مکمل یاں پورے ہو چُکے نیں ۔

ایہناں جُملیاں دی انگریزی بناون لئی ایہ اُصول ساہمنے رکھے جاون گے۔

پہلی گل تاں ایہ چیتے رکھو کے ضروری نہیں کہ ہر جُملے وچ چُکا،چُکی یاں چُکے ورگے ای لفظ ہوون تاں اوہ جُملا فعل حال مکمل دا ہووے گا سگوں کم مکمل ہوون نوں کر لیا اے دے حوالے نال وی بولیا جا سکدا اے۔

فاعل توں بعد امدادی فعلhasیاں haveلگے گا تے ایس توں مگروں فعل دی تیجی فارم ورتی جاوے گی۔بعدوں مفعول آوے گا۔

Subject+has/have+3rd verb+object

has/haveواسطے کجھ اُصول ایہ امدادی فعل کہڑے کہڑے فاعل نال آون گے اوہ ضرور چیتے وچ رکھو

He,She,Itتے واحد فاعل دے نال hasآوے گا

جد کہ have واسطے ایہ فاعل نیں We,I,They,Youتے جمع دے فاعل نال haveلگے گا ۔

فعل حال مکمل دے جُملیاں دی انگریزی

میں چا ہ پی چُکیاآں۔

۔I have taken tea

اوہ سکول جا چُکے نیں۔

۔They have gone to school

سورج پچھم وچ ڈُب چُکیا اے۔

۔The sun has set in the west

اوہ جھوٹھ بول چُکی اے۔

۔She has told a lie

اسیں اپنا سبق یاد کر لیا اے۔

۔We have learnt our lesson

منفی جُملےNegative Sentences

فعل حال مکمل دے منفی جُملیاں واسطے یاد رکھو کہhasتے haveدے بعدوں notآ جاوے گا باقی سارے اُصول سادے جُملے والے ای رہن گے۔

منفی جُملیاں دی انگریزی بناون لئی اُصول

Subject+has not /have not +3rd verb+object

ایس اُصول نوں ساہمنے رکھ کے منفی جُملیاں دی انگریزی بنانے آں

میں چا ہ نہیں پی چُکیاآں۔

۔I have not taken tea

اوہ سکول نہیں جا چُکے نیں۔

۔They have not gone to school

سورج پچھم وچ نہیں ڈُب چُکیا اے۔

۔The sun has not set in the west

اوہ جھوٹھ نہیں بول چُکی اے۔

۔She has not told a lie

اسیں اپنا سبق نہیں یاد کیتا اے۔

۔We have not learnt our lesson

فعل حال مکمل دے سوالیا جُملے

INTERROGATIVE SENTENCES

فعل حال مکمل دے سوالیا جُملے بناون واسطے Hasیاں Haveنوں جُملے دے مُڈھ وچ لایا جاندا اے بعدوں فاعل تے فیر فعل دی تیجی فارم لگن توں بعد مفعول آوے گا۔

انگریزی بناون دا اُصول

?+Have/Has+subject+3rdverb+ object

ہُن فعل حال مکمل دے سوالیا جُملیاں دی انگر یزی بنانے آں

کیہ میں چا ہ پی چُکیاآں؟

?Have I taken tea

کیہ اوہ سکول جا چُکے نیں؟

?Have they gone to school

کیہ سورج پچھم وچ ڈُب چُکیا اے؟

?Has the sun set in the west

کیہ اوہ جھوٹھ بول چُکی اے؟

?Has she told a lie

کیہ اسیں اپنا سبق یاد کر لیا اے؟

?Have we learnt our lesson

کجھ جُملے لکھے جا رہے نیں ایہناں دی انگریزی بناؤ۔

اوہ کرکٹ کھیڈ چُکے نیں۔

میں پہلا انعام حاصل کر چُکیا آں۔

ڈاکٹر ہوراں نے مریض دا معائنا کر لیا اے۔

کیہ اوہ خط لکھ چُکی اے؟

اوہ وقت ضائع نہیں کر چُکی اے۔

اوہ ماڑیاں دی مد د کر چُکیا اے۔

کیہ میں نماز پڑھ چُکیا آں؟

اوہ کہانی سنا چکے نیں۔