kraamaat@gmail.com
+ +92 333-430-6384


پنجواں لائلپور سلیکھ میلا


چاند شکیل February 19, 2020


پنجواں لائلپور پنجابی سلیکھ میلا


پنجابی پیارے عامر بٹ تے توحید چٹھا ہوراں دی ٹیم ولوں پچھلے کُجھ ورھیاں وانگ چالو مہینے وی پنجابی زبان و ادب دے ودھا لئی نصرت فتح علی خان آڈٹوریم،اقبال سٹیڈیم فیصل آباد آرٹ کونسل وچ ”5واں لائلپور پنجابی سلیکھ میلا“ دے سرناویں ہیٹھ میلے دا آہر کیتا گیا۔
عامر بٹ تے توحید چٹھا پنجابی زبان، کلچر تے ادب دے ودھا لئی ناصرف ’سلیکھ میلا‘سگوں ایس توں اڈا وی ایس طرحاں دے کئی پروگرام کرواندے رہندے نیں۔پر میلے دی تے گل ای ہور اے۔میلے وچ ایس ورھے وی ڈاڈھی رونق ویکھن نوں ملی۔ 13,14 فروری نوں ہون والے میلے دے پہلے دن پنجابی کلچر دا رنگ نمایاں ویکھن نوں ملیا۔پہلے دن پنجابی گلوکاراں نے اپنے فن دا وکھالا کیتا۔ ’لال بینڈ’تے شعبا پنجابی، جامعہ محمدی شریف دی کالج ٹیم نے جھمر پاکے میلا لُٹ لیا۔پہلے دن دی ساری کارروائی فیس بُک راہیں ویکھی۔سوشل میڈیا دا ایہو ای فایدا اے کہ بندا گھر بہہ کے وی مزے مان رہیا ہوندا اے۔
میلے دے دوجے دن میری بطور سٹیج سیکرٹری ڈیوٹی وی سی۔ایس لئی اوتھے اپڑنا ضروری سی۔ 13فروری دی رات عبدالحفیظ ہوراں نال طے ہویا کہ سویرے دوویں میلے وچ لاہوروں ریل گڈی راہیں جاواں گے۔اسیں ریل گڈی راہیں سویرے 8وجے فیصل آباد اپڑ گئے۔ دوجے دن دی کارروائی 11وجے توں مگروں شروع ہوئی جو ایس ناچیز نے شروع کروائی۔دوجے دن دی کارروائی دی شروعات پنجابیا ں دی شان،پنجابیاں دامان،پنجاب دا پُتر،پنجاب دے سورمے دُلا بھٹے دے ناٹک توں ہوئی۔
دھماں پے گیاں لاہور وچ سارے
لدھی نے جدوں دُلا جمیا
میرے مولا تیرے رنگ نیں نیارے
پنڈاں دے وچ گلاں ہوندیاں
گلاں ہوندیاں مغل سرکارے
لدھی نے جدوں دُلا جمیا
ناٹک ’اینجل انٹرنیشنل کالج،فیصل آباد‘ دے پڑھیار تے پڑھیارناں ولوں کھیڈیا گیا۔ناٹک کھیڈن والے نِکے نِکے بالاں دی تیاری ویکھ کے بہت چنگا لگا،احساس ہویا کہ ساڈے بال کس طرحاں اپنی ماں بولی دی سیوا کرن دے نال نال اپنے سورمیاں نوں یاد کردے نیں۔ ایہدا سارا کریڈت ’اینجل کالج‘ دے اُستاد آصف ہوراں نوں جاندا اے جہناں گل بات کردے ہوئے دسیا کہ بالاں نوں ناٹک دی دو مہینے تیاری کروائی گئی۔ناٹک ویکھن لئی آڈٹوریم بھریا پیا سی۔ناٹک مُکن مگروں اوتھے آئے لوکاں نے بالاں نوں کھڑے ہوکے داد دِتی۔
