ٹالھی والا گھر

کِکّر، ٹالھی،بیری نِمّاں
پِپل توت تے بوڑھ نہیں بُھلے
وٹاں بنے، نہر دا کنڈھا
اج تک پِنڈ دے موڑ نہیں بھُلے
جموں تے امرود نہیں بُھلے
نہ ای انب لسوڑے بُھلے
نہ تے بُھلڈ پنجیری بُھلی
نہ پِنیاں نہ پُوڑے بُھلے
بلد پنجالی ہل نہیں بُھلی
واہناں،وانگھی، گڈ نہیں بُھلی
گادھی،ٹِنڈ نسار نہیں بُھلی
کھوہ کھاڈا تے اڈ نہیں بُھلی
اُکھلی تے نہیں مولھی بُھلی
چِھکو، چھابی، چھج نہیں بُھلے
سُگھڑ پن سگُچ نہیں بُھلے
جاچ سُچج تے پچ نہیں بُھلے
جھانجھر والے پیر نہیں بُھلے
نَتھلی والے نک نہیں بُھلے
روں توں کُولی بانہ نہیں بُھلی
گندل ورگے لک نہیں بُھلے
اِک گنیاں دی روہ نہیں بُھلی
لسّیاں دے اوہ کول نہیں بُھلے
سنگھنے دُدھ دی کھیر نہیں بُھلی
گُڑ دے مِٹھے چول نہیں بُھلے
سانجھ مروت پیار نہیں بُھلے
ورھیوں سِک وراگ نہیں بُھلے
لسن پلانہیں بوڑویں بُھلے
مکی،مکھن،ساگ نہیں بُھلے
رِجکا،موٹھ جوار نہیں بُھلی
سرہوں، کنک کپاہ نہیں بھلی
ہولاں تے نہیں سَتّو بُھلے
لاچی لونگ دی چاہ نہیں بُھلی
مہندی تے نہیں وٹنے بُھلے
جنج گھڑولی کھٹ نہیں بُھلے
اک گھڑی جے گھول نہیں بُھلے
میلے وی تے جھٹ نہیں بُھلے
گُھگھی لالھی سہیڑ نہیں بُھلی
شِکرے، لگڑ تے باج نہیں بُھلے
تاڑی تے نہیں ہاکر بُھلی
رہیکلیاں دی واج نہیں بُھلی
کاپے تے نہیں ڈھانگے بُھلے
تیر کمان غُلیل نہیں بُھلی
ٹیشن تے نہیں ٹانگے بُھلے
آؤندی جاندی ریل نہیں بُھلی
نِنگلاں،لاٹو ڈور نہیں بُھلی
باگھڑ تے اخروٹ نہیں بُھلے
یَسّو پنجو ہار نہیں بُھلے
اج تک کَلّیاں جوٹ نہیں بُھلے
چِبھڑ تے نہ پیلاں بھُلیاں
نہ ای یار بھپولے بُھلے
نہ ای گچک مرونڈے بُھلے
نہ ٹانگر تے گولے بُھلے
واواں ورگی ٹور نہیں بُلھی، سپاں ورگی گُت نہیں بُھلی
کِھڑ کِھڑ ہسدے دِن نہیں بُھلے
گلاں کردی رُت نہیں بُھلی
گلیاں دے رنگ روپ نہیں بُھلے
رب جہے یار دا در نہیں بُھلیا
وانساں آلی گُٹھ نہیں بُھلی
ٹالھی والا گھر نہیں بُھلیا