قومانتری پدھر تے کرونا  وایرس نال پیدا ہوئے بھیڑے حالات ٭  تازا رپورٹ کیہ ساہمنے آئی؟ــ-------- رویل نیوز

اسلام آباد (اُچیچی رپورٹ) کرونا وایرس دے کارن پوری دنیا وچ ہلاکتاں تے نویں کیسز رپورٹ ہون دا وڈاسلسلا جاری اے‘ پچھلے 24 گھنٹیاں دوران اٹلی وچ 812‘ سپین وچ 737‘ فرانس وچ 418‘ امریکا وچ 271‘ برطانیا وچ 180‘ ایران وچ 117‘ ہالینڈ وچ 93‘ بیلجیم وچ 82‘ سوئٹزر لینڈ وچ 48‘ ترکی وچ 37 تے سویڈن وچ 36 بندے ہلاک ہو گئے‘ اٹلی وچ مجموعی مَوتاں دی گنتی 11591 تے متاثرین دی گنتی 1 لکھ توں ودھ گئی‘ اِک دن دے دوران پوری دنیا وچ 2847 ہلاکتاں تے 44980 نویں کیسز رپورٹ ہوئے نیں‘ عالمی سطح اُتے متاثرا روگیاں دی گنتی 7 لکھ 68 ہزار 370 تے ہلاکتاں دی گنتی 36912 تک پہنچ گئی‘ 1 لکھ 60 ہزار 181 بندے صحت یاب ہو چکے نیں۔ وسیلیاں دے مطابق کرونا وایرس نے 200 ملکاں نُوں اپنی ولھیٹ وچ لے لیا اے‘ پوری دنیا وچ ہُن تک مجموعی طور اُتے 7 لکھ 68 ہزار 370 بندے وایرس دا شکار ہوئے جد کہ مَوتاں دی گنتی 36912 ہو گئی اے‘ پچھلے 24 گھنٹیاں دے دورا سبھ توں ودھ ہلاکتاں اٹلی وچ ریکارڈ ہوئیاں نیں جتھے ہور 812 بندے وایرس کارن دَم توڑ گئے‘ ایس طرحاں اٹلی وچ ہلاکتاں دی گنتی 11591 ہو گئی اے‘ اٹلی وچ 4050 نویں کیسز رپورٹ ہون دے بعد متاثرا روگیاں دی گنتی 1 لکھ 1739 ہو گئی اے۔ سپین وچ ہور 737 بندے جان دی بازی ہار گئے جہدے بعد ہلاکتاں دی گنتی 7340ہو گئی اے‘ 5085 نویں کیسز ساہمنے آن دے بعد روگیاں دی گنتی 85192 تک پہنچ گئی اے‘ فرانس وچ 418ہلاکتاں دے بعد مرن والیاں دی گنتی 3024 ہو گئی اے‘ 4376 تازا کیسز ساہمنے آن دے بعد متاثرا روگیاں دی گنتی 44550 ہو گئی اے‘ امریکا وچ وایرس دا شکار ہور 271بندے مارے گئے جہدے بعد امریکا وچ ہلاکتاں دی گنتی 2854 ہو گئی اے‘ 12478 نویں کیسز ساہمنے آن دے بعد متاثرین دی گنتی 1 لکھ 55969 ہو گئی اے‘ برطانیا وچ وایرس دا شکار ہور 180 بندے ہلاک ہو گئے جہدے بعد مَوتاں دی گنتی 1408 ہو گئی اے‘ 2619 نویں کیسز رپورٹ ہون دے بعد متاثرا روگیاں دی گنتی 22141 ہو گئی اے‘ ایران وچ وایرس نے ہور 117 بندیاں دی جان لے لئی جہدے بعد ہلاکتاں دی گنتی 2757 تک پہنچ گئی اے‘ ایسے طرحاں آسٹریلیا وچ 22‘ پرتگال وچ 21‘ ناروے وچ 6‘ ڈنمارک وچ 5‘ پولینڈ وچ 9‘ انڈونیشیا وچ 8‘ فلپائن وچ 7‘ میکسیکو وچ 4‘ ارجنٹائن‘ سربیا‘ بوسنیا‘ ثان مرینو وچ 3`3 مَوتاں ہوئیاں نیں۔ پاکستان وچ کرونا دے تصدیق شدا روگیاں دی گنتی 1 ہزار 914 ہو گئی اے جد کہ واصل ہون والے بندیاں دی گنتی ودھ کے 26 ہو گئی اے۔ وفاقی وزارت صحت دے کمانڈ اینڈ کنٹرول سیل دے جاری آنکڑیاں مطابق پچھلے 24 گھنٹیاں وچ 148 بندیاں وچ کرونا وایرس دی دس جد کہ اِک روگی دَم توڑ گیا‘ 12 دی حالت ماڑیاے تے 58 روگیاں نے ایس وایرس دے خلاف جنگ وچ کامیابی حاصل کیتی۔ سرکاری آنکڑیاں مطابق ملک وچ کرونا روگیاں دی سبھ توں بُہتی گنتی پنجاب وچ اے‘ جتھے 652 بندیاں وچ ایس وایرس داشکارہو چکے نیں،سندھ وچ 676‘ خیبر پختونخوا وچ 221‘ بلوچستان وچ 153‘ اسلام آباد وچ 58‘ گلگت بلتستان وچ 148 تے ازاد کشمیر وچ 6 روگی نیں۔ پنجاب دے شہرلاہور وچ کرونا دے روگیاں دی تعداد ہر آون والے دن وچ ودھدی جا رہی اے جو کسے وڈے خطرے نوں ساہمنے لیا سکدا اے ایس اُتے قابو پاون لئی سرکار نوں جتن کرن دی لوڑوی اے۔