kraamaat@gmail.com
+ +92 333-430-6384


عثمان بزدار تے چینی ڈاکٹراں دی ملاقات٭دوپاسی سانجھ نال کرونا توں بچن لئی صلاح مشورے۔۔۔۔۔۔۔ رویل نیوز


نمائندا رویل April 06, 2020


لاہور(نمائندا رویل) وزیر اعلا پنجاب سردار عثمان بزدار نال چین دے ڈاکٹراں تے ماہرین دے وفد نے ملاقات کیتی جہدے وچ کرونا وایرس دی وباء نال نبڑن لئی دو پاسی تعاون تے سانجھیاں کاوشاں نُوں فروغ دین اُتے اتفاق ہویا۔ چینی میڈیکل ٹیم نے کرونا وباء دی روک تھام لئی وزیر اعلا پنجاب عثمان بزدار دی قیادت وچ صوبائی حکومت دے جتناں دی تعریف کیتی۔ اوہناں نے پنجاب سرکار دے حفاظتی اقدامات تے علاج معالجے دے طریقا کار نُوں مؤثر متھ دِتا۔ ایس موقع اُتے چینی وفد دا کہنا سی کہ پنجاب وچ کرونا وایرس دا کھلار روکن لئی حکومت دے اقدامات مؤثر ثابت ہو رہے نیں‘ لوکائی نُوں کرونا ویارس توں بچان لئی وزیر اعلا عثمان بزدار نے فوری تے تیزرفتاری نال صحیح سمت وچ اقدامات کیتے نیں‘ لوکائی دے تحفظ دے ایہ اقدامات ودھیا نیں۔ ملاقات دوران چینی ڈاکٹراں تے چیف نرس نے کرونا وباء نال نبڑن لئی اپنے مشاہدات بیان کیتے تے تجربے وی دَسے۔ چینی ڈاکٹراں تے ماہرین نے مشورا دیندیاں ہویاں کہیا کہ کرونا وایرس دا کھلار چھیتی توں چھیتی تے گھٹ توں گھٹ تھاواں اُتے روکیا جاوے‘ چینی ڈاکٹر مامنگ ہوئی مطابق گرمی وچ وی کرونا ویرس دے کھلرن دے امکان نُوں نظر انداز نہیں کیتا جا سکدا۔ چینی وفد دا کہنا سی کہ سماجی فاصلے کرونا وایرس توں بچاء وچ اہم کردار ادا کردے نیں‘ گھٹ توں گھٹ 28 دن لئی لاک ڈاؤن اُتے عملدرآمد یقینی بنایا جاوے جہدے بعد محتاط انداز وچ مرحلا وار پابندیاں نرم کیتیاں جانیاں چاہیدیاں نیں۔ کرونا وایرس دے شکار روگی نُوں گھر وچ رہن دی بجائے ہسپتال‘ قرنطینا مرکز وچ آنا چاہیدا اے‘ روگی دی جان بچان لئی انتہائی ناگزیر صورت وچ پلازمے دا استعمال مفید ثابت ہویا اے۔ چینی ماہرین نے دَسیا کہ روگی لئی 3 اینٹی وائرل دوائیاں دا استعمال مفید ثابت ہویا‘ کئی ویلے کرونا وایرس دیاں علامتاں ظاہر نہیں ہوندیاں تے بُہتی قوت مدافعت رکھن والے بندے چھیتی صحت یاب ہو جاندے نیں‘ معمر بندے تے ہور بیماریاں وچ مبتلا لوکاں لئی کرونا وایرس خطرناک ہو سکدا اے۔ وزیر اعلا عثمان بزدار نے چینی ڈاکٹراں تے چیف نرس ولوں تعاون دی یقین دہانی اُتے تشکر دا اظہار کردیاں ہویاں کہیا کہ چین اعتماد جوگ سنگی اے‘ جہنے ہر اوکھے ویلے وچ ساتھ نبھایا اے۔ چین نے کرونا وایرس اُتے گھٹ توں گھٹ ویلے وچ قابو پا کے قابل تقلید مثال قایم کیتی اے۔ کرونا توں بچاء تے سدباب لئی چین دے تجربیاں توں فایدا چُکاں گے‘ چینی ڈاکٹراں دے مشورے تے سفارشاں اُتے عمل کراں گے۔