کسے وی مومن دا ایمان تے جیون اودوں تک مکمل نہیں ہوندا اے جدوں تک اوس دے جیون وچ عشق رسول ﷺ دی جوت نہیں جگدی اے۔ایس عشق دی جوت نوں نعتاں وچ بیان کرن والے محسن عباس نے اکھراں راہیں اپنے عشق دا انمُلا وکھالا کیتا اے۔ایہ عشق نبوی ؐ دے وچ اپنا جیون ای نہیں بِتا رہے نیں سگوں اپنیاں لکھیاں نعتاں وچ عشق رسول ؐ دا پرچار کردے وی نظر آندے نیں تاں جو ہورناں دے دِلاں وچ وی ایہ جوت جگائی جا سکے۔نعت دے دِیوے بالن والا شاعر محسن عباس اے جس نے اپنے شعراں راہیں اپنے اندر دے جذبیاں نوں بڑے سوہنے انداز نال بیان کیتا اے۔ اوہناں دی شاعری وچ رسول پاک نال عقیدت دا نویکلا رنگ ملدا اے جو نویکلے پن نال بیان کیتا گیا اے۔
نبی ﷺ دے روپ دی نگری ٹھکانے کون بھُلے
جو ویکھے رقص وچ موسم سہانا کون بھُلے
یاں فیر
کیہ گل کراں مدینے دے میں اوس بزار دی
جنت وی جس نظارے توں اکھیاں نوں واری
ایس شعری پراگے دے ہر شعر وچ عقیدت تے محبت نال پُرچےجذبیاں نوں بڑے سوہنے ڈھنگ نال بیانیا گیا اے۔
ایس کتاب دے کُل صفحے 128نیں تے مُل تِن سو روپے اے۔ایس کتاب نوں پنجابی مرکز لاہور نے چھاپیا اے۔ کتاب ایس پتے توں منگوائی جا سکدی اے 129عزیز منزل حمزا ٹاؤن،19واں کلومیٹر فیروز پور روڈ لاہور۔