ایہدے مگروں دوجا سیشن ”لوک بیانیا، تریخ تے سوشل میڈیا“ دے سرناویں ہیٹھ ہویا۔ایس سیشن وچ خالق گجر تے خیام چوہان ہوراں گل بات کیتی جدوں کہ ناصر ڈھلوں ہوراں ایہنوں ماڈریٹ کیتا۔ایس دوران دسیا گیا کہ کویں اسیں اپنے بابیاں دے سینے وچوں لوک بیانیا کڈھ کے کے سوشل میڈیا راہیں لوکائی تیکر اپڑا سکنے آں۔بعدوں تیجا سیشن”لوک ادب راہیں تریخ دے مہاڑ“دے سرناویں ہیٹھ ہویا۔جہدے وچ گورنمنٹ کالج، یونیورسٹی لاہور دے اُستاد ڈاکٹر ظہیر وٹو تے گورنمنٹ کالج جامعہ محمدی شریف دے پروفیسر ڈاکٹر فیصل جپا ہوراں گل بات کیتی جدوں کہ گورنمنٹ پوسٹ گرایجویٹ ڈگری کالج جھنگ دے پروفیسر ثقلین پاتوانا ہوریں سیشن دے ماڈریٹر سن۔پروفیسر ڈاکٹر فیصل جپا تے پروفیسر ڈاکٹر ظہیر وٹو ہوراں دا آکھنا سی کہ اصل لوک بیانیا اوہ نہیں ہوندا جہڑا شاہی دربار وچ لکھیا جائے سگوں ایہ تے لوکاں دے دِلاں وچ وسیا ہوندا اے۔ ایہدے مگروں کھان پین دا وقفا ہویا تے سارے آئے پروہنیاں نے روٹی پانی کھادا۔بعد وچ”پنجاب دی رہتلی نقشا کاری“ دے سرناویں ہیٹھ ”برگدارگنائزیشن“ دے کوآرڈینیٹر عثمان یونس ہوراں تھوڑے ای چِر وچ بھرویں گل بات کیتی۔ فیر اگلا سیشن ”پنجاب دا لوک بیانیا“ دے سرناویں ہویا۔سیشن وچ ندیم عمر تارڑ ہوراں گل بات کرنی سی تے افصل ساحر ہوراں ایہنوں ماڈریٹ کرنا سی پردوویں پروہنے کسے مجبوری کارن نہ اپڑ سکے۔جہدی وجھا توں پروفیسر ڈاکٹر ظہیر وٹو ہوراں سیشن اگانہہ ٹوریا۔ پروفیسر ڈاکٹر سعید خاور بھٹا ہوراں گل بات کیتی۔
بعد وچ ”خلافت تحریک دے 100سال“ دے سرناویں ہیٹھ، سیشن وچ علی عثمان قاسمی،عامر ریاض، ڈاکٹر اقبال چاولا تے نین سُکھ ہوراں گل بات کیتی جدوں کہ خولہ چیمہ ہوراں سیشن دی کارروائی چلائی۔فیر ”مکھ وکھالی،پانی دی کندھ“ دے سرناویں ہیٹھ اک سیشن ہویا۔ ’پانی دی کندھ‘ پروفیسر زبیر احمد ہوراں دی کتاب اے۔ایس کتاب بارے گورنمنٹ کالج،یونیورسٹی فیصل آباد دے شعبا اُردو دے اُستاد ڈاکٹر عبدالعزیز ملک ہوراں بھرویں گل بات کیتی۔جدوں کہ زبیر احمد ہوراں اپنی کتاب وچوں کہانیاں دیاں چونویاں لایناں سُنائیاں۔ ایہدے مگروں کہانی دربار تے فیر مشاعرا وی سی پر اسیں گھر جانا سی،ایس لئی کہانیاں تے مشاعرا سُنن توں محروم رہے۔آخیر اُتے عامر بٹ ہوراں کُجھ تحفیاں نال ٹوریا۔
واپسی اُتے عبدالحفیظ صاحب جو ساڈے نال میلے دے دوجے دن فیصل آباد اپڑے سن اوہ پروفیسر زبیر ہوراں دی گڈی وچ بہ گئے تے میں اقبال حیدر بٹ تے عثمان یونس ہوراں نال اِکو گڈی وچ۔دوناں بیلیاں نال میری پہلی ملاقات سی۔فیس بک راہیں اک دوجے نوں چنگی طرحاں جاندے ساں۔راہ دوچ پنجابی زبان،کلچر، سیاست تے پنجابی لکھاریاں دے رویے بارے لمی چوڑی گل بات ہوندی رہی۔ایس دوران عثمان یونس (برگدارگنائزیشن دے کوآرڈینیٹر)ہوراں دسیا کہ اوہناں اج پہلی وار پنجابی کوئی شے پنجابی وچ اینے لوکاں ساہمنے پڑھی اے۔اِنج گلا ں ہوندیاں رہیاں تے پتا لگا ای نہ لگا اسیں لاہور اپڑ گئے۔فیر سارے اپنے اپنے گھراں نوں اپڑ گئے۔آخیر اُتے میں اک وار فیر عامر بٹ تے توحید چٹھا ہوراں دی ٹیم دا شکریا ادا کرن دے نال نال اپنے اعجاز ویر دا وی شکریا ادا کرنا جہناں میری رہنمائی کیتی۔